Read Chol 1 Cronicas 16 Bible Online

1 Cronicas 16 - Chol bible

1 Cronicas 16

¹Tsi' ch'ʌmʌyob tilel jini Arca i cha'an bʌ lac Yum. Tsi' yotsayob ti Tabernáculo chajpʌbil bʌ i cha'an David. Ya'i tsi' pulbeyob tsʌnsʌbil bʌ i majtan tac Dios. Tsi' yʌq'ueyob ja'el majtañʌl tac cha'an i tijicñʌyel i pusic'al.

²Che' ujtemix i yʌc' pejtelel jini majtañʌl tac, David tsi' yʌq'ueyob i yutslel i t'an pejtelel jini winicob ti' c'aba' lac Yum.

³Tsa' caji i pucbeñob jujump'ejl caxlan waj pejtelel winicob x'ixicob. Che' ja'el tsi' yʌq'ueyob we'elʌl yic'ot tiquin bʌ ts'usub.

⁴David tsi' wa'choco yajcʌbil bʌ levíjob cha'an mi' yʌq'ueñob wocolix i yʌlʌ lac Yum i Dios Israel ya' ti' tojel jini Arca i cha'an bʌ lac Yum, cha'an mi' c'ajtibeñob Dios i yutslel i t'an ti' tojlel winicob x'ixicob.

⁵Jini Asaf jiñʌch i yum jini yujilo' bʌ música. Jini mu' bʌ i coltañob jiñʌch iliyi: Zacarías, Jeiel, Semiramot, Jehiel, Matatías, Eliab, Benaía, Obed Edom, Jeiel. Tsi' ñijcayob salterio yic'ot arpa. Jini Asaf tsi' ñijca címbalo.

⁶Che' ja'el jini motomaj Benaía yic'ot Jahaziel tsi' wusuyob trompeta ti' tojel jini Arca i cha'an bʌ lac Yum.

⁷Ti jim bʌ ora David tsa' caji i yʌc' ti c'ʌyintel coro tac ti Tabernáculo cha'an mi' c'ʌyibeñob wocolix i yʌlʌ lac Yum. Asaf tsi' pʌsbeyob c'ay jini motomajob cha'an mi' tem cha'leñob c'ay.

⁸Subenla wocolix i yʌlʌ lac Yum, pejcanla ti' c'aba'. Pucbenla i melbal lac Yum ya' ti' tojlel winicob x'ixicob ti pejtelel colem tejclum.

⁹Cha'lenla c'ay ti' tojlel lac Yum. C'ʌyibenla i ñuclel. Subula pejtelel jini ñuc bʌ i melbal.

¹⁰Ñuq'uesan la' pusic'al cha'an ch'ujul i c'aba' lac Yum. Yom tijicña mi' yubiñob jini mu' bʌ i sajcañob lac Yum.

¹¹Sajcan lac Yum am bʌ i p'ʌtʌlel. Ñochtanla ti pejtelel ora.

¹²Ña'tʌbenla i yejtal tac i p'ʌtʌlel, jini bʌbʌq'uen tac bʌ Tsa' bʌ i mele yic'ot jini t'an tsa' bʌ i yʌc'ʌ ti' contra egiptojob.

¹³Jatetla i p'olbaletla Abraham i winic lac Yum. I yalobiletla Jacob, i yajcʌbaletla Dios.

¹⁴Jiñʌch lac Yum Dios, i Yumʌch winicob x'ixicob ti pejtelel pañimil.

¹⁵Ti pejtelel ora ña'tʌbilix i cha'an i t'an tsa' bʌ i yotsa ti trato, Jini t'an tsa' bʌ i subeyob winicob x'ixicob yic'ot i yalobilob ti lajm ti lajm cha'an mi' chʌn ña'tañob ti pejtelel ora.

¹⁶Jiñʌch tsa' bʌ i yʌq'ue Abraham, jini xuc'ul bʌ t'an tsa' bʌ i yʌq'ue Isaac,

¹⁷Jini jach bʌ t'an tsa' bʌ i yʌq'ue Jacob ti mandar. Mach jilic ti pejtelel ora jini xuc'ul bʌ i t'an lac Yum aq'uebil bʌ Israel.

¹⁸Tsi' yʌlʌ lac Yum: “Mi caj cʌq'ueñet i lumal Canaán cha'an a cha'añʌch”, che'en.

¹⁹Che' maxto cabʌlic lac pi'ʌlob, che' ñumel jach tsa' ñumiyob ya'i, come mach i cha'añobic jini lum,

²⁰Tsi' cha'leyob xʌmbal ñumel ti jujump'ejl colem tejclum. Tsa' loq'uiyob ti jump'ejl colem tejclum, tsa' cha' ochiyob ti yambʌ.

²¹Lac Yum Dios ma'anic tsi' yʌc'ʌyob ti tic'lʌntel, Tsi' tiq'ui reyob tsa' bʌ i ñaxan tic'layob.

²²Tsi' yʌlʌ: “Mach mi la' mʌctan jini yajcʌbilo' bʌ c cha'an, Mach mi la' tic'lan jini x'alt'añob c cha'an”, che'en.

