Read Chol 2 Reyob 3 Bible Online

2 Reyob 3 - Chol bible

2 Reyob 3

¹Joram, i yalobil Acab, tsa' caji i tech i yumʌntel ti' tojlel israelob, che' woli' majlel ti waxʌclujump'ejl (18) jab i ye'tel Josafat rey bʌ ti Judá. Lajchʌmp'ejl jab tsi' cha'le i yumʌntel Joram ya' ti Samaria.

²Wen jontol jini Joram, pero ñumen jontol i tat i ña', come Joram tsi' loc'sa i yejtal Baal tsa' bʌ i wa'choco i tat.

³Pero lajal tsi' mele che' bajche' Jeroboam i yalobil Nabat, come tsi' xiq'ui jini israelob cha'an mi' ch'ujutesañob dioste' tac.

⁴Jini rey Mesa am bʌ ti Moab wen yujil i cosʌntel tiñʌme'. Ti jujump'ejl jab wersa tsi' chocbe majlel joc'al mil alʌ tiñʌme' jini rey ti Israel, yic'ot i tsutsel joc'al mil tat tiñʌme', jiñʌch i tojoñel.

⁵Che' bʌ tsa' chʌmi Acab, jini rey ti Moab tsa' caji i chañ'esan i bʌ ti' tojlel israelob. Mach chʌn yomix i yʌc' i tojoñel.

⁶Jini cha'an Joram tsa' caji i tempan pejtelel jini soldadojob israelob. Tsi' chocbe majlel t'an jini Josafat rey bʌ ti Judá. Tsi' sube: Jini rey ti Moab woli' contrajiñon. Awocolic la' coltañon ti guerra ti' contra Moab, che'en. Jini rey ti Judá tsi' jac'ʌ: Talon cha'an mij coltañet, come lac pi'ʌlʌch lac bʌ. Mi cʌq'ueñet pejtelel c winicob yic'ot j caballo tac cha'an mi' coltañetob. Subeñon baqui yom mi lac majlel ti guerra, che'en Josafat. Jini rey ti Israel tsi' jac'ʌ: Ya' yom mi lac ñumel majlel ti' bijlel colem bʌ i tiquiñal lum am bʌ ti Edom, che'en Joram.

⁹Jini cha'an tsa' loq'uiyob ti guerra jini israelob, yic'ot jini año' bʌ ti Judá, yic'ot jini año' bʌ ti Edom ja'el. Tsi' cha'leyob xʌmbal wucp'ejl q'uin ya' ti colem bʌ i tiquiñal lum. Tsa' jiliyob i ya'al jini xguerrajob. Ma'anix ja' cha'an i yʌlac'ob ja'el.

¹⁰Joram jini rey bʌ ti Israel c'am tsi' yʌlʌ: Mach cha'leyajix. ¿Tsa' ba i pʌyʌyonla tilel lac Yum cha'an mi' yʌc'onla ti' c'ʌb jini moabob? che'en.

¹¹Josafat tsi' jac'ʌ: ¿Mach ba anic ilayi juntiquil x'alt'an i cha'an lac Yum mu' bʌ mejlel i coltañonla? che'en. Juntiquil winic israel bʌ tsi' jac'ʌ: Wʌ'an Eliseo i yalobil Safat, jini tsa' bʌ i tem cha'le e'tel yic'ot Elías, che'en.

¹²Josafat tsi' jac'ʌ: Uts'at Eliseo. Mi mejlel i subeñonla i t'an lac Yum, che'en. Jini cha'an tsa' majli i pejcañob Eliseo jini uxtiquil reyob, i rey israelob, yic'ot i rey Judá, yic'ot i rey Edom.

¹³Eliseo tsi' sube i rey israelob: ¿Chucoch ma' tilel a pejcañon? Cucu ba'an jini xlot bʌ x'alt'añob tsa' bʌ i ñopoyob a tat a ña', che'en. Joram i rey israelob tsi' yʌlʌ: Mach che'ic yom come jiñʌch lac Yum tsa' bʌ i pʌyʌyon lojon tilel cha'an mi' jisañon lojon ti' c'ʌb jini moabob, che'en.

¹⁴Eliseo tsi' jac'ʌ: Cuxul Dios mu' bʌ c Yuman. Machic wʌ'an Josafat i rey Judá, ma'anic mic p'iset ti wenta.

