Read Chol 2 Cronicas 18 Bible Online

2 Cronicas 18 - Chol bible

2 Cronicas 18

¹Pero che' cabʌl tsi' taja i chubʌ'an yic'ot i ñuclel Josafat, tsi' c'ajtibe i yijñam i yalobil ti' tojlel Acab am bʌ ti Israel.

²Ti wi'il tsa' majli ti Samaria cha'an mi' jula'tan Acab. Acab tsi' tsʌnsa cabʌl tiñʌme' yic'ot wacax cha'an mi' c'uxob Josafat yic'ot i winicob. Tsa' caji i xic'ben cha'an mi' majlelob ti guerra ti' contra Ramot ti Galaad.

³Jini rey Acab tsi' sube Josafat rey bʌ ti Judá: ¿A wom ba majlel quic'ot ti guerra ti' contra Ramot ya' ti Galaad? che'en. Josafat tsi' jac'ʌ: Jini c soldadojob a cha'añob, lac pi'ʌlʌch lac bʌ. Mux laj comol cha'len guerra.

⁴Pero ñaxan yom mi cubiben i t'an lac Yum, che'en.

⁵Jini cha'an jini rey Acab tsi' tempa tilel jumbajc' x'alt'añob. Tsa' caji i c'ajtibeñob: ¿Yom ba mic majlel ti guerra ti' contra Ramot ti Galaad? che'en. Jini x'alt'añob tsi' yʌlʌyob: Yom cu, come Dios mi caj i yʌc'ob ti a c'ʌb, che'ob.

⁶Pero Josafat tsi' c'ajtibe: ¿Am ba juntiquil x'alt'an i cha'an lac Yum ilayi cha'an mi laj c'ajtiben? che'en.

⁷I rey Israel tsi' jac'be Josafat: An juntiquil winic i c'aba' Micaías (i yalobil Imla) mu' bʌ mejlel i subeñonla chuqui mi' yʌl lac Yum, pero mach uts'atic mij q'uel, come puro wocol jach mi' yʌl. Ma'anic mi' subeñon chuqui tijicña. Josafat tsi' jac'ʌ: Mach che'ic yom ma' wʌl bajche' jini, che'en.

⁸Jini cha'an i rey Israel tsi' choco ti pʌyol juntiquil soldado. Tsi' sube: Pʌyʌ tilel ti ora jini Micaías (i yalobil Imla), che'en.

⁹I rey israelob yic'ot i rey Judá, lʌpʌlob i cha'an jini wen uts'at bʌ i pislelob ya' ti' t'ejl bij ti yochibal Samaria. Pejtelel jini x'alt'añob junlajal woli' yʌlob.

¹⁰Jini Sedequías (i yalobil Quenaana) tsi' mele tac xulub ti tsucu taq'uin. Tsi' yʌlʌ: Che'ʌch tsi' yʌlʌ lac Yum: “Mi caj a c'ʌn ili xulub cha'an ma' jisan jini asiriajob”, che'en.

¹¹Che' ja'el tsi' yʌlʌyob pejtelel i pi'ʌlob: Cucu ti guerra ya' ti Ramot ti Galaad. Mi caj i mʌjlel a cha'an, come lac Yum mi caj i yʌc'ob ti a c'ʌb, che'ob.

¹²Jini winic tsa' bʌ majli i pʌy tilel Micaías tsa' c'oti i suben: Pejtelel jini x'alt'añob junlajal woli' yʌlob ti' tojlel jini rey. Jini cha'an mic subeñet che'ʌch yom ma' wʌl ja'el, che'en.

¹³Micaías tsi' yʌlʌ: Cuxul lac Yum, mi caj c sub pejtelel mu' bʌ i subeñon c Dios, che'en. Che' jini tsa' tili ba'an jini rey.

¹⁴Jini rey tsi' c'ajtibe: Micaías, ¿yom ba mic majlel lojon ti guerra ti' contra Ramot ti Galaad? che'en. Micaías tsi' jac'ʌ: Yom cu, come muc'ʌch caj la' mʌl, che'en.

¹⁵Jini rey tsi' sube: ¿Jayyajl yom mic subeñet ti' c'aba' lac Yum cha'an ma' subeñon i sujmlel? che'en.

¹⁶Micaías tsi' jac'ʌ: Tsaj q'uele israelob pam pujquemob ti mate'el che' bajche' tiñʌme' mach bʌ anic i yum. Lac Yum tsi' yʌlʌ: “Tsa' tsʌnsʌnti i yum. La' cha' sujticob ti' yotot jini winicob”, che'en lac Yum. Che' tsi' yʌlʌ Micaías.

¹⁷I rey israelob tsi' sube Josafat: ¿Mach ba anic tsac wʌn subeyet leco chuqui mi' subeñon? che'en.

