Read Chol 2 Reyob 21 Bible Online

2 Reyob 21 - Chol bible

2 Reyob 21

¹Manasés tsa' caji ti yumʌntel ti Judá che' lajchʌmp'ejl i jabilel. Jo'lujump'ejl i yuxc'al (55) jab tsi' cha'le yumʌl ti Jerusalén. I ña' jiñʌch Hepsiba. Jontol i melbal Manasés. Lajal tsi' mele che' bajche' jini tejclumob tsa' bʌ i chocoyob loq'uel lac Yum cha'an mi' yochelob jini israelob.

³Tsi' cha' melbe i pulʌntib i diosob ya' ti bujbujtʌl ba' jembil i cha'an Ezequías i tat. Tsi' cha' melbe i pulʌntib tac Baal. Tsi' wa'choco ja'el i yejtal i dios i c'aba' Asera che' bajche' tsi' mele Acab i rey Israel. Tsi' wa'choco pulʌntib tac ya' ti' Templo lac Yum ba' tsi' ch'ujutesayob jini q'uin, yic'ot uw, yic'ot ec'. Jiñʌch i Templo lac Yum tsa' bʌ i yajca cha'an mi' tsictesan i ñuclel.

⁶Tsi' pulu juntiquil ch'iton bʌ i yalobil ti pulʌntib cha'an i majtan dioste'. Tsi' pejca xch'ʌcojelob. Tsi' wa'choco xwujtob yic'ot jini año' bʌ i ña'tʌbal tilem bʌ ti xiba. Tsi' yutsi mele chuqui tac leco ti' wut lac Yum. Tsi' techbe i mich'ajel lac Yum.

⁷Tsi' yotsa ti Templo jini quisintic jax bʌ i yejtal jini dios Asera tsa' bʌ i mele. Ya' ti' Templo lac Yum tsi' yotsa. Tsa' wʌn subentiyob David yic'ot Salomón i yalobil: “Mi caj cʌc' j c'aba' ti ili Templo wʌ' ti Jerusalén ti pejtelel ora. Jiñʌch c tejclum tsa' bʌ c yajca ti' tojlel pejtelel jini tejclum tac ti Israel.

⁸Mi xuc'ul mi' jac'beñoñob c mandar che' bajche' tsi' subeyob Moisés, ma'anic mi caj c chocob loq'uel ti ili lum tsa' bʌ cʌq'ueyob i ñojte'elob”. Che' tsa' subentiyob.

⁹Pero ma'anic tsi' jac'ʌyob. Manasés tsi' yutsi xiq'uiyob ti jontolil. Ñumen an i mul bajche' jini tejclumob tsa' bʌ chojquiyob loq'uel ti' tojlelob.

¹⁰Jini cha'an lac Yum tsi' sube jini x'alt'añob:

¹¹Leco bajche' woli' mel Manasés jini rey ti Judá. Bi'iticax i melbal. Ñumen jontol bajche' jini amorreojob wʌ' bʌ chumulob ti ñaxan. Cabʌl tsi' yʌsa ti mulil jini año' bʌ ti Judá, come tsi' xiq'uiyob ti' c'uxbintel jini melbil tac bʌ diosob.

¹²Jini cha'an mi caj c chocbeñob tilel wen bʌbʌq'uen tac bʌ wʌ' ti Jerusalén yic'ot ti Judá. Majqui jach mi' yubin mi caj i cha'len bʌq'uen.

¹³Mi caj c jisañob che' bajche' tsac jisa Samaria yic'ot pejtel i p'olbal Acab. Mi caj c junyajlel jisan Jerusalén che' bajche' ti but'ja'.

¹⁴Mi caj c choc loq'uel i colojbal winicob mu' bʌ i cʌytʌlob. Mi caj cʌc'ob ti' c'ʌb i contra. Mi caj i chilbentelob i chubʌ'an.

¹⁵Cha'an ti' caj tsi' meleyob chuqui tac leco tic wut tsi' techbeyoñob c mich'ajel c'ʌlʌl che' bʌ tsa' loq'uiyob i ñojte'elob ti Egipto c'ʌlʌl wʌle. Che'ʌch tsi' yʌlʌ lac Yum ti' tojlel jini x'alt'añob.

¹⁶Lac Yum tsi' yʌlʌ ja'el: Manasés tsi' tsʌnsa cabʌl i pi'ʌlob mach bʌ añobic i mul. Tsa' bujt'i Jerusalén ti tsʌnsʌbilo' bʌ i cha'an. Tsi' xiq'ui ti mulil jini año' bʌ ti Judá.

¹⁷Ts'ijbubil ti' juñilel i reyob Judá pejtelel i melbal Manasés, yic'ot i mul tsa' bʌ i mele.

¹⁸Tsa' chʌmi Manasés. Tsa' mujqui ba' muculob i ñojte'elob ya' ti pʌc'ʌbʌl am bʌ ti pat i yotot ya' ti' pʌc'ʌb Uza. Tsa' caji ti yumʌl Amón ti' q'uexol i tat.

¹⁹An cha'p'ejl i cha'c'al (22) i jabilel Amón che' bʌ tsi' teche i yumʌntel ti Judá. Cha'p'ejl jab tsi' cha'le i ye'tel ti Jerusalén. I ña' jiñʌch Mesulemet i yalobil Haruz ch'oyol bʌ ti Jotba. Amón tsi' mele jontolil ti' wut lac Yum che' bajche' Manasés i tat.

²¹Lajal tsi' mele che' bajche' i tat. Tsi' ch'ujutesa jini quisintic jax bʌ dioste' tac.

²²Tsi' cʌyʌ lac Yum, i Dios i ñojte'elob. Ma'anic tsi' ñopbe i bijlel lac Yum Dios.

²³I winicob jini rey Amón tsi' wʌlʌc tsʌnsayob ya' ti' yotot.

²⁴Jini chumulo' bʌ ti jini lum tsi' tsʌnsayob jini winicob tsa' bʌ i contrajiyob jini rey Amón. Tsi' wa'chocoyob ti rey Josías ti' q'uexol i tat.

²⁵Ts'ijbubil ti' juñilel i reyob Judá pejtel i melbal Amón.

²⁶Tsa' mujqui ya' ti pʌc'ʌbʌl i cha'an Uza. Tsa' caji ti yumʌntel i yalobil i c'aba' Josías.