Read Chol 2 Reyob 2 Bible Online

2 Reyob 2 - Chol bible

2 Reyob 2

¹Lac Yum tsi' ña'ta c'otemix i yorajlel cha'an mi' pʌy letsel Elías ti panchan ti sutujt ic'. Tsa' loq'uiyob ti Gilgal Elías yic'ot Eliseo.

²Elías tsi' sube Eliseo: Cʌlejen ilayi, come lac Yum tsi' subeyon majlel ti Betel, che'en. Eliseo tsi' yʌlʌ: Ti' c'aba' jini cuxul bʌ lac Yum mic subeñet ma'anic mi caj j cʌyet che' cuxulet to, che'en. Jini cha'an temel tsa' majliyob ti Betel.

³Tsa' loq'uiyob ti Betel ch'iton x'alt'añob cha'an mi' pejcañob Eliseo: ¿Tsa' ba a wubi? Lac Yum mi caj i pʌy letsel a yum, che'ob. Eliseo tsi' jac'ʌ: Tsa' cu, ch'ʌbixla, che'en.

⁴Elías tsi' sube Eliseo: Poj cʌlejen ila ti Betel, come lac Yum tsi' chocoyon majlel ti Jericó, che'en. Eliseo tsi' yʌlʌ: Ti' c'aba' jini cuxul bʌ Dios ma'anic mi caj j cʌyet, che'en. Jini cha'an temel tsa' majliyob ti Jericó.

⁵Tsa' loq'uiyob ti Jericó ch'iton x'alt'añob cha'an mi' pejcañob Eliseo: ¿Tsa' ba a wubi? Lac Yum mi caj i pʌy letsel Elías, che'ob. Eliseo tsi' jac'ʌ: Tsa' cu, ch'ʌbixla, che'en.

⁶Elías tsi' cha' sube Eliseo: A wocolic cʌlejen ilayi, come lac Yum woli' chocon majlel ti Jordán ja', che'en. Eliseo tsi' yʌlʌ: Ti' c'aba' jini cuxul bʌ Dios, ma'anic mi caj j cʌyet cha'an ma' bajñel cha'len xʌmbal, che'en. Jini cha'an temel tsa' majliyob ti Jordán ja'. Che' bʌ tsa' majliyob, tsi' tsajcayob majlel lujuntiquil i yuxc'al (50) ch'iton x'alt'añob. Tsa' ñajti wa' cʌleyob i q'uelob Elías yic'ot Eliseo ya' ti' ti' Jordán ja'.

⁸Elías tsi' ch'ʌmʌ i bʌjq'uil. Tsi' pʌcula. Tsi' c'ʌñʌ i jats' jini ja'. Che' jini tsi' t'oxo i bʌ jini ja'. Tsa' c'axiyob ba' tiquin.

⁹Che' c'axemobix ti ja', Elías tsi' sube Eliseo: C'ajtibeñon chuqui yom mic melbeñet che' wʌ'to añon, come lac Yum mi caj i pʌyon majlel, che'en. Eliseo tsi' jac'ʌ: Aq'ueñon i p'ʌtʌlel quespíritu lajal bajche' a cha'an, pero cha'yajl i ñumel com, che'en.

¹⁰Elías tsi' jac'ʌ: Wocol jini woli bʌ a c'ajtin, pero mi tsa' q'ueleyon ba' ora mic pʌjyel majlel, mux a wʌq'uentel. Mi ma'anic tsa' q'ueleyon, ma'anic mi caj a wʌq'uentel, che'en.

¹¹Che' temel woliyob ti xʌmbal, woliyob ti t'an. Ti ora tsa' jubi tilel carreta tujc'ʌbil bʌ i cha'an caballo, che' yilal bajche' c'ajc. Ya' tsa' c'oti ti' yojlilob. Che' jini tsa' t'oxleyob. Jini sutujt ic' tsi' pʌyʌ majlel Elías ti panchan.

¹²Che' bʌ tsi' can q'uele Eliseo, c'am tsi' cha'le t'an: C tat, c tat. Awilan i carreta Israel yic'ot xñijca carretajob, che'en. Tsa' sʌc jili. Ma'anix tsi' chʌn q'uele. Tsi' ch'ʌmʌ i bʌjq'uil. Tsi' jet' tsili ti ojlil.