²³C'ʌyinla lac Yum pejtelel añet bʌ la ti pañimil. Subula ti jujump'ejl q'uin bajche' mi' coltañonla.

²⁴Subula i ñuclel lac Yum ti' tojlel winicob x'ixicob ti pejtelel pañimil. Subula jini uts'at bʌ i melbal ti' tojlel pejtelel winicob x'ixicob.

²⁵Come ñucʌch lac Yum, yom mi' wen sujbel i ñuclel. Yom mi lac wen bʌc'ñan Dios ñumen bajche' mi' bʌc'ñʌntelob dioste' tac.

²⁶Come dioste' jach pejtelel i dios tac winicob x'ixicob mach bʌ anic mi' cʌñob Dios. Pero lac Yum tsi' mele panchan.

²⁷Cabʌlʌch i c'uxbintel yic'ot i ñuclel ti' tojel i wut. I t'ojol jax jini ch'ujul bʌ i yajñib ba' mi' pʌs i p'ʌtʌlel.

²⁸Ch'ujutesanla lac Yum pejtel winicob x'ixicob ti jujunmojtetla. Subenla i ñuclel yic'ot i p'ʌtʌlel.

²⁹Subenla i ñuclel i c'aba' lac Yum che' bajche' yom mi' subentel. Ch'ʌmbenla tilel i majtan, ochenla ti' pam i yotot. Ch'ujutesanla lac Yum ti sʌq'uesʌbil bʌ la' pusic'al.

³⁰Yom tsiltsilñayetla ti' tojlel lac Yum pejteletla añet bʌ la ti pañimil. Wa'chocobilix jini pañimil, mach mejlic ti ñijcʌntel.

³¹La' i yubin tijicña jini panchan, la' i yubin tijicña jini pañimil. Subula ti' tojlel jini sajtemo' bʌ: “Mi' cha'len yumʌl lac Yum”.

³²La' i cha'len c'am bʌ t'an jini colem ñajb yic'ot i bʌl. Yom tijicña jini cholel yic'ot pʌc'ʌbʌl.

³³Pejtelel jini te'el ti jujuntejc mi' cajel ti c'ay yilal ti' tojlel lac Yum, come tal i melob jini año' bʌ ti pañimil.

³⁴Subenla wocolix i yʌlʌ lac Yum, come uts'atʌch. Come mach jilic i yutslel ti pejtelel ora.

³⁵C Yum Dios lojon, coltañon lojon. Tempañon lojon loq'uel ba' chuculon lojon ti yan tac bʌ lum, Cha'an mic subeñet lojon wocolix a wʌlʌ come ch'ujul a c'aba', Cha'an mi' ñuc'an lojon c pusic'al che' mic sub lojon a ñuclel.

³⁶C Yum, la' ch'ujutesʌntiquet c'ʌlʌl ti pejtelel ora. I Diosetʌch israelob mach bʌ anic a cajibal mi a jilibal. Che' tsi' cha'leyob c'ay. Tsi' yʌlʌyob, Amén, pejtelel winicob x'ixicob. Tsi' subuyob i ñuclel lac Yum.

³⁷David tsi' wa'choco cʌytʌl Asaf temel yic'ot i pi'ʌlob cha'an mi' chʌn q'uelob ti jujump'ejl q'uin chuqui tac yom melol ya' ti Tabernáculo.

³⁸Tsa' wa'choconti ja'el Obed Edom (i yalobil Jedutún) yic'ot Hosa, yic'ot waxʌctiquil i chʌnc'al (68) i pi'ʌlob cha'an mi' cha'leñob cʌñʌn.

³⁹Tsi' chʌn ch'ujutesayob lac Yum ya' ti ñoxi' Tabernáculo am bʌ ti Gabaón. David tsi' cʌyʌ ya'i jini motomaj Sadoc, yic'ot i pi'ʌlob ti motomajiyel cha'an mi' melbeñob i ye'tel lac Yum.

⁴⁰Jiñobʌch mu' bʌ i tsʌnsañob alʌc'ʌl cha'an mi' pulbeñob i majtan lac Yum ti pulʌntib ti jujump'ejl sʌc'ajel yic'ot ti ic'ajel che' bajche' lac Yum tsi' wʌn subeyob israelob ti mandar.

⁴¹David tsi' wa'choco Hemán, yic'ot Jedutún, yic'ot cha'tiquil uxtiquil yaño' bʌ cha'an mi' yʌq'ueñob wocolix i yʌlʌ lac Yum cha'an i c'uxbiya yic'ot i yutslel i t'an am bʌ ti pejtelel ora.

⁴²Tsi' ñijcayob trompeta tac yic'ot címbalo tac che' bʌ tsi' cha'leyob c'ay. Tsa' wa'chocontiyob ti xcʌntayajob i yalobilob Jedutún.

⁴³Che' jini pejtelel jini israelob tsa' cajiyob ti sujtel ti' yotot. David tsa' cha' sujti majlel ti' yotot cha'an mi' yʌq'ueñob i yutslel i t'an i pi'ʌlob.