Read Chol 2 Reyob 6 Bible Online

2 Reyob 6 - Chol bible

2 Reyob 6

¹Jini x'alt'añob tsi' subeyob Eliseo: Ch'o'ch'oc jax jini otot ba' mic wʌyel lojon ila ba' chumulonla. Com ma' wʌc' a t'an cha'an mic mel lojon yambʌ. La' majlicon lojon ti Jordán. Yom mic loc' lojon jujunts'ijt te' ti jujuntiquilon lojon cha'an mic mel lojon c chumlib, che'ob. Eliseo tsi' subeyob: Cucula che' jini, che'en.

³Juntiquil tsi' yʌlʌ: Conla quic'ot lojon, a wocolic, che'en. Eliseo tsi' jac'ʌ: Yom cu, mic majlel la' wic'ot, che'en.

⁴Che' bʌ tsa' c'otiyob ya' ti Jordán, tsa' caji i sec'ob jini te'.

⁵Che' woli' sec' te' juntiquil, tsi' t'ʌn colo i jacha. Tsa' pech yajli majlel ti ja'. C'am tsi' cha'le t'an jini winic. Tsi' yʌlʌ: C yum, tsa'ix yajli ochel jacha ti ja'. Mach c cha'anic, c majan jach jini jacha, che'en.

⁶I winic Dios tsi' c'ajtibe: ¿Baqui tsa' ochi? che'en. Jini winic tsa' majli i pʌsben baqui tsa' ochi. Eliseo tsi' tsepe junts'ijt te'. Tsi' choco ochel ba' tsa' yajli jacha. Ti ora jach tsi' ch'uyu letsel jini jacha ti ja'.

⁷Eliseo tsi' sube: Ch'ʌmʌ ti ora, che'en. Jini winic tsi' ch'ʌmʌ.

⁸Jini rey ti Siria tsi' chʌn cha'le guerra ti' contra Israel. I tilel mi' suben i winicob cha'an mi' tempañob i bʌ ya' ba' woli' ña'tan i tech.

⁹Pero i winic Dios tsi' choco ti subentel jini rey ti Israel. Tsi' sube: Mach yomic mi la' ñumel ya'i, come jini siriajob mi caj i c'otelob ya'i, che'en.

¹⁰Jini rey tsi' choco majlel winic cha'an mi' q'uel mi isujm che' bajche' tsi' yʌlʌ Eliseo. Tsi' q'uele isujm. Cha'yajl uxyajl Eliseo tsi' colta jini rey che' bajche' jini.

¹¹Jini rey ti Siria tsi' mele i pusic'al cha'an chuqui woli' yujtel. Tsi' pʌyʌ tilel x'e'telob i cha'an. Tsi' c'ajtibeyob: Juntiquil wʌ' ti lac tojlel an i mul. ¿Majqui woli' mucu pejcan jini israelob? ¿Majqui woli' suben i rey Israel jini woli bʌ c mel? che'en.

¹²Juntiquil x'e'tel i cha'an tsi' jac'ʌ: Mach joñonic lojon. Jini woli bʌ i tsictesʌben i rey Israel chuqui wola' mel, jiñʌch Eliseo ya' bʌ an ti Israel. Pejtel a t'an mu' bʌ a mucu al ti a wotot, Eliseo mi' cha' suben jini rey ti Israel, che'en.

¹³Jini rey ti Siria tsi' sube: Cucula, q'uelela baqui an cha'an cʌchʌl mi la' pʌybeñon tilel, che'en. Tsa' subenti ya'an Eliseo ti Dotán.

¹⁴Jini rey ti Siria tsi' choco majlel cabʌl winicob c'ʌchʌlo' bʌ ti caballo, yic'ot ti carreta, yic'ot cabʌl soldadojob. Tsa' majli i joy mʌctañob jini tejclum che' ti ac'ʌlel.

¹⁵Che' bʌ tsa' sʌc'a pañimil, tsa' ch'ojyi i winic Eliseo. Tsi' can q'uele pañimil. Awilan joyol jini tejclum ti soldadojob, yic'ot cabʌl caballo yic'ot carreta tac. Jini x'e'tel tsi' sube i winic Dios: ¡C yum! ¿Chuqui mi caj lac mel wʌle? che'en.

¹⁶Eliseo tsi' jac'ʌ: Mach a cha'len bʌq'uen, come ñumen cabʌlob jini mu' bʌ i coltañonla che' bajche' i yonlel laj contrajob, che'en.

¹⁷Eliseo tsi' cha'le oración: C Yum, camben i wut c winic cha'an mi' q'uelob, che'en. Lac Yum tsi' cambe i wut i winic Eliseo. Tsa' caji' q'uel, awilan joyolob ti cabʌl c'ajc. Che' yilal tac bajche' caballo yic'ot carreta, pam pujquem ya' ti wits.

¹⁸I soldadojob siriajob tsa' cajiyob ti xʌmbal tilel cha'an mi' yochelob ti Dotán. Eliseo tsi' cha' pejca lac Yum ti oración: C Yum, otsañob ti xpots' ili soldadojob, che'en. Che' jini lac Yum Dios tsi' yotsayob ti xpots' jini soldadojob che' bajche' Eliseo tsi' c'ajtibe.

