Read Chol 2 Reyob 25 Bible Online

2 Reyob 25 - Chol bible

2 Reyob 25

¹Che' bolomp'ejl jab i ye'tel Sedequías, che' ti 25 de marzo, tsa' c'oti ti Jerusalén Nabucodonosor rey bʌ ti Babilonia yic'ot cabʌl soldadojob. Tsi' joyoyob Jerusalén. Tsi' meleyob chan tac bʌ ts'ajc cha'an mi' contrajiñob jini año' bʌ ti tejclum.

²Cha'p'ejl jab tsi' joy mʌctayob jini tejclum.

³Tsa' wen p'ojli wi'ñal ya' ti tejclum jinto tsa' jili i bʌlob i ñʌc' ti pejtel jini lum.

⁴Che' ti 24 de julio tsi' jemeyob jini ts'ajc am bʌ ti' joytʌlel jini tejclum. Tsa' puts'i Sedequías jini rey ti Judá che' bʌ tsi' q'uele jamʌlix jini tejclum. Tsa' puts'i yic'ot i soldadojob che' ti ac'ʌlel. Tsa' loq'uiyob ti' ti' tejclum am bʌ ti' ts'ej jini pʌc'ʌbʌl ba'an cha'p'ejl ts'ajc. Anquese joyol jini tejclum i cha'an babiloniajob, jini rey tsa' wersa puts'i majlel ti' bijlel Arabá.

⁵Jini soldadojob ch'oyolo' bʌ ti Babilonia tsi' yajñesayob majlel. Tsi' tajayob ya' ti joctʌl lʌc'ʌl ti Jericó. Tsa' pam pujquiyob i soldadojob jini rey Sedequías. I bajñel tsa' cʌle. Tsa' puts'iyob.

⁶Tsa' c'oti i chucob jini rey. Tsi' pʌyʌyob majlel ti Ribla ti' tojlel jini yumʌl ch'oyol bʌ ti Babilonia. Tsi' mele i bʌ ti' tojlel.

⁷Tsi' tsʌnsʌbeyob i yalobilob Sedequías ti' tojel i wut i tat. Tsi' loc'sʌbeyob i bʌc' i wut Sedequías. Cʌchbil ti cadena tsi' pʌyʌyob majlel ti Babilonia.

⁸Tsa' c'oti ti Jerusalén jini Nabuzaradán che' ti 22 de julio che' bolonlujump'ejl (19) jab i ye'tel Nabucodonosor, jini rey ti Babilonia.

⁹Tsi' pulbe i yotot lac Yum yic'ot i yotot jini rey. Pejtelel jini otot tac ti tejclum tsa' laj puli, yic'ot ja'el i yototob jini año' bʌ i ye'tel.

¹⁰Pejtel jini soldadojob ch'oyolo' bʌ ti Babilonia yic'ot jini capitán tsi' jemeyob jini ts'ajc am bʌ ti' joytilel Jerusalén.

¹¹Jini Nabuzaradán tsi' yʌc'ʌ i t'an cha'an mi' pʌyob majlel jini winicob x'ixicob tsa' bʌ cʌleyob ti tejclum, yic'ot jini tsa'ix bʌ i yʌc'ʌyob i bʌ ti' wenta i rey Babilonia, yic'ot pejtelel jini wen yujilo' bʌ e'tel ti chajp ti' chajp.

¹²Tsi' cʌyʌyob jini p'ump'uño' bʌ cha'an mi' cha'leñob e'tel ti ts'usubil yic'ot ti lum.

¹³Jini ch'oyolo' bʌ ti Babilonia tsi' buchbeyob i yoyel Templo melbil bʌ ti bronce. Tsi' laj xuluyob. Che' ja'el tsi' laj jemeyob jini colem bʌ i yajñib ja' melbil bʌ ti bronce yic'ot i buchlib. Tsi' ch'ʌmʌyob majlel ti Babilonia pejtelel jini bronce.

¹⁴Tsi' ch'ʌmʌyob majlel ja'el jini ch'ejew tac yic'ot alʌ pala tac, yic'ot yambʌ e'tijibʌl melbil bʌ ti bronce,

¹⁵yic'ot jini tsucu taq'uin letsem bʌ i tojol, yic'ot oro, yic'ot plata, am bʌ i c'ʌjñibal cha'an e'tel ti Templo.

¹⁶Mach p'isbilic i yalel jini cha'ts'ijt i yoyel Templo melbil bʌ ti bronce, yic'ot jini colem bʌ i yajñib ja', yic'ot i buchlib tsa' bʌ i mele Salomón ti' yotot lac Yum.

