Read Chol 2 Reyob 15 Bible Online

2 Reyob 15 - Chol bible

2 Reyob 15

¹An wʌclujump'ejl (16) i jabilel Azarías che' bʌ tsa' caji i yumʌntel ti Judá ti' q'uexol Amasías i tat. I ña' jiñʌch Jecolías ch'oyol bʌ ti Jerusalén. Lajchʌmp'ejl i yuxc'al (52) jab tsi' cha'le i yumʌntel ya' ti Jerusalén. Tsi' teche i ye'tel che' wucp'ejl i cha'c'al (27) jab i ye'tel Jeroboam ya' ti Israel.

³Azarías tsi' mele chuqui uts'at ti' wut lac Yum Dios che' bajche' tsi' mele Amasías i tat.

⁴Pero ma'anic tsi' junyajlel jisa jini pulʌntib tac am bʌ ti bujbujtʌl. Jini winicob tsi' chʌn puluyob majtañʌl tac yic'ot jini pom ti pulʌntib.

⁵Jini cha'an lac Yum tsi' yʌq'ue i chʌmel Azarías. Tsa' caji ti leco bʌ tsoy. Ma'anic tsa' lajmi i tsoy c'ʌlʌl jinto tsa' chʌmi. Jini cha'an parte i yotot ba' tsa' chumle. Jotam i yalobil tsa' caji i melben i ye'tel che' cuxul to Azarías i tat. Tsi' cha'le yumʌl ti Judá.

⁶Ts'ijbubil ti' juñilel i reyob Judá pejtelel i melbal Azarías.

⁷Tsa' chʌmi Azarías. Tsa' mujqui ya' ba' mucul i ñojte'elob ya' ti' tejclum David. Che' jini tsa' wa'choconti ti rey jini Jotam ti' q'uexol i tat.

⁸Zacarías, i yalobil Jeroboam, tsi' teche i ye'tel ti Israel che' ti waxʌclujump'ejl i yuxc'al (38) jab i ye'tel Azarías rey bʌ ti Judá. Wʌcp'ejl jach uw tsi' cha'le i ye'tel.

⁹Tsi' mele jontolil ti' wut lac Yum che' bajche' tsi' mele i ñojte'elob. Ma'anic tsi' cʌyʌ i mel che' bajche' tsi' mele Jeroboam tsa' bʌ i yʌsa ti mulil israelob.

¹⁰Salum, i yalobil Jabes, tsa' caji i mich'len Zacarías. Tsi' teme i t'an yic'ot yaño' bʌ. Tsi' tsʌnsa ya' ti Ibleam. Che' jini tsi' chilbe i ye'tel.

¹¹Ts'ijbubil ti' juñilel i reyob Israel pejtelel i melbal Zacarías.

¹²Che' jini tsa' ts'ʌctiyi i t'an lac Yum Dios tsa' bʌ i sube Jehú: “Mi caj i yumʌntelob ti Israel a walobilob c'ʌlʌl ti' chʌnlajmlel a p'olbal”, che'en. Che'ʌch tsa' ujti.

¹³Salum, i yalobil Jabes, tsa' caji ti yumʌntel ti Israel che' bolonlujump'ejl i cha'c'al (39) jab i ye'tel Uzías rey bʌ ti Judá. Jump'ejl jach uw tsi' cha'le i ye'tel ya' ti Samaria.

¹⁴Manahem, i yalobil Gadi, tsa' loq'ui ti Tirsa, tsa' c'oti ti Samaria. Tsi' tsʌnsa Salum. Tsi' cha'le yumʌntel ti' q'uexol Salum tsa' bʌ i tsʌnsa.

¹⁵Ts'ijbubil ti' juñilel i reyob Israel pejtelel i melbal Salum yic'ot bajche' tsi' chilbe i yumʌntel Zacarías.

¹⁶Manahem tsi' laj jisa jini chumulo' bʌ ti Tifsa yic'ot ti jini xchumtʌl tac ti' joytʌlel Tirsa. Wen jontol tsi' tic'la jini mach bʌ anic tsi' p'isiyob ti' wenta. Tsi' pulbeyob i tejclum. Tsi' laj p'o'oyob x'ixicob cʌntʌbil bʌ i cha'an i yalobil.

¹⁷Manahem tsi' teche i ye'tel ti Israel che' bolonlujump'ejl i yuxc'al (39) jab i ye'tel Azarías ya' ti Judá. Lujump'ejl jab tsi' cha'le i ye'tel ya' ti Samaria.

¹⁸Pero Manahem tsi' mele jontolil ti' wut lac Yum. Tsi' ch'ujutesa dioste' tac che' bajche' tsi' mele Jeroboam tsa' bʌ i yʌsa ti mulil jini israelob.

