Read Chol 1 Cronicas 19 Bible Online

1 Cronicas 19 - Chol bible

1 Cronicas 19

¹Che' bʌ tsa' chʌmi Nahas i rey jini amoñob, tsa' caji i tajben i ye'tel i yalobil i c'aba' Hanún.

²David tsi' yʌlʌ: Mi caj c pʌsben i yutslel c pusic'al Hanún, come wen c'uxatax tsa cubi lojon c bʌ yic'ot i tat, che'en. Che' jini David tsi' choco majlel x'e'telob i cha'an, cha'an mi' ñuq'uesʌbeñob i pusic'al i yalobil Nahas. Pero che' bʌ tsa' c'otiyob i winicob David (ti' lumal Amón ba'an jini Hanán), jini ñuco' bʌ i ye'tel i cha'an Hanún tsa' caji i subeñob: Mach a lon ñopben i t'an David. ¿C'ux ba mi' yubin a tat? Ma'anic tsi' choco tilel i winicob cha'an mi' ñuq'uesʌbeñet a pusic'al. Tsa' jach tiliyob che' bajche' xyojch'ob cha'an mi' tsajiñob jini pañimil wʌ' ba' chumulonla, che'ob.

⁴Jini cha'an Hanún tsa' caji i tsepbeñob i tsucti' i winicob David. Tsi' t'ox tsepbeyob i pislel c'ʌlʌl jaxʌl ti' ya'. Che' jini tsi' cha' chocoyob sujtel.

⁵Che' bʌ tsi' yubi David chuqui tsa' ujti, tsi' chocbeyob majlel xtajoñelob tsa' bʌ c'oti i tajob. Tsi' subeyob cʌytʌl ya' ti Jericó jinto mi' cha' colelob i tsucti', come quisintic tsi' yubiyob.

⁶Che' bʌ tsi' ña'tayob jini amoñob yic'ot jini rey Hanún, wen mich' David cha'an chuqui tsi' tumbeyob i winicob, tsi' chocoyob majlel taq'uin ti Mesopotamia, yic'ot ti Siria, yic'ot ti Maaca, yic'ot ti Soba, bajc'ʌl plata am bʌ i tojol ti 25 millón peso cha'an mi' c'ajtiñob i coltʌntel ti guerra. Tsi' c'ajtiyob tilel soldadojob, yic'ot carreta tac, yic'ot c'ʌchʌlo' bʌ ti caballo.

⁷Che' jini tsa' c'otiyob lajchʌmp'ejl i cha'c'al mil (32,000) carreta yic'ot pejtelel i soldadojob jini rey Maaca. Tsa' majliyob ti jijlel ya' ti joctʌl i c'aba' Medeba. Ya' tsa' much'leyob ja'el i soldadojob Hanún loq'uemo' bʌ ti tejclum tac.

⁸Che' bʌ tsi' yubi David, tsi' choco majlel Joab yic'ot pejtelel jini ch'ejlo' bʌ soldadojob i cha'an.

⁹Tsa' c'oti i tajob che' woli' tilelob i soldadojob amoñob ti' contra. Tsa' caji i techob jini guerra ya' ti' ti' tejclum i c'aba' Medeba. Jini reyob tsa' bʌ tili i coltañob Hanún ya' tsa' much'leyob ti jamil lʌc'ʌl ti Medeba.

¹⁰Joab tsi' q'uele i contrajob ti' tojel i wut yic'ot ti' pat. Tsa' caji i t'ox i soldadojob. Tsi' choco majlel junmojt cha'an mi' cha'leñob guerra ti' contra jini siriajob.

¹¹Joab tsi' yʌq'ue ti' wenta Abisai i yeran lamital jini israelob. Tsi' subeyob cha'an mi' cha'leñob guerra yic'ot jini amoñob.

¹²Tsi' yʌlʌ: Mi ñumen p'ʌtʌlob jini siriajob tic tojlel, la' coltañon, pero mi ñumen tsa' caji i mʌlob jini amoñob ti a tojlel, mi caj j coltañet.

¹³Yom ch'ejlet. La' lac cha'len wersa cha'an mi laj coltan lac tejclum, jiñʌch i tejclum lac Yum. La' i mel lac Yum che' bajche' yom. Che' tsi' yʌlʌ Joab.

¹⁴Che' jini Joab tsi' bej xʌñʌ majlel ba'an jini siriajob cha'an mi' jisañob ti guerra. Pero pejtelel jini siriajob tsi' chucuyob majlel i puts'el.

¹⁵Jini amoñob che' bʌ tsi' q'ueleyob tsa'ix puts'iyob jini siriajob, tsa' majliyob ti puts'el ja'el ti jini jach bʌ tejclum. Che' jini tsa' cha' sujtiyob ti Jerusalén Joab yic'ot i yeran yic'ot pejtelel i soldadojob.

¹⁶Jini siriajob che' bʌ tsi' q'ueleyob tsa'ix yajliyob ti' c'ʌb jini israelob, tsi' chocoyob ti pʌyol yaño' bʌ soldadojob año' bʌ ti junwejl colem ja' i c'aba' Eufrates ba' mi' pasel q'uin. Jini Sofac jiñʌch i yum i soldadojob Hadadezer.

¹⁷Che' bʌ tsi' yubi David, tsi' choco ti wejts'el pejtelel israelob. Tsa' c'axiyob ti junwejl Jordán ja' jini israelob. Tsa' caji i cha'leñob guerra yic'ot jini siriajob. David tsi' cha' puts'tesayob majlel jini siriajob. Jini israelob tsi' tsʌnsayob wucp'ejl mil soldadojob c'ʌchʌlo' bʌ ti carreta, yic'ot cha'c'al mil winicob woli bʌ i xʌñob ti' yoc. Che' ja'el tsi' tsʌnsa Sofac i yum jini soldadojob.

¹⁹Jini siriajob i winicob Hadadezer tsi' q'ueleyob wolix i jisʌntelob. Tsi' pejcayob David cha'an yomix mi' cʌyob jini guerra. Tsa' ochiyob ti' winic David. Jini cha'an jini siriajob ma'anix tsi' chʌn coltayob jini amoñob ti guerra.