Read Chol 2 Reyob 20 Bible Online

2 Reyob 20 - Chol bible

2 Reyob 20

¹Ti jim bʌ ora tsa' c'ama Ezequías. Colelix i chʌmel. Jini x'alt'an Isaías (i yalobil Amoz) tsa' c'oti i suben: Woli' yʌl lac Yum: “Mele chuqui anto yom melol ti a wotot, come mux caj a chʌmel”, che'en.

²Ezequías tsi' mʌyʌ i wut ti' ñʌc' bojte'. Tsa' caji i pejcan lac Yum ti oración. Tsi' c'ajti ti wocol t'an: Awocolic ña'tañon, c Yum. Xuc'ul tsac cha'le xʌmbal ti a tojlel ti pejtelel c pusic'al. Tsac mele chuqui uts'at ti a wut, che'en. Tsa' caji ti cabʌl uq'uel Ezequías. Wen ch'ijiyem i pusic'al.

⁴Che' woli' loq'uel Isaías ya' ti patio, lac Yum tsi' cha' sube:

⁵Cucu ba'an Ezequías jini yumʌl bʌ ti' tojlel c tejclum. Suben: “Lac Yum, i Dios a ñojte'el David, woli' yʌl: Tsa'ix cubi a woración. Tsa'ix j q'uele ja'el i ya'lel a wut. Awilan mi caj c lajmesañet. Ti yuxp'ejlel q'uin mi caj a cha' ochel tic Templo.

⁶Mi caj c ñajtesʌbeñet a jabilel. Mi caj cʌq'ueñet yambʌ jo'lujump'ejl jab. Mi caj c wen coltañet yic'ot ili tejclum. Ma'anic mi caj cʌq'uetla ti' c'ʌb jini asiriajob. Mi caj c mel pejtelel iliyi cha'an i c'uxbintel j c'aba', cha'an c'ux mi cubin c winic David ja'el”. Che' tsi' yʌlʌ lac Yum, che'en Isaías.

⁷Isaías tsi' sube Ezequías cha'an mi' c'ajtin tilel sa' melbil bʌ ti higo. Tsi' chʌc' mulbe i tsoy. Che' jini tsa' lajmi.

⁸Che' maxto lajmenic Ezequías, tsi' c'ajtibe Isaías i yejtal i p'ʌtʌlel cha'an mi' ña'tan mi isujm mu'to i lajmesan lac Yum cha'an mi' majlel ti Templo che' ti yuxp'ejlel q'uin.

⁹Isaías tsi' jac'ʌ: Lac Yum mi caj i pʌsbeñet i yejtal i p'ʌtʌlel ti q'uelo' q'uin. ¿A wom ba mi' sujtel jini axñal lujunquejp, o a wom ba mi' ñumel lujunquejp? che'en.

¹⁰Ezequías tsi' jac'ʌ: Mach wocolic mi' ñumel lujunquejp. Mach che'ic yom. La' sujtic lujunquejp, che'en.

¹¹Jini x'alt'an Isaías tsi' c'ajtibe lac Yum ti oración. Lac Yum tsi' jac'ʌ. Tsa' cha' sujti lujunquejp ti q'uelo' q'uin.

¹²Ti jim bʌ ora Merodac Baladán (i yalobil Baladán) rey bʌ ti Babilonia, tsi' choco tilel winicob cha'an mi' yʌq'ueñob Ezequías jun yic'ot majtañʌl, come tsi' yubi c'amʌch.

¹³Che' bʌ tsa' c'otiyob ba'an Ezequías, tsi' pʌyʌyob ochel ti mal. Tsi' pʌsbeyob pejtel jini letsem tac bʌ i tojol, plata yic'ot oro, yic'ot xojocña bʌ ts'ac, yic'ot i yotlel tac juloñib. Tsi' wen q'ueleyob bajche' c'amel an i chubʌ'an Ezequías. Tsi' laj pʌsbeyob Ezequías.

¹⁴Jini x'alt'an Isaías tsa' c'oti ba'an jini rey Ezequías. Tsi' c'ajtibe: ¿Chuqui tsi' subeyetob jini winicob? ¿Baqui ch'oyolob? che'en. Ezequías tsi' jac'ʌ: ¡Ah! wen ñajt ba' tsa' tiliyob. Ch'oyolob ti Babilonia, che'en.

¹⁵Isaías tsi' c'ajtibe: ¿Chuqui tsi' q'ueleyob ti a wotot? che'en. Ezequías tsi' jac'ʌ: Tsi' q'ueleyob pejtel chuqui an c cha'an. Tsac pʌsbeyob pejtelel c chubʌ'an, che'en.

¹⁶Jini x'alt'an Isaías tsi' sube Ezequías: Ubiben i t'an lac Yum:

¹⁷“Tal jump'ejl q'uin, che' mi caj i cuchob majlel ti Babilonia pejtel jini am bʌ ti a wotot yic'ot pejtelel chuqui tsi' tempayob a tatob c'ʌlʌl wʌle. Ma'anic chuqui mi' caj ti wis cʌytʌl.

¹⁸Lamital a walobilob mi caj i pʌjyelob majlel. Mi caj i yotsañob ti capon cha'an mi' cha'leñob e'tel ya' ti yotot jini rey ti Babilonia”, che'en Isaías.

¹⁹Ezequías tsi' sube: Uts'at bajche' wola' wʌl mi che'ʌch yom lac Yum, che'en. Mach wocolic tsi' yubi come tsi' yʌlʌ ti' pusic'al: Uts'at cu mi tijicñayon c'ʌlʌl mic chʌmel. Che' tsi' ña'ta Ezequías.

²⁰Ts'ijbubil ti' juñilel i reyob Judá pejtelel i melbal Ezequías, yic'ot bajche' tsi' ts'ajqui jini colem bʌ i yajñib ja', yic'ot bajche' tsi' pʌyʌ ochel ja' ya' ti colem tejclum.

²¹Tsa' chʌmi Ezequías. Tsa' mujqui ba' muculob i ñojte'elob. Tsa' caji ti yumʌntel Manasés ti' q'uexol i tat.