Read Chol 2 Reyob 4 Bible Online

2 Reyob 4 - Chol bible

2 Reyob 4

¹I yijñam juntiquil x'alt'an tsa' c'oti i pejcan Eliseo. Tsi' yʌlʌ: Tsa'ix chʌmi c ñoxi'al. Che' cuxul to tsi' wen bʌc'ña lac Yum Dios. Che' bʌ tsa' chʌmi, an i bet. Tsa' tili i yum jini taq'uin cha'an mi' c'ajtin. Mi ma'anic mic tojben, mi caj i pʌy majlel jini cha'tiquil calobil ti' mozo, che'en.

²Eliseo tsi' yʌlʌ: Subeñon chuqui a wom mic melbeñet. ¿Bajche' to c'amel an i bʌl la' ñʌc' ti la' wotot? che'en. Jini meba' x'ixic tsi' jac'ʌ: Ma'anic chuqui an c cha'an, cojach jump'ejl p'ejt olivo aceite, che'en.

³Eliseo tsi' sube: Cucu ba'an a pi'ʌlob. C'ajtibeñob p'ejt ti majan. Yom ma' tempan cabʌl jochol bʌ p'ejt.

⁴Che' ma' sujtel ti a wotot, ochen ti mal yic'ot a walobilob. Ñup'u i ti'. Otsan jini aceite a cha'an ti jochol bʌ p'ejt. Che' mi' bujt'el jujump'ejl p'ejt, yom ma' lot, che'en Eliseo.

⁵Che'ʌch tsi' mele jini x'ixic. Jini ch'iton bʌ i yalobilob tsi' ch'ʌmbeyob tilel jochol tac bʌ p'ejt. Jini x'ixic tsi' yotsa aceite ti jujump'ejl p'ejt.

⁶Che' laj bujt'emix jini p'ejt, tsi' sube i yalobilob: Ch'ʌmbeñon tilel yambʌ p'ejt, che'en. Tsi' yʌlʌyob: Ma'anix yambʌ p'ejt, che'ob. Che' jini tsa' lajmi ti p'ojlel jini aceite.

⁷Jini xmeba' tsa' majli i suben jini x'alt'an chuqui tsa' ujti. Eliseo tsi' sube: Cucu choño jini aceite cha'an ma' tojben i bet a ñoxi'al. I tojol jini aceite mi caj i jastʌyel cha'an ma' c'ʌn jatet yic'ot a walobilob, che'en.

⁸Ti jump'ejl q'uin tsa' majli Eliseo ti Sunem. Ya'an juntiquil wen chumul bʌ x'ixic. Jini x'ixic tsi' pʌyʌ ochel ti we'el ya' ti' yotot. Che' bajche' jayjayajl tsa' ñumi ya'i tsa' ochi ti we'el.

⁹Jini x'ixic tsi' sube i ñoxi'al: Cujil jiñʌch ch'ujul bʌ x'etel i cha'an Dios jini winic mu' bʌ i ñumel ilayi.

¹⁰La' lac chajpʌben i mal otot ya' ti' cha'lajmlel cha'an ya' mi' julel i c'aj i yo. La' laj c'axtesʌben wʌyibʌl yic'ot mesa, yic'ot buchlibʌl, yic'ot candil. Che' mi' jijlel ti la cotot, ya' mi mejlel i c'aj i yo, che'en.

¹¹Junyajl che' woli' ñumel Eliseo, tsa poj jal'a cha'an mi' c'aj i yo ba' chajpʌbil.

¹²Eliseo tsi' sube i yaj e'tel i c'aba' Giezi: Pʌyʌ tilel jini x'ixic, che'en. Che' bʌ tsa' pʌjyi jini x'ixic, tsa' tili ba'an jini x'alt'an.

¹³Eliseo tsi' sube jini x'e'tel i cha'an: Suben ili x'ixic: “Wʌle tsa'ix a wen mele ili ñuc bʌ e'tel tic tojlel lojon. Tsa' pʌsbeyon i yutslel a pusic'al. Jini cha'an subeñon lojon chuqui mi mejlel cʌq'ueñet lojon. ¿Am ba chuqui mi mejlel j c'ajtiben lojon jini rey yic'ot jini capitán cha'an soldadojob?” che'en. Jini x'ixic tsi' jac'be: Ma'anic chuqui anto yom c cha'an ti' tojlel c pi'ʌlob, che'en.

¹⁴Eliseo tsi' c'ajtibe Giezi: ¿Chuqui mi mejlel la cʌq'uen? che'en. Giezi tsi' jac'ʌ: Ma'anic i yalobil ili x'ixic. Wen ñoxix i ñoxi'al, che'en.

