Read Chol 2 Cronicas 10 Bible Online

2 Cronicas 10 - Chol bible

2 Cronicas 10

¹Roboam tsa' majli ti Siquem, come ya'i tsi' tempayob i bʌ pejtelel año' bʌ i ye'tel ti Israel cha'an mi' wa'chocoñob ti rey.

²Jeroboam (i yalobil Nabat) che' bʌ tsi' yubi chʌmenix Salomón, tsa' sujti ti' lumal, come anix ora tsa' puts'i majlel ti Egipto cha'an tsi' bʌc'ña jini rey Salomón. I pi'ʌlob Jeroboam tsi' chocoyob ti pʌyol. Che' temel añob yic'ot pejtelel jini israelob ti' tojlel Roboam, tsi' subeyob:

⁴A tat tsi' yʌq'ueyon lojon wocol bʌ e'tel yic'ot al bʌ j cuch lojon. Jini cha'an a wocolic t'ox ju'sʌbeñon lojon ili wocol tsa' bʌ i yʌq'ueyon lojon a tat. Che' jini mi caj c yumañet lojon, che'ob.

⁵Roboam tsi' jac'beyob: Cucuxla. Yom mi la' cha' tilel che' ñumeñix uxp'ejl q'uin, che'en. Jini cha'an tsa' cha' sujtiyob.

⁶Jini rey Roboam tsa' caji i pejcan jini xñoxob tsa' bʌ i coltayob i tat ti e'tel. Tsi' c'ajtibeyob: ¿Bajche' yom mic jac'beñob? che'en.

⁷Tsi' jac'beyob: Mi uts ma' pʌs a bʌ ti' tojlelob, mi uts'at ma' pejcañob, mi caj i yumañetob ti pejtelel ora, che'ob.

⁸Pero ma'anic tsi' ñopbeyob i t'an xñoxob. Tsa' caji i c'ajtibeñob ja'el ch'iton winicob, i pi'ʌlob ti colel woli bʌ i coltañob ti e'tel. ¿Bajche' yom mic jac'beñob? come yomob mic t'ox jusʌbeñob jini wocol tsa' bʌ i yʌq'ueyob c tat, che'en.

¹⁰Jini ch'iton winicob tsi' jac'beyob: Subeñob: “Mi woli la' lon ña'tan al la' cuch ti' tojlel c tat, la' wila to bajche' mi caj la' cuch tic tojlel, come ñumen ñuc i bontʌlel i yal j c'ʌb bajche' i ya' c tat.

¹¹Joñon mi caj c p'ojlesan la' wocol. C tat tsi' jats'ʌyetla ti asiyal, pero joñon mi caj c jats'etla ti asiyal am bʌ i taq'uiñal lajal bʌ i c'uxel bajche' siñan”. Che' yom ma' subeñob, che'ob.

¹²Che' ti yuxp'ejlel q'uin tsa' cha' tili Jeroboam yic'ot pejtelel i winicob cha'an mi' yubibeñob i t'an Roboam.

¹³Jini rey tsa' caji i pejcañob ti tsʌts bʌ t'an, come ma'anic tsi' jac'beyob i t'an jini xñoxob.

¹⁴Tsi' jac'beyob i t'an jini ch'iton winicob. Tsi' yʌlʌ: Mi woli la' lon ña'tan al la' cuch ti' tojlel c tat, la wila to bajche' mi caj la' cuch tic tojlel. Jini c tat tsi' jats'ʌyetla ti asiyal, pero joñon mi caj c jats'etla ti asiyal am bʌ i taq'uiñal lajal bʌ i c'uxel bajche' siñan, che'en.

¹⁵Jini rey ma'anic tsi' pʌsʌ i bʌ ti uts ti' tojlel winicob, come Dios tsi' tsʌts'esʌbe i pusic'al cha'an mi' ts'ʌctiyel i t'an che' bajche' tsi' sube Jeroboam (i yalobil Nabat) jini x'alt'an Ahías ch'oyol bʌ ti Silo.

¹⁶Che' bʌ tsi' yubiyob, pejtelel jini israelob tsa' mich'ayob. Tsa' caji i yʌlob: Lolom jach mi lac yuman i yalobil David. Ma'anic chuqui mi caj lac taj ti' tojlel. Jini cha'an, israelob, conla ti sujtel ti la cotot. Bajñel cʌntan a wotot David. Che' tsi' yʌlʌyob. Che' jini tsa' sujtiyob pejtelel israelob.

¹⁷Cojach jini israelob año' bʌ ti' tejclum tac Judá tsa' chʌn ajniyob ti' wenta Roboam.

¹⁸Jini rey Roboam tsi' choco majlel Adoram jini xq'uel e'tel cha'an mi' wets'ob tilel ti' tojlel, pero jini israelob tsi' juluyob ti xajlel. Che' jini tsa' chʌmi Adoram. Ti ora tsa' letsi ti carreta jini rey Roboam cha'an mi' puts'el majlel ti Jerusalén.

¹⁹C'ʌlʌl wʌle jini israelob ma'anic mi' yumañob i p'olbal David.