Read Chol 1 Cronicas 26 Bible Online

1 Cronicas 26 - Chol bible

1 Cronicas 26

¹Tsi' wa'chocoyob jini mu' bʌ i cʌntañob Templo, loq'uemo' bʌ ti' pi'ʌlob Asaf ti' p'olbalob Coré. I yum xcʌntayajob jiñʌch Meselemías, i yalobil bʌ Coré.

²Jiñobʌch i yalobilob: Zacarías jini ascuñʌl bʌ, Jediael jini i cha'ticlel bʌ, Zebadías jini i yuxticlel bʌ, Jatniel jini i chʌnticlel bʌ, Elam jini i jo'ticlel bʌ, Johanán jini i wʌcticlel bʌ, Elioenai jini i wucticlel bʌ.

⁴Tsa' wa'chocontiyob i yalobilob Obed Edom ja'el cha'an xcʌntayajob ti Templo. Jiñobʌch iliyi: Semaías jini ascuñʌl bʌ, Jozabad jini i cha'ticlel bʌ, Joa jini i yuxticlel bʌ, Sacar jini i chʌnticlel bʌ, Natanael jini i jo'ticlel bʌ, Amiel jini i wʌcticlel bʌ, Isacar jini i wucticlel bʌ, Peultai jini i waxʌcticlel bʌ. Dios tsi' yʌq'ue cabʌl i yutslel i pusic'al yic'ot pejtelel jini ch'iton bʌ i yalobilob.

⁶Wen ñucob i yalobilob Semaías ti pejtelel. Añob i ye'tel ti' tojlel i pi'ʌlob. Jiñobʌch iliyi: Otni, Rafael, Obed, Elzabad. Wen ch'ejlob i yerañob ja'el, Eliú yic'ot Samaquías.

⁸Ti pejtelel i p'olbalob Obed Edom añob cha'p'ejl i chʌnc'al (62), wen ch'ejlo' bʌ winicob.

⁹Ch'ejlob ja'el i yalobilob Meselemías. Añob waxʌclujuntiquil (18).

¹⁰Hosa i p'olbal bʌ Merari tsi' wa'choco Simri cha'an mi' yajñel ti yumʌl ti' tojlel i yalobilob, anquese mach ascuñʌlic.

¹¹Jini yaño' bʌ i yalobilob jiñobʌch iliyi: Hilcías jini i cha'ticlel bʌ, Tebalías jini i yuxticlel bʌ, Zacarías jini i chʌnticlel bʌ. Añob uxlujuntiquil (13) ch'iton bʌ i yalobilob yic'ot i yerañob jini Hosa.

¹²Tsa' otsʌbenti i c'aba' tac jini xcʌntayajob cha'an Templo ti mojt ti mojt che' bajche' an i c'aba' i yumob. An ti' wenta cha'an mi' cha'leñob e'tel ti Templo che' bajche' yaño' bʌ levíjob.

¹³Che' jini tsi' cha'leyob yajcaya ti alas cha'an mi' wa'chocoñob mu' bʌ caj i cʌntañob i ti' tac Templo, mi ñuc bʌ mi ch'o'ch'oc bʌ.

¹⁴Jini tsa' bʌ caji i cʌntañob i ti' Templo am bʌ ti' tojel i pasibal q'uin jiñʌch Selemías yic'ot i pi'ʌlob. Tsi' yajcayob ja'el Zacarías cha'an mi' cʌntan i ti' otot am bʌ ti norte. Wen an i ña'tʌbal Zacarías.

¹⁵Ti' tojel jini sur tsa' cʌle ti' wenta jini Obed Edom. An ti' wenta i yalobilob cha'an mi' q'uelob chuqui tac yom ya' ti' yotot Dios.

¹⁶Ti' tojel i bʌjlibal q'uin tsa' cʌle ti' wenta jini Supim yic'ot jini Hosa, yic'ot ti ti' i c'aba' Salequet, ya' ti' chañelal jini bij.