¹³Tsi' lotbe i bʌjq'uil Elías tsa' bʌ yajli ti lum. Che' jini tsa' cha' majli ti' ti' Jordán ja'. Tsi' c'ʌñʌ i bʌjq'uil Elías cha'an mi' jats' jini ja'. Tsi' yʌlʌ: ¿Baqui an lac Yum i Dios Elías? che'en. Che' bʌ tsi' jats'ʌ jini ja', tsi' t'oxo i bʌ. Che' jini tsa' c'axi Eliseo.

¹⁵Che' bʌ tsi' q'ueleyob jini ch'iton x'alt'añob ch'oyolo' bʌ ti Jericó, tsi' yʌlʌyob: Tsa'ix cʌybenti Eliseo i ch'ujlel Elías, che'ob. Tsa' c'oti i tajob. Tsi' ñocchocoyob i bʌ ti' tojlel.

¹⁶Tsi' yʌlʌyob: Wʌ'an quic'ot lojon lujuntiquil i yuxc'al ch'ejl bʌ winicob. Yom ma' wʌc' a t'an cha'an mi' majlel i sʌclañob a yum Elías. Tic'ʌl mi lac Yum tsi' pʌyʌ majlel Elías ya' ti chan bʌ wits o mi ya' ba' japal lum, che'ob. Pero Eliseo tsi' yʌlʌ: Mach la' chocob majlel, che'en.

¹⁷Pero jini winicob wersa tsi' chʌn xiq'uiyob. Che' jini tsa' caji i yubin quisin Eliseo. Jini cha'an tsi' jac'beyob: Chocoyob majlel che' jini, che'en. Jini cha'an tsa' majliyob jini lujuntiquil i yuxc'al winicob. Uxp'ejl q'uin tsi' lon ñopoyob i sʌclan, pero ma'anic tsi' tajayob.

¹⁸Ya'to an Eliseo ti Jericó che' bʌ tsa' sujtiyob. Tsi' subeyob: ¿Mach ba anic tsac subeyetla mach yomic mi la' majlel? che'en.

¹⁹Jini año' bʌ i ye'tel ti Jericó tsa' c'oti i subeñob Eliseo: Wen uts'atax ili tejclum ba' chumulon lojon che' bajche' ma' q'uel wʌle, pero jini ja' mach wenic. Jini cha'an woli' chocob i yalobilob jini x'ixicob che' maxto i yorajlelic mi' yilan pañimil, che'ob.

²⁰Eliseo tsi' subeyob: Ch'ʌmbeñonla tilel jump'ejl tsiji' bʌ poc'. Ya' ti' mal yom mi la' wotsan ats'am, che'en. Tsi' ch'ʌmbeyob tilel.

²¹Tsa' majli Eliseo ti' jol jini ja'. Tsi' yotsa ats'am. Tsi' yʌlʌ: Lac Yum tsa'ix i wen'esa ili ja'. Ma'anix i chʌmel. Ma'anix mi caj i chocob i yalobilob cha'an ti' caj jini ja', che'en.

²²Wen uts'at tsa' cʌle jini ja' che' bajche' tsi' yʌlʌ jini x'alt'an Eliseo.

²³Tsa' loq'ui ti Jericó, tsa' majli ti Betel. Che' woli to ti xʌmbal majlel, tsi' taja ch'itoñob ch'oyolo' bʌ ti Betel. Tsa' caji' wajleñob cha'an ma'anic i tsutsel i jol.

²⁴Eliseo tsi' sutq'ui i wut cha'an mi' q'uelob. Tsi' subeyob ti' c'aba' lac Yum mi caj i tajob wocol. Tsa' bʌc' loq'ui tilel ti mate'el cha'cojt ña' oso. Tsi' jisayob cha'tiquil i yuxc'al (42) ch'itoñob.

²⁵Eliseo tsa' loq'ui ya'i; tsa' majli ti wits i c'aba' Carmelo. Ti wi'il tsa' cha' sujti ti Samaria.