Read Chol 2 Cronicas 15 Bible Online

2 Cronicas 15 - Chol bible

2 Cronicas 15

¹I yEspíritu Dios tsa' c'oti ti' tojlel Azarías (i yalobil Obed).

²Tsa' majli Azarías i taj jini rey Asa. Tsi' sube: Ñich'tʌbeñon Asa, jatet yic'ot pejtelel Judá yic'ot Benjamín. Lac Yum mi caj i chʌn ajñel la' wic'ot, mi xuc'ul mi la' chʌn ajñel yic'ot. Che' mi la' sajcan lac Yum mi caj la' taj. Pero mi tsa' la' cʌyʌ, mi caj i cʌyetla ja'el.

³Cabʌlix ora woli' tʌts'ob i bʌ israelob. Ma'anic mi' ch'ujutesañob jini Cuxul bʌ Dios. Ma'anic i motomajob mu' bʌ i cʌntesañob. Mach i cʌñʌyobic i mandar.

⁴Pero ti' yorajlel wocol che' bʌ tsi' sutq'uiyob i bʌ cha'an mi' sajcañob lac Yum i Dios Israel, tsi' yʌc'ʌ i bʌ ti tajtʌl.

⁵Pero che' bʌ tsi' contrajiyob Dios, ma'anic majqui tsa' ajni ti ñʌch'ʌl. Bʌbʌq'uen tsi' ñusayob q'uin baqui jach tsa' majliyob. Cabʌl tsi' tajayob i tic'lʌntel ti pañimil.

⁶Ti mojt ti mojt tsi' contrajiyob i bʌ winicob, jump'ejl tejclum ti contra yambʌ, come Dios tsi' p'ojlesʌbeyob i wocol.

⁷Pero yom ch'ejletla. Mach mi la' lujb'an ti' melol chuqui uts'at, come mi caj i yʌq'ueñetla ñuc bʌ la' chobejtʌbal cha'an pejtelel la' we'tel, che'en Azarías.

⁸Che' bʌ tsi' yubi jini t'an Asa, tsa' ñumen bʌx'a. Tsi' laj jisa pejtelel jini dios tac ya' ti Judá yic'ot ti Benjamín yic'ot ti pejtelel jini tejclum tsa' bʌ i ch'ʌmʌ ya' ti Efraín wits. Tsi' cha' tsijibtesa jini pulʌntib i cha'an lac Yum ti' tojlel jini Templo.

⁹Tsi' tempa pejtelel Judá yic'ot Benjamín yic'ot i pi'ʌlob ti chumtʌl tilemo' bʌ ti Efraín, yic'ot ti Manasés yic'ot ti Simeón, come cabʌl israelob tsa' c'axiyob tilel che' bʌ tsi' q'ueleyob lac Yum Dios yic'ot.

¹⁰Che' ti junio che' ti jo'lujump'ejlel jab i ye'tel jini rey Asa, tsi' tempayob i bʌ pejtelel israelob ya' ti Jerusalén.

¹¹Ti jini jach bʌ q'uin tsi' tsʌnsʌbeyob lac Yum 700 wacax yic'ot 7000 tiñʌme' tsa' bʌ i chilbeyob i contrajob ti guerra.

¹²Tsi' wa'chocoyob i t'an cha'an ti jump'ejlob i pusic'al mi caj i chʌn tsajcañob lac Yum i Dios i ñojte'elob ti pejtelel ora.

¹³Jini mach bʌ yomic i tsajcan lac Yum i Dios Israel, wersa mi' chʌmel, mi alob mi winic, mi x'ixic. Che'ʌch tsi' ña'tayob.

¹⁴Ti c'am bʌ t'an tsi' subeyob i ñuclel lac Yum ti jump'ejl i pusic'al yic'ot trompeta yic'ot xulub.

¹⁵Pejtelel año' bʌ ti Judá tsi' yubiyob i tijicñʌyel i pusic'al cha'an i t'an tsa' bʌ i yʌc'ʌyob, come ti jump'ejlob i pusic'al tsi' sajcayob lac Yum. Jini cha'an tsa' mejli i tajob. Lac Yum tsi' yʌc'ʌyob ti ajñel ti ñʌch'ʌl ti pejtelel i lumal.

¹⁶Jini rey Asa tsi' loc'sa i ña' ti' ye'tel ti' yumʌntel cha'an tsi' mele quisintic jax bʌ dios i c'aba' Asera. Asa tsi' bic'ti jeme. Tsa' majli i pul ya' ti pa' i c'aba' Cedrón.

¹⁷Pero ma'anic tsi' jisayob pejtelel jini pulʌntib am bʌ ti bujbujtʌl. Ma'anic tsa' jejmi. Pero xuc'ul tsi' mele Asa ti' tojlel lac Yum ti pejtelel i jabilel.

¹⁸Tsi' ch'ʌmʌ ochel ti Templo pejtelel i majtan Dios tac melbil bʌ ti plata yic'ot oro yic'ot ja'el jini tsa' bʌ i tempa i tat.

¹⁹Jo'lujump'ejl i cha'c'al (35) jab ma'anic guerra ti' yumʌntel Asa.