Read Chol 2 Reyob 16 Bible Online

2 Reyob 16 - Chol bible

2 Reyob 16

¹Acaz i yalobil Jotam tsi' teche i ye'tel ti Judá che' anix wuclujump'ejl (17) jab i ye'tel Peka, i yalobil Remalías, ya' ti Israel.

²Junc'al i jabilel Acaz che' bʌ tsa' wa'choconti ti rey. Wʌclujump'ejl jab tsi' cha'le i ye'tel ti Jerusalén. Jontol i melbal. Ma'anic tsi' tsajca lac Yum che' bajche' tsi' mele David i ñojte'el.

³Tsi' mele jontolil che' bajche' tsi' meleyob i reyob Israel. Tsi' pulu i yalobil cha'an i majtan jini dioste' tac che' bajche' tsi' meleyob jini chocbilo' bʌ loq'uel ti' lumal Israel cha'an ti' caj leco bʌ i melbal.

⁴Tsi' pulu majtañʌl tac yic'ot pom ya' ti bujbujtʌl, ti pulʌntib am bʌ ti yebal colem te'.

⁵Rezín rey bʌ ti Siria, yic'ot Peka (i yalobil Remalías) rey bʌ ti Israel, tsa' caji i contrajiñob Acaz ti guerra. Tsi' joy mʌctayob Jerusalén, pero ma'anic tsa' mejli i ch'ʌmob.

⁶Ti jim bʌ ora jini rey Rezín tsi' cha' ch'ʌmʌ jini tejclum i c'aba' Elat. Tsi' yʌc'ʌ ti' wenta Siria. Tsi' choco loq'uel jini judíojob. Jini edomob tsa' tiliyob ti chumtʌl ti Elat. C'ʌlʌl wʌle ya' chumulob.

⁷Acaz tsi' chocbe majlel t'an Tiglat Pileser rey bʌ ti Asiria. Tsi' yʌlʌ: Awocolic coltañon loq'uel ti' c'ʌb i rey Siria, yic'ot ti' c'ʌb i rey Israel, come woli' contrajiñoñob ti guerra. Che' tsi' yʌlʌ Acaz.

⁸Acaz tsi' ch'ʌmʌ jini plata yic'ot oro ya' ba' lotol ti' Templo lac Yum, yic'ot jini taq'uin am bʌ ti' yotot reyob. Tsi' chocbe majlel jini rey am bʌ ti Asiria.

⁹I rey Asiria tsi' jac'ʌ. Tsa' majli i contrajin Damasco ya' ti Siria. Tsi' chili ti guerra. Tsi' choco loq'uel jini ya' bʌ chumulob. Tsi' pʌyʌyob majlel ti Kir. Tsi' tsʌnsa Rezín i rey Siria.

¹⁰Acaz tsa' majli i taj Tiglat Pileser rey bʌ ti Asiria ya' ti Damasco. Che' ya'an Acaz ti Damasco tsi' q'uele jump'ejl pulʌntib cha'an dioste'. Tsi' wen q'uele bajche' melbil yic'ot i p'isol. Tsi' chocbe majlel i yejtal pulʌntib jini motomaj i c'aba' Urías cha'an mi' yʌc' ti melol yambʌ lajal bʌ.

¹¹Jini cha'an jini motomaj Urías tsi' mele pulo' majtañʌl. Lajal tsi' mele che' bajche' tsa' subenti, lajal i p'isol, mero lajal bajche' jini am bʌ ti Damasco. Urías tsi' mele che' ya'to an jini rey Acaz ti Damasco. Che' bʌ tsa' c'oti Acaz tsi' q'uele melbilix. Tsa' caji i tech i c'ʌn.

¹³Acaz tsi' pulu alʌc'ʌl yic'ot majtañʌl melbil bʌ ti harina. Tsi' bec'be jini japbil tac bʌ majtañʌl. Tsi' tsijcʌbe i ch'ich'el jini alʌc'ʌl ya' ti pulo' majtañʌl.

¹⁴Tsi' loc'sa jini pulo' majtañʌl melbil bʌ ti bronce am bʌ ti' tojel Templo. Tsi' yʌc'ʌ ti' t'ejl jini tsiji' bʌ pulʌntib ya' ti norte.

¹⁵Jini rey Acaz tsi' sube jini motomaj Urías: Mi caj a c'ʌn jini tsiji' bʌ pulʌntib cha'an pejtelel ili majtañʌl tac i cha'an bʌ rey yic'ot i cha'an bʌ winicob x'ixicob: jini pulbil bʌ majtañʌl che' ti sʌc'ajel, yic'ot jini majtañʌl bʌ harina che' ti ic'ajel, yic'ot jini japbil tac bʌ majtañʌl. Yom ma' tsijcan jini tsiji' bʌ pulʌntib ti' ch'ich'el jini majtañʌl tac. Cʌybeñon jini pulʌntib melbil bʌ ti bronce cha'an mic bajñel c'ʌn che' an chuqui com j c'ajtiben. Che' tsi' yʌlʌ jini Acaz.

¹⁶Che'ʌch tsi' mele jini motomaj Urías che' bajche' tsi' sube jini rey Acaz.

¹⁷Jini rey tsi' laj bic'tesa i buchlib tac i yajñib ja' ya' ti Templo. Tsi' loc'sa jini colem bʌ i yajñib ja'. Tsi' yʌc'ʌ ti pam xajlel.

¹⁸Che' ja'el tsi' loc'sa i yopol i bijlel Templo ba' mi' ñumelob che' ti' yorajlel c'aj o, yic'ot ochibʌl ti Templo mu' bʌ i bajñel c'ʌn jini rey. Che'ʌch tsi' mele cha'an mi' yʌq'uen i majtan jini rey ti Asiria.

¹⁹Ts'ijbubil ti' juñilel i reyob Judá pejtelel i melbal Acaz.

²⁰Tsa' chʌmi Acaz. Tsa' mujqui ya' ba' muculob i ñojte'elob ti' tejclum David am bʌ ti Jerusalén. Ezequías tsa' caji ti yumʌntel ti' q'uexol i tat.