Read Chol 1 Cronicas 17 Bible Online

1 Cronicas 17 - Chol bible

1 Cronicas 17

¹Che' ya'ix chumul David ti' yotot, tsa' caji i suben jini x'alt'an Natán: Joñon chumulon ti otot melbil bʌ ti ch'ujte', pero jini Arca i yejtal bʌ i trato lac Yum an jach ti pisil bʌ otot, che'en.

²Che' jini Natán tsi' sube: Uts'at ma' mel pejtelel chuqui woli a ña'tan, come an a wic'ot lac Yum, che'en.

³Ti jini jach bʌ ac'ʌlel lac Yum tsi' sube Natán:

⁴Yom ma' suben c winic David: “Jatet ma'anic mi caj a wa'chocobeñon cotot cha'an mic cha'len chumtʌl.

⁵Come che' bʌ tsac loc'sa jini israelob ti Egipto c'ʌlʌl wʌle ma'anic ba' ora tsa' chumleyon ti otot. Cojach tsa' ajniyon ti pisil bʌ otot.

⁶Baqui jach tsa' ñumiyon quic'ot jini israelob, ma'anic ba' ora tsac sube mi juntiquilic i yum jini israelob cha'an mi' melbeñon c Templo ti ch'ujte'. Joñon tsac wa'chocoyob cha'an mi' cʌntañob c tejclum Israel”, che'en.

⁷Yom ma' suben c winic David: “Lac Yum am bʌ ti panchan woli' yʌl: Joñon tsac pʌyʌyet che' xcʌnta tiñʌme'et cha'an ma' wochel ti yumʌl ti' tojlel c tejclum Israel.

⁸Ti pejtelel ora tsa' chʌn ajniyon a wic'ot baqui jach tsa' ñumiyet. Pejtelel a contrajob tsac jisayob ti a tojlel. Mi caj cʌc' ti q'uejlel ti ñuc a c'aba' che' bajche' i c'aba' jini ñuco' bʌ ti pañimil.

⁹Che' ja'el mi caj cʌq'ueñob i lum jini israelob ba' mi' chumtʌlob ti pejtelel ora. Ma'anix mi caj i chʌn loq'uelob. Ma'anix mi caj i chʌn jisʌntelob cha'an jontol bʌ tejclum tac che' bajche' ti yambʌ ora,

¹⁰c'ʌlʌl che' bʌ tsi' cha'leyob i ye'tel jini juezob. Mi caj c jisʌbeñob i p'ʌtʌlel pejtelel a contrajob. Mic subeñet ja'el mi caj c wa'chocobeñet a p'olbal cha'an mi' yochelob ti rey.

¹¹Che' ma' chʌmel, mi caj c wa'chocon juntiquil a walobil cha'an mi' ch'ʌm a yumʌntel.

¹²Jini mi caj i wa'chocobeñon cotot. Mi caj c wa'chocoben i yumʌntel c'ʌlʌl ti pejtelel ora.

¹³Mi caj i tatiñon. Mi caj i yochel ti calobil. Ma'anic ba' ora mi caj c wis cʌye' che' bajche' tsaj cʌyʌ Saúl.

¹⁴Ti pejtelel ora mi caj c buchchocon ti cotot. Ma'anic i yujtibal i ye'tel mu' bʌ caj cʌq'uen. Ti pejtelel ora mi caj i yajñel i yumʌntel”. Che' tsi' yʌlʌ lac Yum, che'en Natán.

¹⁵Natán tsi' cha' sube David pejtelel chuqui tsa' subenti ti lac Yum.

¹⁶Che' jini tsa' ochi majlel ti mal i yotot lac Yum jini rey David. Tsa' caji i pejcan Dios ti oración: C Yum Dios, ¿chuqui to que'tel, yic'ot chuqui to i c'ʌjñibal c pi'ʌlob cha'an tsa' wʌq'ueyon pejtelel iliyi? che'en.

¹⁷Wen ñuc jini tsa'ix bʌ a mele tic tojlel. Pero jini tsa' bʌ a subeyon ñumen ñuc che' bajche' tsa'ix bʌ a mele. Che' ja'el c Yum Dios, tsa' wʌlʌ mi caj i yochelob ti rey c p'olbalob.

¹⁸C Yum, ¿chuqui to mi mejlel cʌl? A wujil ma'anic j c'ʌjñibal. Pero tsa'ix a wʌq'ueyon c ñuclel.

¹⁹Tsa'ix a wʌq'ueyon pejtelel ili c ñuclel, cha'an ti' caj tsa' wen c'uxbiyon, cha'an che'ʌch a wom.

²⁰C Yum, ma'anic yambʌ lajal bʌ bajche' jatet. Ma'anic yambʌ Dios ti pañimil. Ma'anic ba' tsa cubi lojon yambʌ.

²¹¿Am ba yambʌ tejclum ti pañimil che' bajche' a tejclum Israel? Tsa'ix a pʌyʌyob loq'uel ti Egipto cha'an ma' wʌc' ti tsictiyel a p'ʌtʌlel ti' tojlelob. Tsa'ix a jisayob jini año' bʌ ti Canaán che' bʌ tsa' chajpʌbeyob i tejclum a cha'año' bʌ.

²²Jatet tsa' wa'choco a tejclum Israel cha'an mi' yochel ti a tejclum ti pejtelel ora. Jatet c Yum tsa'ix ochiyet ti' Dios.

²³Jini cha'an wʌle c Yum, yom ma' ts'ʌctesan jini t'an tsa' bʌ a subeyon yic'ot c p'olbal cha'an mic cha'len lojon yumʌntel. La' ujtic che' bajche' tsa' wʌlʌ.

²⁴La' chʌn ñuq'uesʌntic a c'aba' ti pejtelel ora, cha'an mi' chʌn subob: “I Yum panchan jiñʌch i Dios israelob”, che'ob. Jini cha'an la' chʌn ajnic ti uts'at ti a wut jini calobilob yic'ot c p'olbalob.

²⁵Wʌle ti' xuc'tʌlel c pusic'al mic pejcañet ti oración, come jatet c Yum tsa' subeyon mi caj a wʌc' ti q'uejlel ti ñuc jini c p'olbal.

²⁶Jini cha'an c Yum, jatet Diosetʌch tsa' bʌ a subeyon ili t'an.

²⁷La' aq'uenticob i yutslel a t'an c p'olbalob ti pejtelel ora. Come che' ma' wʌc' i yutslel a t'an mi' yajñel c'ʌlʌl ti pejtetel ora. Che' tsi' cha'le oración David.