Read Chol 2 Reyob 8 Bible Online

2 Reyob 8 - Chol bible

2 Reyob 8

¹Eliseo tsi' sube i ña' jini ch'iton tsa' bʌ cha' cuxtiyi: Pʌyʌ majlel a pi'ʌlob. Yom ma' majlel ti chumtʌl ba' uts'at ma' q'uel pañimil, come lac Yum mi caj i choc tilel wi'ñal. Wucp'ejl jab mi caj i jal'an, che'en.

²Jini cha'an jini x'ixic tsi' mele che' bajche' tsi' sube i winic Dios. Tsi' pʌyʌ majlel i pi'ʌlob. Wucp'ejl jab tsa' chumleyob ya' ti' lum filisteojob.

³Che' ñumeñix wucp'ejl jab, tsa' cha' tili jini x'ixic ti' lumal. Tsa' majli i pejcan jini rey cha'an mi' cha' ch'ʌm ti' wenta i yotot yic'ot i lum tsa' bʌ i cʌyʌ.

⁴Che' bʌ tsa' ochi jini x'ixic ba'an rey, ya' woli ti t'an jini rey yic'ot Giezi i winic Eliseo. Jini rey woli' c'ajtiben Giezi: Subeñon pejtelel chuqui tac ñuc tsi' mele Eliseo, che'en.

⁵Che' woli to i suben bajche' tsi' cha' teche jini ch'iton tsa' bʌ chʌmi, awilan tic'ʌl tsa' c'oti i ña' jini ch'iton tsa' bʌ cha' aq'uenti i cuxtʌlel. Jini cha'an jini Giezi tsi' yʌlʌ: C yum rey, jiñʌch i ña' jini ch'iton tsa' bʌ i cha' teche Eliseo, che'en.

⁶Jini rey tsi' c'ajtibe jini x'ixic: ¿Isujm ba tsa' cha' aq'uenti i cuxtʌlel a walobil? che'en. Isujm cu, che'en jini x'ixic. Jini rey tsi' pʌyʌ tilel juntiquil i yaj e'tel. Tsi' sube cha'an mi' cha' aq'uen i lum jini x'ixic yic'ot i pʌc'ʌb yic'ot pejtelel chuqui an i cha'an.

⁷Ti wi'il Eliseo tsa' majli ti Damasco, colem tejclum ti Siria. Ti jim bʌ ora tsa' c'am'a Benadad rey bʌ ti Siria. Tsa' subenti jini rey c'otemix Eliseo.

⁸Jini rey tsi' sube Hazael: Cucu ch'ʌmben majlel i majtan i winic Dios. Suben cha'an mi' c'ajtiben i Yum mi mu'to c lajmel ti ili c'amʌjel, che'en.

⁹Hazael tsi' ch'ʌmbe majlel cabʌl i majtan, wen uts'at bʌ ti chajp ti chajp loq'uem bʌ ti Damasco. Tsi' pʌyʌ majlel cha'c'al camello yic'ot i cuch. Che' jini tsa' c'oti ba'an Eliseo. Tsi' sube: A walobil Benadad rey bʌ ti Siria tsi' chocoyon tilel cha'an mij c'ajtibeñet mi mu'to i lajmel ti jini c'amʌjel woli bʌ i yubin. Che' tsi' yʌlʌ Hazael.

¹⁰Eliseo tsi' yʌlʌ: Cucu suben: “Mu' cu caj a lajmel”, che'et. Pero c Yum tsa'ix i subeyon mi caj i wersa chʌmel, che'en jini Eliseo.

¹¹I winic Dios tsa' caji i t'ojt'oj q'uelben i wut Hazael. Che' jini tsa' caji ti chʌc'an i wut Hazael. Tsa' caji ti uq'uel Eliseo.

¹²Tsi' yʌlʌ Hazael: C yum, ¿chucoch ma' cha'len uq'uel? che'en. Eliseo tsi' yʌlʌ: Come cujil mi caj a tic'lan jini israelob. Mi caj a pulben wen melbil bʌ i yototob. Mi caj a tsʌnsʌbeñob ch'iton bʌ i yalobilob. Mi caj a pajq'uiñob ti xajlel jini alobob. Mi caj a p'o'ob jini x'ixicob cʌntʌbilo' bʌ i cha'an i yalobil, che'en.