¹⁷Ti jujump'ejl q'uin tsa' wa'chocontiyob wʌctiquil levíjob cha'an mi' q'uelob i ti' Templo ba' mi' pasel q'uin, yic'ot chʌntiquil ti norte, yic'ot chʌntiquil ti sur. Tsa' ajniyob cha'tiquil ti otot ba' lotol tac chuqui mi' c'ʌjñel.

¹⁸Ya' ti' ti' Templo am bʌ ti' bʌjlibal q'uin tsa' ajniyob chʌntiquil ti jujump'ejl q'uin. Tsa' ajniyob chʌntiquil ti bij am bʌ ti' chañelal, yic'ot cha'tiquil lʌc'ʌl bʌ ti Templo.

¹⁹Ti' pejtelel ili xcʌntayajob loq'uemob ti' p'olbal Coré yic'ot Merari.

²⁰Yaño' bʌ levíjob año' bʌ ti' wenta Ahías tsa' aq'uentiyob ti' wenta cha'an mi yotsañob ti Templo jini majtañʌl tac tsa' bʌ i yʌq'ueyob lac Yum jini winicob x'ixicob. Jini levíjob jiñobʌch Zetam yic'ot Joel, i yalobilo' bʌ Jehieli loq'uemo' bʌ ti' p'olbal Laadán i yalobil bʌ Gersón.

²³Jini Sebuel i yalobil Gersón i buts bʌ Moisés, jiñʌch ñuc bʌ xcʌnta taq'uin. Tsi' q'uele pejtelel jini x'e'telob año' bʌ ti' wenta Amram, Izhar, Hebrón, Uziel.

²⁵I p'olbalob Eliezer ti jujunlajm jiñobʌch Rehabías, Jesaías, Joram, Zicri, Selomit.

²⁶Jini Selomit temel yic'ot i pi'ʌlob tsa' wa'chocontiyob cha'an mi' q'uelob jini majtañʌl tsa' bʌ aq'uenti lac Yum cha'an jini rey David, yic'ot año' bʌ i ye'tel ti Israel, yic'ot i yumob soldadojob.

²⁷Come ili winicob tsi' yʌc'ʌyob jini chubʌ'añʌl tsa' bʌ i chiliyob ti guerra cha'an mi' c'ʌjñel ti Templo jini chubʌ'añʌl tsa' bʌ i chiliyob ti guerra.

²⁸Tsa' cʌle ti' wenta Selomit temel yic'ot i pi'ʌlob pejtelel jini yan tac bʌ chubʌ'añʌl tsa' bʌ aq'uenti lac Yum cha'an jini x'alt'an Samuel, yic'ot jini Saúl i yalobil Cis, yic'ot Abner i yalobil Ner, yic'ot Joab i yalobil Sarvia, yic'ot majqui tac jach tsi' yʌc'ʌ majtañʌl.

²⁹Tsa' wa'choconti Quenanías temel yic'ot i yalobilob (loq'uemo' bʌ ti Izhar) cha'an mi' yochelob ti yumʌl yic'ot juezob ti Israel.

³⁰Jini i lum Israel am bʌ ti' tojel Jordán ja' ba' mi' bʌjlel q'uin tsa' aq'uenti ti' wenta Hasabías yic'ot i pi'ʌlob. Añob 1,700 ch'ejlo' bʌ ti' pejtelel. An ti' wenta bajche' mi' yajñelob israelob ti' tojlel Dios yic'ot ti' tojlel rey. Tsi' cha'leyob meloñel ja'el.

³¹Jerías jiñʌch i yum 2,700 ñuc bʌ winicob loq'uemo' bʌ ti' p'olbal Hebrón. Añob ti' wenta cha'an mi' cha'leñob yumʌntel ti' tojlel i p'olbal Rubén yic'ot Gad yic'ot jini ojlil i p'olbal Manasés. An ti' wenta bajche' mi' yajñelob winicob x'ixicob ti' wut Dios. Tsi' cha'leyob meloñel ja'el. Wen añob i ña'tʌbal ili winicob. Tsa' wa'chocontiyob ya' ti Jazer am bʌ ti Galaad che' cha'c'alix jab woli' cha'len i yumʌntel David.