¹⁵Eliseo tsi' sube Giezi: Cha' pʌyʌ tilel jini x'ixic, che'en. Giezi tsa' cha' majli i pʌy tilel jini x'ixic. Che' bʌ tsa' cha' c'oti, ya' jax tsa' wa'le ya' ti' ti' jini tsalʌl.

¹⁶Eliseo tsi' sube: Che' bajche' ili ora ti yambʌ jab, mi caj a mec' a walobil, che'en. Jini x'ixic tsi' yʌlʌ: Mach a lotiñon, c yum. I winiquet Dios, che'en.

¹⁷Awilan jini x'ixic tsa' caji i cʌntan i yalobil. Tsi' yila pañimil che' bajche' tsi' sube Eliseo.

¹⁸Che' ñuquix jini ch'iton tsa' majli yic'ot i tat ba' woliyob ti c'ajbal.

¹⁹Jini ch'iton tsa' caji i suben i tat: Wen c'uxix c jol. Wen c'ux, che'en. I tat tsi' sube jini x'e'tel i cha'an: Cuchbeñon majlel calobil ba'an i mamá, che'en.

²⁰Tsi' cuchu majlel. I mamá tsi' meq'ue c'ʌlʌl tsa' chañ'a q'uin. Che' xinq'uiñilix, tsa' chʌmi jini ch'iton.

²¹Ti ora jach tsa' letsi majlel jini x'ixic ba'an i wʌyib jini x'e'tel i cha'an lac Yum Dios. Ya' tsi' ñolchoco jini ch'iton. Tsi' ñup'u i ti' tsalʌl. Tsa' loq'ui majlel.

²²Tsi' choco ti pʌyol i ñoxi'al. Tsi' sube: Awocolic chocbeñon tilel winic yic'ot burro. Come mi caj c majlel ti ora cha'an mic pejcan jini x'alt'an i cha'an lac Yum Dios. Mu' jach c cha' sujtel wʌle, che'en.

²³I ñoxi'al tsi' jac'be: ¿Chucoch ma' majlel a q'uel wʌle? Mach i yorajlelic q'uiñijel, mach i yorajlelic c'aj o, che'en. Pero jini x'ixic tsi' yʌlʌ: La' majlicon come che'ʌch yom, che'en.

²⁴Che' chajpʌbilix jini burro tsi' sube jini winic: Conla ti ajñel. Mach yomic ma' cʌy xʌmbal jinto che' mic subeñet, che'en.

²⁵Che' jini tsa' majli jinto tsa' c'oti ya' ba'an i winic Dios ya' ti wits i c'aba' Carmelo. Eliseo tsa' caji i q'uel che' ñajt to i tilel. Ti ora tsi' sube Giezi i yaj e'tel: Ixix tilel jini x'ixic ch'oyol bʌ ti Sunem, che'en.

²⁶Cucu taja tilel. C'ajtiben mi uts'at an yic'ot i ñoxi'al yic'ot i yalobil, che'en. Che' bʌ tsa' c'oti Giezi ba'an jini x'ixic, tsi' c'ajtibe. Jini x'ixic tsi' yʌlʌ: Uts'at cu, che'en.

²⁷Che' bʌ tsa' c'oti ba'an Eliseo, tsi' ñocchoco i bʌ cha'an mi' mec'ben i yoc. Pero tsa' tili Giezi cha'an mi' tic'. Eliseo tsi' sube: La' to ajnic, come wen ch'ijiyem jax i pusic'al. Lac Yum ma'anic tsi' tsictesʌbeyon i wocol, che'en.

²⁸Jini x'ixic tsa' caji ti uq'uel. Tsi' yʌlʌ: ¿Tsa' ba j c'ajtibeyet calobil? ¿Mach ba anic tsac subeyet mach yomic ma' lon aq'ueñon c pijtan jini tijicña bʌ? che'en.

²⁹Eliseo tsi' sube Giezi i yaj e'tel: Chajpan a bʌ cha'an ma' majlel ti ajñel. Ch'ʌmʌ majlel jini c barate' a wic'ot. Mi tsa' taja winic ti bij mach a pejcan. Mi an majqui mi' yʌq'ueñet cortesía ti bij, mach a jac'ben. Che' c'otemetix yom ma' wʌc' jini barate' ti' wut jini ch'iton, che'en.

³⁰I ña' jini ch'iton tsi' sube Eliseo: Ti' c'aba' jini cuxul bʌ lac Yum mic subeñet, wersa ma' majlel quic'ot, che'en. Eliseo tsi' jac'ʌ. Ti ora jach tsa' caji' tsajcan majlel jini x'ixic.