¹⁹Che' jini Eliseo tsa' caji i subeñob jini soldadojob ch'oyolo' bʌ ti Siria: Mach jinic bij iliyi, mach jinic ili tejclum. Tsajcañonla tilel. Joñon mi caj c pʌyetla majlel ba'an jini winic woli bʌ la' sʌclan, che'en. Che' jini Eliseo tsi' pʌyʌyob majlel ti Samaria.

²⁰Che' bʌ tsa' c'otiyob ti Samaria, Eliseo tsi' sube lac Yum: Cambeñob i wut ili winicob cha'an mi' q'uelob pañimil, che'en. Lac Yum tsi' cambeyob i wut jini winicob. Che' cañal i wut, tsi' q'ueleyob ya' añob ti Samaria.

²¹Jini rey ti Israel tsi' c'ajtibe Eliseo: ¿Yom ba mic tsʌnsañob? che'en.

²²Eliseo tsi' jac'ʌ: Mach yomic. ¿Mu' ba lac tsʌnsan xcʌjchelob che' mi' yujtel guerra? che'en. Wʌle ñusʌbenla waj yic'ot ja'. Chocoyob sujtel ti' lumal, che'en.

²³Jini cha'an tsa' caji i chajpʌbeñob cabʌl chuqui mi' c'uxob. Che' ujtemobix ti we'el ti uch'el, tsi' chocoyob sujtel ti' lumal ba'an i rey. Che' jini ma'anix tsa' chʌn c'otiyob jini siriajob ti guerra ti' contra Israel.

²⁴Che' ti yanto bʌ jab Benadad i rey Siria tsi' tempa bajc'ʌl soldadojob. Tsa' letsiyob tilel ti Samaria cha'an mi' joy mʌctañob jini israelob.

²⁵Ti' caj jini guerra tsa' cajiyob ti cabʌl wi'ñal ya' ti Samaria, come cabʌl q'uin tsi' joy mʌctayob tejclum jini soldadojob. Tsa' laj sʌjli chuqui tac mi' c'uxob. Che' jini tsa'ix caji ti chojñel i jol burro ti lujunc'al i cha'bajc' (600) peso cha'an mi' c'uxob. Tsa' chojni ojlil litro i ta' x'ujcuts ti lujump'ejl i cha'c'al (30) peso.

²⁶Ti jump'ejl q'uin i rey Israel woli' ñumel ya' ti' ñʌc' jini ts'ajc. Juntiquil x'ixic tsi' pʌyʌ. Tsi' sube: Coltañon c rey, che'en.

²⁷Jini rey tsi' yʌlʌ: Mi ma'anic mi' coltañet lac Yum, ¿bajche' mi caj j coltañet joñon? Ma'anic c cha'an vino, ma'anic i bʌl c ñʌc' ja'el.

²⁸¿Chuqui a wom? che'en. Jini x'ixic tsi' yʌlʌ: Ili x'ixic tsi' subeyon: “Pʌyʌ tilel a walobil cha'an mi laj c'ux wʌle. Ijc'ʌl mi caj laj c'ux calobil ja'el”, che'en.

²⁹Jini cha'an tsac ch'ʌxʌ lojon calobil. Tsaj c'uxu lojon. Che' ti yijc'ʌlal tsac sube jini x'ixic: “Pʌyʌx tilel a walobil cha'an mi laj c'ux”, cho'on. Pero jini x'ixic tsi' mucu i yalobil, che'en.

³⁰Jini rey tsi' jet' tsili i bujc che' bʌ tsi' yubi. Jini winicob ya' bʌ añob tsi' q'ueleyob che' bʌ tsi' tsili i bujc. Lʌpʌl i cha'an coxtal ya' ti' mal i bujc jini rey.

³¹Jini rey tsi' yʌlʌ: La' i tsʌnsañon Dios mi ma'anic tsac set' t'ojbe loq'uel i jol Eliseo wʌle, che'en.

³²Ti jim bʌ ora ya' buchul Eliseo ti' yotot yic'ot jini xñoxob ti Israel. Jini rey tsi' choco majlel i winic cha'an mi' pʌy. Pero che' maxto c'otemic jini winic, Eliseo tsi' sube jini xñoxob: Awilan jini stsʌnsa tsi' choco tilel i winic cha'an mi' set' t'ojbeñon c jol. Che' mi' julel jini winic, yom tsʌts ñup'ul i ti' otot. Mach la' wʌc' ti ochel, come tal i yum ti' pat, che'en Eliseo.

³³Che' woli to ti t'an Eliseo, tsa' c'oti jini winic. Ti wi'il pat tsa' tili jini rey. Mich' tsi' cha'le t'an jini rey. Tsi' yʌlʌ: Ch'oyol ti lac Yum pejtelel ili wocol. Lolom jach mic chʌn pijtan j coltʌntel ti' tojlel lac Yum, che'en.