¹⁵Wʌle pʌybeñon tilel juntiquil yujil bʌ i ñijcʌntel música, che'en. Tsa' tili juntiquil i ñijcan. Che' bʌ woli' ñijcʌntel música, lac Yum tsi' pejca Eliseo. Eliseo tsi' yʌlʌ:

¹⁶Mi' yʌl lac Yum: “Piquila cabʌl bej yoc ja' ila ti colem bʌ i tiquiñal lum ba' mi mejlel i tempʌyel ja'. Ma'anic mi caj la' wubin ic', mi ja'al, pero ili joctʌl mi caj i bujt'el ti ja'. Mi caj la' jap jatetla yic'ot la' wʌlac'”, che'en.

¹⁸Cabʌl to mi caj i pʌsbeñetla i yutslel i pusic'al lac Yum Dios. Mi caj i yʌc' ti la' c'ʌb jini moabob.

¹⁹Mi caj la' jisan pejtelel p'ʌtʌl tac bʌ i tejclum yic'ot wen melbil bʌ i bijlel, yic'ot pejtelel wen tac bʌ te', yic'ot i yajñib i ya'al. Mi caj la' lu' ts'ibubeñob i lumal ti xajlel, che'en Eliseo.

²⁰Ti yijc'ʌlal che' bʌ tsa' sʌc'a pañimil, che' ti' yorajlel jini majtañʌl, tsa' caji i q'uelob wolix i loq'uel tilel ja' ya' ti' bijlel Edom. Pejtel jini lum tsa' bujt'i ti ja' ba' tsi' piquiyob.

²¹Jini año' bʌ ti Moab tsi' yubiyob talob uxtiquil reyob ti guerra. Ti ora jach tsi' tempayob i bʌ pejtel winicob yujilo' bʌ i c'ʌñol espada. Tsa' majli i tsolob i bʌ ya' ba' jaxʌl i lumal.

²²Che' ti wen sʌc'ajel tsa' caji ti ts'ʌjyel q'uin ya' ti ja'. Jini año' bʌ ti Moab tsi' ñajtʌ q'ueleyob jini ja'. Che' yilal bajche' ch'ich'.

²³Tsi' yʌlʌyob: Jiñʌch ch'ich'. Jini reyob tsa'ix sujti i wʌlʌc tsʌnsañob i bʌ. Jini cha'an conla wʌle cha'an mi lac ch'ʌmbeñob i chubʌ'an, che'ob.

²⁴Pero che' bʌ tsa' c'otiyob ba' tempʌbilob jini israelob, jini israelob tsa' loq'uiyob ti ora cha'an mi' tsʌnsañob jini moabob. Tsa' puts'iyob jini loq'uemo' bʌ ti Moab. Pero jini israelob tsi' yajñesayob majlel c'ʌlʌl ti' lumal Moab.

²⁵Tsi' jisayob jini tejclum tac. Tsi' ts'ibubeyob jini wen bʌ lum ti xajlel. Tsi' laj mʌcbeyob i bijlel tac i ya'al. Tsi' sec'beyob wen tac bʌ i te' yujil bʌ ac'ol i wut. Tsi' laj jisayob. Cojax tsa' cʌle jini tejclum Kir Hareset. Pero ti wi'il tsi' jisayob ja'el.

²⁶Jini rey ti Moab tsi' q'uele wolix i mʌjlel i cha'an i contrajob. Tsi' pʌyʌ tilel jo'lujunc'al i cha'bajc' (700) winicob wen yujilo' bʌ i c'ʌñol espada cha'an mi' wersa ñumelob ba'an i rey Edom, pero ma'anic tsa' mejliyob.

²⁷Jini cha'an i rey Moab tsi' pʌyʌ tilel jini ñoj ascuñʌl bʌ i yalobil i tilel bʌ mi' yochel ti rey ti' q'uexol i tat. Tsi' tsʌnsa cha'an majtañʌl ti' pam jini chan bʌ ts'ajc. Tsa' toj sajtiyob i pusic'al jini israelob che' bʌ tsi' ñajtʌ q'ueleyob ili leco bʌ i melbal. Tsa' cajiyob ti sujtel ti' lumal.