¹³Hazael tsi' jac'ʌ: ¿Ts'i'on ba cha'an mic mel che' bajche' jini? che'en. Eliseo tsi' yʌlʌ: Lac Yum tsi' subeyon mi caj a wochel ti rey ti Siria, che'en.

¹⁴Tsa' cha' sujti Hazael ba'an i yum. Jini rey Benadad tsi' c'ajtibe: ¿Chuqui tsi' subeyet Eliseo? che'en. Hazael tsi' yʌlʌ: Tsi' subeyon mi caj a lajmel, che'en.

¹⁵Pero che' ti yijc'ʌlal Hazael tsi' ch'ʌmʌ jump'ejl tsuts. Tsi' ts'aja ti ja'. Tsi' mʌcbe i wut Benadad jinto tsa' chʌmi. Che' jini tsa' caji ti yumʌntel Hazael.

¹⁶Che' woli' majlel ti jo'p'ejl jab i yumʌntel Joram i yalobil Acab ya' ti Israel, tsa' caji i tech i yumʌntel yambʌ Joram i yalobil bʌ Josafat ya' ti Judá.

¹⁷Anix lajchʌmp'ejl i cha'c'al i jabilel jini Joram che' bʌ tsa' caji i tech i yumʌntel. Waxʌcp'ejl jab tsi' cha'le yumʌl ya' ti Jerusalén.

¹⁸Pero lajal tsi' mele che' bajche' Acab, che' bajche' yaño' bʌ reyob ti Israel, come tsi' pʌybe xch'oc bʌ i yalobil Acab. Tsi' cha'le jontolil ti' wut lac Yum.

¹⁹Anquese jontol i melbal Joram, lac Yum ma'anic tsi' jisa Judá, come c'ajal i cha'an chuqui tsi' sube David cha'an mi caj i cʌntan i p'olbal ti pejtelel ora.

²⁰Che' ti yorajlel i yumʌntel Joram, tsa' caji i chañ'esañob i bʌ jini año' bʌ ti Edom. Tsi' cʌyʌyob i yuman jini rey ti Judá. Tsa' caji' bajñel wa'chocoñob i rey.

²¹Jini cha'an Joram tsa' c'axi ti Jordán cha'an mi' tech guerra ti' contra Zair. Pero jini soldadojob ch'oyolo' bʌ ti Edom ti ora jach tsi' joy mʌctayob Joram. Che' ti ojlil ac'ʌlel tsa' mejli ti cha' c'axel ñumel jini Joram yic'ot i soldadojob. Che' jini tsa' loq'uiyob ba'an i contrajob. Pero i soldadojob Joram tsi' cʌyʌyob. Tsa' puts'iyob.

²²Jini cha'an c'ʌlʌl wʌle ma'anix woli' yumañob Judá jini año' bʌ ti Edom. Ti jim bʌ ora Libna tsi' cʌyʌ i yuman Judá ja'el.

²³Ts'ijbubil ti' jun i reyob Judá pejtelel yan tac bʌ i melbal jini Joram.

²⁴Tsa' chʌmi Joram. Tsa' mujqui ya' ba' mucul i ñojte'elob ya' ti' tejclum David, jiñʌch Jerusalén. Che' ti' lajchʌmp'ejlel jab i yumʌntel Joram i yalobil bʌ Acab jini rey ti Israel, tsa' ochi ti rey Ocozías i yalobil Joram rey bʌ ti Judá.

²⁶Anix cha'p'ejl i cha'c'al (22) i jabilel Ocozías che' bʌ tsa' caji i tech i yumʌntel. Jump'ejl jach jab tsi' cha'le i ye'tel ya' ti Jerusalén. I c'aba' i ña' jiñʌch Atalía, i buts jini Omri rey bʌ ti Israel.

²⁷Wen jontol jini Ocozías. Tsi' mele che' bajche' pejtelel i p'olbal Acab, come tsi' cha'le ñujpuñijel yic'ot i yixic'al Acab.

²⁸Ocozías tsi' laja i t'an yic'ot Joram jini rey ti Israel cha'an comol mi' majlelob ti guerra ti' contra Hazael rey bʌ ti Siria. Tsi' cha'leyob guerra ya' ti Ramot am bʌ ti Galaad. Jini siriajob tsi' lowoyob Joram.

²⁹Tsa' majli Joram ti Jezreel cha'an mi' ts'ʌcʌntel. Che' ya'an Joram ti Jezreel, Ocozías jini rey ti Judá tsa' majli i jula'tan, come i ja'an.