³¹Pero ñaxan tsa' majli i yaj e'tel Eliseo. Tsi' yʌc'ʌ jini barate' ti' wut jini ch'iton, pero ma'anic tsa' cha' cuxtʌyi. Jini cha'an tsa' cha' sujti i taj i yum. Tsi' sube: Ma'anic tsa' cha' ch'ojyi jini ch'iton, che'en.

³²Che' bʌ tsa' c'oti Eliseo, tsi' q'uele ya' sʌts' ñolol i bʌc'tal jini alob ti' wʌyib.

³³Tsa' ochi ya' ba' sʌts'ʌl jini ch'ujlelʌl. Tsi' ñup'u i ti' tsalʌl. Tsi' pejca ti oración lac Yum Dios.

³⁴Tsa' letsi ya' ti wʌyibʌl ba' ñolol jini ch'ujlelʌl. Tsa' pʌcle ti' pam jini ch'iton. Tsi' yʌc'ʌ i yej ba'an i yej. Tsi' yʌc'ʌ i c'ʌb ba'an i c'ʌb jini ch'iton, che' jini tsa' caji ti c'unte' q'uixñan i bʌc'tal jini ch'iton.

³⁵Che' bʌ tsa' ch'ojyi Eliseo, tilel ñumel tsi' cha'le xʌmbal ya' ti mal. Tsa' cha' majli i pʌcchocon i bʌ ti' pam jini ch'iton. Wucyajl tsi' cha'le ja'tsin jini ch'iton. Tsa' cha' cajni i wut.

³⁶Eliseo tsi' pʌyʌ Giezi. Tsi' sube: Pʌyʌx tilel i ña', che'en. Che' jini tsa' majli i pʌy tilel. Che' woli jax to i yochel i ña', Eliseo tsi' sube: Pʌyʌx a walobil, che'en.

³⁷Jini x'ixic tsa' ochi. Tsi' pʌcchoco i bʌ ti lum. Tsi' meq'ue i yalobil. Tsi' pʌyʌ majlel.

³⁸Eliseo tsa' cha' majli ya' ti Gilgal che' woli cabʌl wi'ñal ti jini lum. Ti jump'ejl q'uin che' woli' cʌntesan x'alt'añob, tsi' sube Giezi: Yom ma' ch'ʌm tilel p'ejt cha'an ma' melbeñob chuqui mi' c'uxob jini x'alt'añob, che'en.

³⁹Juntiquil tsa' loq'ui majlel ti cholel cha'an mi' ch'ʌm tilel pimel. Tsi' taja mate'el ch'um. Tsi' tempa ti' pislel. Che' bʌ tsa' c'oti, tsa' caji i bic'ti tsep ya' ti p'ejt, pero ma'anic tsi' ña'ta mach c'uxbilic.

⁴⁰Tsa' caji i yʌc'ob ya' ti mesa cha'an mi' c'uxob jini winicob, pero che' woli to i c'uxob, tsa' caji i subeñob Eliseo: I winiquet Dios, an veneno wʌ' ti p'ejt, che'ob. Ma'anix tsi' chʌn c'uxuyob.

⁴¹Eliseo tsi' subeyob: Ch'ʌmʌla tilel harina, che'en. Tsi' ch'ʌmbeyob tilel. Eliseo tsi' ch'ʌmʌ. Tsi' p'ujp'u ochel ya' ti' mal p'ejt. Tsi' subeyob: Cha' luchula cha'an mi' c'uxob, che'en. Cha' uts'atix jini ch'ujm.

⁴²Ti jump'ejl q'uin tsa' c'oti winic ch'oyol bʌ ti Baal Salisa. Tsi' ch'ʌmbe tilel Eliseo juncujch tsijib to bʌ ixim, yic'ot junc'al pan melbil bʌ ti tsijib harina. Eliseo tsi' sube Giezi: Aq'ueñob i c'ux jini x'alt'añob, che'en.

⁴³Giezi tsi' yʌlʌ: ¿Bajche' mi caj i jastʌyel cha'an mi' c'uxob jo'c'al winicob? che'en. Eliseo tsi' cha' alʌ: Aq'ueñob cha'an mi' c'uxob, come lac Yum tsi' yʌlʌ: “Mi caj i c'uxob ti' pejtelelob. Mi caj i colobajel”, che'en lac Yum. Che' tsi' yʌlʌ Eliseo.

⁴⁴Jini cha'an Giezi tsi' yʌc'ʌ ya' ba' woliyob ti we'el. Ti' pejtelelob tsa' caji' c'uxob. Che' bʌ tsa' ujtiyob ti we'el tsa' colobaji che' bajche' tsi' yʌlʌ lac Yum.