Read Chol 1 Cronicas 18 Bible Online

1 Cronicas 18 - Chol bible

1 Cronicas 18

¹Che' ujtemix pejtelel iliyi, David tsi' jisa jini filisteojob. Tsa' ochiyob ti' wenta yic'ot jini tejclum Gat yic'ot i soldadojob.

²Che' ja'el tsa' ochiyob ti' wenta David jini año' bʌ ti Moab. Pejtelel jini moabob tsa' caji i cha'leñob tojoñel ti' tojlel David.

³Che' bʌ woli to i majlel ya' ti tojel Eufrates jini rey Hadadezer cha'an mi' ch'ʌm jini tejclum ya' ti' t'ejl jini ja' i c'aba' Eufrates, David tsi' chilbe i lum Hadadezer.

⁴David tsi' ch'ʌmbe jump'ejl mil carreta, yic'ot wucp'ejl mil soldadojob c'ʌchʌlo' bʌ ti caballo, yic'ot junc'al mil soldadojob mach bʌ c'ʌchʌlobic. David tsi' yʌc'ʌ ti tsepol i chijil i ya' jini caballo tac woli bʌ i tujc'an majlel carreta. Cojach tsi' cʌyʌ lujunc'al caballo cha'an mi' c'ʌn.

⁵Che' bʌ tsa' tiliyob jini siriajob ti Damasco cha'an mi' coltañob Hadadezer ti guerra, David tsi' tsʌnsa cha'tiquil i cha'c'al mil (22,000) soldadojob.

⁶Tsi' wa'choco xcʌntayajob ti Damasco am bʌ ti Siria. Che' jini, tsa' ochiyob jini siriajob ti' wenta David. Tsa' caji i yʌq'ueñob i tojoñel. Come lac Yum tsi' wen colta David baqui jach tsa' ñumi.

⁷David tsi' chilbeyob i mʌctijibob melbil bʌ ti oro woli bʌ i c'ʌñob i winicob Hadadezer. Tsi' c'ʌlʌ ch'ʌmʌ c'otel ti Jerusalén.

⁸David tsi' ch'ʌmʌ tilel ja'el cabʌl bronce loq'uem bʌ ti Tibhat yic'ot ya' ti Cun, i tejclum tac jini Hadadezer. (Ti wi'il bʌ ora Salomón tsi' c'ʌñʌ ili bronce cha'an mi' mel i yajñib ja' yic'ot i yoyel Templo, yic'ot e'tijibʌl tac.)

⁹Tsa' caji' yubin Toi i rey jini año' bʌ ti Hamat che' ch'ʌmbilob ti' wenta David jini soldadojob i cha'an Hadadezer.

¹⁰Tsi' choco majlel i yalobil i c'aba' Adoram ba'an jini rey David cha'an mi' majlel i yʌq'uen cortesía yic'ot i yutslel i t'an. Tsi' chocbe majlel cabʌl i majtan tac melbil bʌ ti oro yic'ot ti plata yic'ot bronce.

¹¹Jini rey David tsi' yʌq'ue ti' wenta lac Yum pejtelel iliyi yic'ot jini oro tac yic'ot jini plata tac tsa' bʌ i taja ti Edom, yic'ot ti Moab yic'ot Amón, yic'ot i lumal filisteojob yic'ot i lumal Amalec.

¹²Mach jinic jach, pero jini Abisai (i yalobil Sarvia) tsi' jisa waxʌclujump'ejl mil (18,000) edomob ya' ti joctʌl i c'aba' Ats'am.

¹³Tsi' wa'choco xcʌntayajob ti pejtelel Edom. Jini idumeojob tsa' caji i yʌq'ueñob i tojoñel David, come lac Yum tsi' wen colta David baqui jach tsa' ñumi.

¹⁴David tsi' cha'le i yumʌntel ti pejtelel Israel. Toj tsa' caji i cha'len meloñel ti' tojlel winicob.

¹⁵Jini Joab (i yalobil Sarvia) tsa' ochi ti' yum soldadojob. Josafat (i yalobil Ahilud) tsa' ochi ti sts'ijbujel.

¹⁶Sadoc (i yalobil jini Ahitob), yic'ot Abimelec (i yalobil Abiatar) tsa' ochiyob ti motomaj. Savsa tsa' ochi ti x'e'tel i cha'an rey.

¹⁷Benaía (i yalobil Joiada) i yumʌch jini cereteojob yic'ot jini peleteojob tsa' bʌ ochiyob ti xcʌntayajob i cha'an rey. I yalobilob rey David tsa' aq'uentiyob ñuc bʌ i ye'tel cha'an mi' coltañob i tat.