¹⁸Micaías tsa' cha' caji i yʌl: Ñich'tanla chuqui mi' yʌl lac Yum. Tsaj q'uele buchul lac Yum ya' ti' buchlib, che' ya' wa'alob pejtelel jini año' bʌ ti panchan ti' joytʌlel.

¹⁹Lac Yum tsi' c'ajtibeyob: “¿Majqui mi caj i suben Acab rey bʌ ti Israel cha'an mi' majlel ti Ramot ti Galaad ba' mi caj i tsʌnsʌntel?” che'en. Ti chajp ti chajp tsi' jac'ʌyob.

²⁰Juntiquil espíritu tsa' c'oti i suben lac Yum: “Joñon mi caj c xic'ben majlel”. Lac Yum tsi' c'ajtibe: “¿Bajche' mi caj a suben?”

²¹Tsi' yʌlʌ: “Mi caj j c'ʌmbeñob i yej jini x'alt'añob yujilo' bʌ lot cha'an mic pʌy majlel ti chʌmel”, che'en. Lac Yum tsi' jac'be: “Cucu pʌyʌ majlel che' bajche' tsa' ña'ta”, che'en.

²²Q'uele che' jini lac Yum tsa'ix i yʌc'ʌ jini espíritu ti' yej jini x'alt'añob yujilo' bʌ lot, come lac Yum tsi' ña'ta i yʌq'uet ti chʌmel, che'en Micaías.

²³Sedequías (i yalobil Quenaana) tsi' lʌc'tesa i bʌ i poch'in Micaías. Tsi' yʌ'le: ¿Tsa'ix ba i cʌyʌyon i yEspíritu lac Yum cha'an mi' yochel ti jatet? che'en.

²⁴Micaías tsi' jac'ʌ: Mi caj a ña'tan ti jim bʌ q'uin che' ma' puts'el cha'an bʌq'uen, che'en.

²⁵I rey israelob tsi' yʌlʌ: Pʌyʌla majlel Micaías ba'an Amón am bʌ i ye'tel ti tejclum yic'ot ba'an calobil Joás.

²⁶Yom mi la' suben: “Jini rey tsi' yʌc'ʌ mandar cha'an mi la' wotsan ili winic ti mʌjquibʌl. Ts'ita jach yom mi la' wʌq'uen waj yic'ot ja' c'ʌlʌl jinto mi' cha' sujtel jini rey ti' ñʌch'tʌlel i pusic'al”, che' yom mi la' suben, che'en.

²⁷Micaías tsi' jac'ʌ: Mi tsa' cha' sujtiyet, mi caj a ña'tan mach Diosic jini tsa' bʌ i pejcayon, che'en. Che' ja'el tsi' sube pejtelel winicob: Yom mi la' p'is ti wenta, che'en.

²⁸Jini cha'an tsa' majliyob ti Ramot ti Galaad i rey israelob yic'ot i rey Judá.

²⁹I rey Israel tsi' sube Josafat: Joñon mi caj c yʌn c bʌ, mi caj j q'uextan c pislel, pero jatet yom ma' lʌp a pislel ti rey, che'en. Che'ʌch tsi' meleyob.

³⁰Jini rey ti Siria tsi' wʌn sube i yumob jini carreta tac: Mach yomic mi la' cha'len leto yic'ot jini ñuco' bʌ mi ch'o'ch'oco' bʌ, cojach yom mi la' contrajin Israel, che'en.

³¹Jini año' bʌ ti carreta tac che' bʌ tsi' q'ueleyob Josafat tsi' yʌlʌyob: Jiñʌch i yum Israel, che'ob. Ti ora jach tsi' joy mʌctayob cha'an mi' jisañob, pero Josafat c'am tsi' cha'le oñel. Lac Yum tsi' colta, come Dios tsi' tʌts'ʌyob ñumel.

³²Jini año' bʌ ti carreta che' bʌ tsi' q'ueleyob mach jinic i rey Israel, tsi' tʌts'ʌyob i bʌ ti' tojlel.

³³Juntiquil soldado tsi' to'o cha'le julbʌl ti' jalʌjb. Pero toj tsa' c'oti ti' tojel i pusic'al i rey Israel ba' ts'ita' calal i mʌctijib ti yebal i ch'il'at. Che' bʌ lojwemix tsa' caji suben jini xñijca carreta: Sutq'uin jini carreta cha'an ma' pʌyon loq'uel, come lojwemonix, che'en.

³⁴Ti jim bʌ q'uin tsa' wen tsʌts'a jini guerra. Che' jax ñʌc ñolol jini i rey Israel woli' ñajtʌ q'uel jini siriajob c'ʌlʌl ti ic'ajel. Che' wolix i bʌjlel q'uin tsa' chʌmi jini rey.