Read Chol 1 Cronicas 23 Bible Online

1 Cronicas 23 - Chol bible

1 Cronicas 23

¹Che' cabʌlix i jabilel jini David, tsi' wa'choco ti rey ti Israel i yalobil i c'aba' Salomón.

²Tsi' tempa pejtelel jini ñuc taco' bʌ i ye'tel ti Israel, yic'ot jini motomajob yic'ot jini levíjob.

³Tsa' cajiyob ti tsijquel jini levíjob añobix bʌ lujump'ejl i cha'c'al jab yic'ot ñumeñobix bʌ ti lujump'ejl i cha'c'al jab. Ti pejtelel añob waxʌclujuntiquil i cha'c'al mil (38,000).

⁴Ti' tojlelob mi caj i loq'uelob chʌntiquil i cha'c'al mil (24,000) cha'an mi' q'uelob jini e'tel tac ti' melol jini Templo. Wʌcp'ejl mil mi caj i yochelob ti yumʌl yic'ot ti juezob. Che' ja'el mi caj i yochelob chʌmp'ejl mil ti xcʌntayajob, yic'ot chʌmp'ejl mil mu' bʌ i ñuq'uesañob lac Yum ti música.

⁶David tsi' t'oxoyob ti uxmojt che' bajche' i yalobilob Leví. Jiñobʌch Gersón yic'ot Coat yic'ot Merari.

⁷Yambʌ cha'mojt tsa' otsʌbentiyob i c'aba' Laadán yic'ot Simei (i p'olbalob Gersón).

⁸Tsa' cha' t'oxleyob ti yambʌ wʌcmojt, uxmojt ti' wenta i yalobilob Laadán. Jiñobʌch Jehiel, Zetam yic'ot Joel. Yambʌ uxmojt ti' wenta i yalobilob Simei: jiñobʌch Selomit, Haziel, Harán. Jiñobʌch i yumob otot tac.

¹⁰Tsa' cha' t'oxleyob levíjob ti' wenta i yalobilob Simei. Jiñobʌch Jahat, Zina, Jeús yic'ot Bería. Pero ma'añobic cabʌl i yalobil Jeús yic'ot Bería. Jini cha'an tsa' tsijquiyob che' bajche' junmojt.

¹²Tsa' t'oxle i p'olbal Coat ti chʌnmojt ti' wenta i yalobilob. Jiñobʌch Amram, Izhar, Hebrón, Uziel.

¹³Amram jiñʌch i tat Aarón yic'ot Moisés. Jini Aarón temel yic'ot i yalobilob tsa' wa'chocontiyob ti ch'ujul bʌ i ye'tel cha'an mi' yʌq'ueñob i majtan tac lac Yum, cha'an mi' melob i ye'tel, yic'ot cha'an mi' subeñob wocolix i yʌlʌ lac Yum c'ʌlʌl ti pejtelel ora.

¹⁴Tsa' tem ch'ʌjmiyob ti tsic i yalobilob Moisés, i winic lac Yum yic'ot jini levíjob. Jini i yalobilob Moisés jiñobʌch Gersón yic'ot Eliezer.

¹⁶I yalobil jini Gersón jiñʌch Sebuel am bʌ i ye'tel.

¹⁷I yalobil Eliezer, jiñʌch Rehabías jini yumʌl. Ma'anic yambʌ i yalobil Eliezer, pero wen cabʌlob i yalobilob Rehabías.

¹⁸I yalobil Izhar jiñʌch Selomit jini yumʌl.

¹⁹I yalobil Hebrón jiñʌch Jerías jini yumʌl, i cha'ticlel jiñʌch Amarías, i yuxticlel jiñʌch Jahaziel, i chʌnticlel jiñʌch Jecamán.

²⁰I yalobilob Uziel jiñʌch Micaía jini yumʌl, i cha'ticlel jiñʌch Isías.

²¹I yalobilob Merari jiñobʌch Mahli yic'ot Musi. I yalobilob Mahli jiñobʌch Eleazar yic'ot Cis.

²²Eleazar tsa' chʌmi che' ma'anic ch'iton bʌ i yalobil, cojach xch'ocob. Cis tsi' siji i yalolobilob yic'otob i yumijelob.

²³I yalobilob Musi jiñobʌch Mahli, yic'ot Edar yic'ot Jeremot.

²⁴Pejtelel iliyi jiñobʌch i p'olbalob Leví. Tsa' ochiyob ti censo che' bajche' jaytiquilob i p'olbal i ñojte'elob jini año' bʌ ti jujunc'al i jabilel yic'ot ñumenobix bʌ i jabilel. Jiñobʌch jini tsa' bʌ cajiyob ti e'tel ya' ti Templo.

²⁵Come David tsi' yʌlʌ: Lac Yum i Dios israelob tsa'ix i yʌc'ʌyonla ti ajñel ti ñʌch'ʌl. Mi caj i chumtʌl ti Jerusalén c'ʌlʌl ti pejtelel ora.

²⁶Che' jini mach wersajix mi' chʌn ch'ʌmob majlel jini pisil bʌ otot jini levíjob, yic'ot jini uch'ijibʌl tac am bʌ ti' wenta. Che' tsi' yʌlʌ David.

²⁷Che' bʌ tsi' tsiquiyob i p'olbalob Leví, jiñʌch junchajp jini cojix bʌ i melbal David che' cuxul to.

²⁸An ti' wenta levíjob i p'olbalo' bʌ Aarón cha'an mi' coltañob jini motomajob ya' ti Templo che' mi' tsʌnsʌbeñob i majtan tac Dios. An ti' wenta ja'el cha'an mi' cʌntañob Templo, cha'an mi' sʌq'uesañob chuqui yom sʌq'uesʌntel.

²⁹Tsi' chajpayob waj ja'el mu' bʌ i pʌsbentel Dios, yic'ot i ñich harina cha'an majtañʌl, yic'ot jini waj mach bʌ paj'esʌbilic, yic'ot ch'ilbil tac bʌ, yic'ot jini woch'esʌbil tac bʌ. Che' ja'el tsi' chajpayob jini p'isoñib tac.

³⁰Ti jujump'ejl sʌc'ajel yic'ot ti ic'ajel tsa' ochiyob ti' tojlel lac Yum cha'an mi' c'ʌyibeñob wocolix i yʌlʌ.

³¹Tsi' coltayob motomajob ja'el ti jujunyajl che' bʌ tsi' pulbeyob lac Yum jini tsʌnsʌbil bʌ alʌc'ʌl tac. Tsi' coltayob che' ti yorajlel c'aj o yic'ot che' ti tsijib uw, yic'ot ti ñuc tac bʌ q'uinijel. Ti pejtelel ora ts'ʌcʌl tsa' c'otiyob jini levíjob che' bajche' yom cha'an ili e'tel ti' tojel lac Yum.

³²Tsi' cʌntayob jini Tabernáculo yic'ot jini Templo. Tsi' chʌn coltayob jini motomajob ti pejtelel i ye'tel ti' yotot lac Yum.