Read Chol 2 Cronicas 1 Bible Online

2 Cronicas 1 - Chol bible

2 Cronicas 1

¹Wa'chocobilix Salomón i yalobil David ti' ye'tel ti rey. Lac Yum Dios tsi' yʌq'ue cabʌl i ñuclel.

²Salomón tsi' pʌyʌ majlel ti Gabaón i yumob soldadojob yic'ot jini juezob, yic'ot pejtel año' bʌ i ye'tel ti' tojlel jujunmojt israelob. Ya' tsa' letsi ti bujtʌl ba'an jini Tabernáculo tsa' bʌ i mele Moisés, i winic lac Yum, ti colem bʌ i tiquiñal lum.

⁴(Ti jim bʌ ora mach ya'ic an jini Arca*, come jini rey David tsi' loc'sa ti Quiriat Jearim. Tsi' c'axtesa ti Jerusalén baqui tsi' chajpʌbe pisil bʌ i yotot.)

⁵Pero jini pulʌntib melbil bʌ ti bronce tsa' bʌ i mele Bezaleel (i yalobil Uri, i yalobil Hur), ya'to an ti' tojel i Tabernáculo lac Yum. Jini cha'an Salomón yic'ot pejtelel jini israelob tsi' tempayob i bʌ ya'i. Tsi' pulbeyob jump'ejl mil tsʌnsʌbil bʌ i majtan lac Yum.

⁷Ti jini jach bʌ ac'ʌlel Dios tsi' pʌsbe i bʌ Salomón. Tsi' sube: C'ajtibeñon chuqui a wom mi cʌq'ueñet, che'en.

⁸Salomón tsi' sube: C Yum Dios, tsa' wen pʌsbe i yutslel a pusic'al c tat David che' bʌ tsa' wa'chocoyon ti rey ti' q'uexol c tat.

⁹Jini cha'an, c Yum Dios, ts'ʌctesan a t'an tsa' bʌ a sube c tat David, come tsa' wotsayon ti yumʌl ti' tojlel bajc'ʌl winicob x'ixicob lajal bʌ i yonlel bajche' ts'ubejn.

¹⁰Jini cha'an aq'ueñon c ña'tʌbal yic'ot cabʌl c pusic'al cha'an mic cha'len yumʌl bajche' yom ti' tojlelob, come ma'anic majqui mi mejlel i bajñel cha'len yumʌntel ti' tojlel ili ñuc bʌ a tejclum, che'en Salomón.

¹¹Lac Yum tsi' sube: Uts'at tsa' c'ajtibeyon iliyi. Ma'anic tsa' c'ajtibeyon cabʌl a chubʌ'an mi a ñuclel mi cabʌl a jabilel mi a p'ʌtʌlel cha'an ma' t'uchtan a contrajob, pero tsa' c'ajtibeyon a ña'tʌbal yic'ot cabʌl a pusic'al cha'an ma' mel a we'tel ti uts'at ti' tojlel c tejclum Israel.

¹²Jini cha'an woli cʌq'ueñet a ña'tʌbal yic'ot cabʌl a pusic'al. Mi caj cʌq'ueñet ja'el a chubʌ'an yic'ot a wenlel yic'ot a ñuclel ñumen bajche' tsi' tajayob yaño' bʌ. Ma'anic mi caj i buchtʌl ti a yumʌntel yambʌ rey lajal bʌ i ñuclel bajche' jatet. Che' tsi' yʌlʌ lac Yum.

¹³Salomón tsa' sujti ti Jerusalén che' bʌ tsa' ujti i yʌq'uen i majtan Dios ti' tojel jini Tabernáculo ya' ti Gabaón. Tsa' caji i mel i ye'tel ti rey ti' tojlel pejtelel israelob.

¹⁴Salomón tsa' caji i tempan cabʌl carreta yic'ot winicob yujilo' bʌ c'ʌchtʌl ti caballo. An jump'ejl mil yic'ot jumbajc' (1,400) carreta ti pejtelel. An lajchʌmp'ejl mil (12,000) jini c'ʌchʌlo' bʌ. Tsi' yʌc'ʌ lamital ti' tejclum tac carreta. Lamital tsi' yʌc'ʌ ti Jerusalén i tejclum jini rey.

¹⁵Salomón tsi' tempa cabʌl oro yic'ot plata, lajal i yonlel bajche' i xajlelal Jerusalén. Tsi' tempa cabʌl ch'ujte', wen on che' bajche' jini sicómoro te' ya' ti Sefela.

¹⁶Tsi' choco majlel i winicob ti Egipto cha'an mi' mʌñob tilel cabʌl caballo.

¹⁷Ti jim bʌ ora jo'p'ejl mil peso i tojol jump'ejl carreta ya' ti Egipto. Uxbajc' peso i tojol juncojt caballo. Tsi' cha' chombeyob caballo i reyob heteyojob yic'ot siriajob.