¹⁹Jini rey ti Asiria i c'aba' Pul tsa' tili ti guerra ya' ti Israel. Manahem tsi' yʌq'ue Pul jo'p'ejl i cha'c'al (25) millón jini taq'uin cha'an mi' taj i coltʌntel ti' tojlel. Che' jini Pul tsa' cha' sujti ti' lumal.

²⁰Manahem tsa' caji i xic'beñob pejtelel jini wen chumulo' bʌ ti Israel cha'an mi' yʌc'ob i tojoñel. Ti jujuntiquil tsi' wersa aq'ueyob jo'p'ejl i cha'c'al mil (25,000) peso tojoñel.

²¹Ts'ijbubil ti' juñilel i reyob Israel pejtelel i melbal Manahem.

²²Tsa' chʌmi Manahem. Tsa' mujqui ya' ba' mucul i ñojte'elob. Tsa' caji ti yumʌntel i yalobil i c'aba' Pekaía.

²³Pekaía i yalobil Manahem tsi' teche i ye'tel ti Israel che' lujump'ejl i yuxc'al (50) jab i ye'tel Azarías. Uxp'ejl jab tsi' cha'le i ye'tel ya' ti Samaria.

²⁴Pekaía tsi' mele jontolil ti' wut lac Yum, come ma'anic tsi' cʌyʌ i mel che' bajche' Jeroboam tsa' bʌ i yʌsa ti mulil jini israelob.

²⁵Peka (i yalobil Remalías, i yumʌch i soldadojob Pekaía) tsi' laja i t'an yic'ot lujuntiquil i yuxc'al (50) winicob ch'oyolo' bʌ ti Galaad. Tsi' tsʌnsayob jini rey Pekaía ya' ti' yotot ti Samaria. Tsa' tsʌnsʌntiyob ja'el Argob yic'ot Arie. Che' jini tsa' caji i cha'len i yumʌntel Peka.

²⁶Ts'ijbubil ti' juñilel i reyob Israel pejtelel i melbal Pekaía.

²⁷Peka, i yalobil Remalías, tsi' teche i ye'tel ti Israel che' lajchʌmp'ejl i yuxc'al (52) jab i ye'tel Azarías ya' ti Judá. Junc'al jab tsi' cha'le i ye'tel ya' ti Samaria.

²⁸Peka tsi' mele jontolil ti' wut lac Yum. Ma'anic tsi' cʌyʌ i mel che' bajche' tsi' mele Jeroboam i yalobil Nabat, jini tsa' bʌ i yʌsa ti mulil jini israelob.

²⁹Che' woli ti yumʌntel Peka, tsa' tili Tiglat Pileser i rey asiriajob. Tsi' chilbe cabʌl tejclum: Ijón, Abel Betmaaca, Janoa, Cedes, Hazor, Galaad, Galilea, yic'ot pejtelel i lumal Neftalí. Cʌchʌl tsi' pʌyʌyob majlel jini israelob ti Asiria.

³⁰Oseas (i yalobil Ela) tsi' tsʌnsa Peka. Che' jini tsi' chilbe i yumʌntel. Tsi' teche i ye'tel ti Israel che' junc'alix jab i ye'tel Jotam i yalobil Uzías rey bʌ ti Judá.

³¹Ts'ijbubil ti' juñilel i reyob Israel pejtelel i melbal Peka.

³²Jotam, i yalobil jini rey Uzías, tsi' teche i ye'tel ti Judá che' cha'p'ejlix jab i ye'tel Peka i yalobil Remalías ya' ti Israel. An jo'p'ejl i cha'c'al jab (25) che' bʌ tsa' ochi ti rey Jotam. Wʌclujump'ejl (16) jab tsi' cha'le yumʌl ti Jerusalén. I ña' jiñʌch Jerusa (i yalobil Sadoc).

³⁴Jotam tsi' mele chuqui uts'at ti' wut lac Yum che' bajche' tsi' mele Uzías i tat.

³⁵Pero ma'anic tsi' jisa jini pulʌntib tac am bʌ ti bujbujtʌl ba' tsi' chʌn cha'leyob ch'ujutesaya jini winicob x'ixicob. Ti jim bʌ ora Jotam tsi' mele i ti' Templo am bʌ ti chan.

³⁶Ts'ijbubil ti' juñilel i reyob Judá pejtelel i melbal Jotam.

³⁷Ti jim bʌ ora lac Yum tsa' caji i choc tilel Rezín i rey Siria, yic'ot Peka i rey Israel cha'an mi' contrajiñob Judá.

³⁸Tsa' chʌmi Jotam. Tsa' mujqui ya' ba' muculob jini reyob ti' tejclum David. Acaz tsa' caji ti yumʌntel ti' q'uexol i tat.