¹⁷I chanlel i yoyel Templo jiñʌch waxʌcp'ejl metro. I tamlel i jol jini oy jiñʌch ojlil i cha'p'ejl metro. Melbil ti bronce jini oy yic'ot i jol. An i ch'ʌjlib i jol che' bajche' chim yilal joyol bʌ ti' yejtal tac granada melbil bʌ ti bronce. Junlajal jini cha'ts'ijt oy, junlajal i jol.

¹⁸I yum soldadojob tsi' cʌchʌ majlel jini ñuc bʌ motomaj i c'aba' Seraías yic'ot jini motomaj i c'aba' Sofonías, yic'ot uxtiquil xcʌntayajob.

¹⁹Ya' ti tejclum tsi' cʌchʌ ja'el jini ñuc bʌ i yum soldadojob yic'ot jo'tiquil tsa' bʌ i pi'leyob ti ñumel jini rey Sedequías, yic'ot jini ñuc bʌ sts'ijbaya am bʌ ti' wenta cha'an mi' pʌy loq'uel pejtel año' bʌ i ye'tel ti guerra, yic'ot uxc'al winicob tilemo' bʌ ti Judá tsa' bʌ tajleyob ti tejclum.

²⁰Jini capitán Nabuzaradán tsi' pʌyʌyob majlel ti Ribla ba'an i rey Babilonia.

²¹Jini rey tsi' bajbeyob ti asiyal. Tsi' yʌc'ʌyob ti tsʌnsʌntel ti' lumal Hamat. Che'ʌch tsa' pʌjyiyob majlel jini winicob x'ixicob año' bʌ ti Judá.

²²Nabucodonosor, rey bʌ ti Babilonia, tsi' yotsa ti gobernador jini Gedalías (i yalobil Ahicam, i yalobil bʌ Safán). Tsa' aq'uenti i ye'tel Gedalías ti' tojlel jini tsa' bʌ cʌleyob ti Judá.

²³Che' bʌ tsi' yubiyob i yumob soldadojob woli ti gobernador Gedalías, tsa' majli i q'uelob ya' ti Mizpa. Jiñobʌch Ismael (i yalobil Netanías), Johanán (i yalobil Carea), Seraías (i yalobil Tanhumet jini ch'oyol bʌ ti Netofat), yic'ot Jaazanías (i yalobil winic ch'oyol bʌ ti Maaca) yic'ot pejtelel i pi'ʌlob ili winicob.

²⁴Gedalías tsi' pejcayob ti uts bʌ t'an: Mach yomic mi la' bʌc'ñan la' yuman jini ch'oyolo' bʌ ti Caldea. Chumlenla wʌ'i. Yumanla jini rey ti Babilonia. Che' jini uts'at mi caj la' wajñel, che'en.

²⁵Pero che' ti' wucp'ejlel uw tsa' tili Ismael i p'olbal bʌ jini reyob ti Judá yic'ot lujuntiquil winicob. Tsi' tsʌnsayob Gedalías yic'ot pejtel i pi'ʌlob ya' ti Mizpa, yic'ot babiloniajob.

²⁶Che' jini pejtelel jini año' bʌ ti tejclum, ch'o'ch'oco' bʌ yic'ot ñuco' bʌ, yic'ot i yumob soldadojob tsa' puts'iyob majlel ti Egipto cha'an tsa' caji i bʌc'ñañob jini babiloniajob.

²⁷Che' wuclujump'ejl i cha'c'al (37) jab cʌchʌl ti Babilonia Joaquín i rey Judá, tsa' caji' p'untʌntel cha'an jini rey ti Babilonia i c'aba' Evil Merodac. Che' ti' wucp'ejlel i cha'c'al (27) tsic ti' lajchʌmp'ejlel uw, ti jini jach bʌ jab che' bʌ tsi' teche i ye'tel jini rey ti Babilonia, tsi' yʌc'ʌ ti libre jini rey Joaquín. Tsi' loc'sa ya' ti cárcel.

²⁸Tsi' pʌsbe Joaquín i c'uxbiya. Ñumen ñuc tsa' q'uejli Joaquín che' bajche' pejtelel yambʌ reyob tsa' bʌ cʌjchiyob majlel ti Babilonia.

²⁹Tsa' q'uextʌbenti i pislel tsa' bʌ i lʌpʌ ti cárcel. Tsi' c'uxu waj yic'ot jini rey am bʌ ti Babilonia c'ʌlʌl jinto tsa' chʌmi.

³⁰Jini rey ti Babilonia tsi' yʌq'ue pejtelel chuqui yom ti jujump'ejl q'uin c'ʌlʌl jinto tsa' chʌmi.