Read Chol 2 Cronicas 19 Bible Online

2 Cronicas 19 - Chol bible

2 Cronicas 19

¹Pero Josafat, rey bʌ ti Judá, uts'at tsa' cha' c'oti ti' yotot ya' ti Jerusalén.

²Jini x'alt'an Jehú (i yalobil Hanani) tsa' tili i taj. Tsa' caji i suben: ¿Yom ba mi laj coltan xmulilob? ¿Yom ba mi laj c'uxbin jini mu' bʌ i ts'aleñob Dios? Che'ʌch tsa' mele jatet. Jini cha'an lac Yum woli' wen mich'leñet.

³Pero an to i ña'tʌntel jini uts'at bʌ a melbal ja'el, come tsa' wʌc'ʌ ti jilel i yejtal tac jini dios Asera. Tsa' ña'ta ti a pusic'al mi caj a c'uxbin Dios, che'en.

⁴Josafat tsa' caji i cha' mel i ye'tel ti Jerusalén. Ma'anix tsa' ajni ti Israel. Tsa' pam ñumi ti xʌmbal ti jujump'ejl tejclum: ti Beerseba, c'ʌlʌl ti wits i c'aba' Efraín. Tsi' cha' xic'beyob cha'an mi' ch'ujutesañob i Dios i ñojte'elob.

⁵Tsi' wa'choco juezob ti pejtelel tejclum tac ti Judá.

⁶Tsi' sube jini juezob: Yom tsajaletla ti pejtelel chuqui mi la' mel cha'an ma'anic mi la' cha'len meloñel che' bajche' mi' melob jontolo' bʌ. Yom mi la' melob ti toj che' bajche' mi' mulan lac Yum mu' bʌ caj i coltañetla che' mi la' cha'len chuqui toj.

⁷Jini cha'an yom mi la' bʌc'ñan lac Yum. Wen tsajaletla yom ti pejtelel chuqui mi la' mel, come toj mi' cha'len meloñel lac Yum. Mach jechojquic mi' mel winicob. Mach yomic mi la' ch'ʌm la' majtan cha'an mi la' coltan jini am bʌ i mul, che'en.

⁸Ya' ti Jerusalén Josafat tsi' wa'choco ja'el lamital jini levíjob yic'ot motomajob, yic'ot año' bʌ i ye'tel cha'an mi' cha'leñob meloñel ti' tojlel i pi'ʌlob.

⁹Tsi' subeyob: Che'ʌch yom mi la' mel cha'an mi la' bʌc'ñan lac Yum. Melela chuqui tac toj ti toj bʌ la' pusic'al.

¹⁰Che' mi' tejchel wocol ti' tojlel jini chumulo' bʌ ti tejclum tac, mi tsʌnsa, o mi yambʌ mulil wocol bʌ ti melol, yom mi la' melob che' bajche' mi' yʌl jini mandar. Subeñob i melob i bʌ ti' tojlel lac Yum, ame tilic i mich'ajel lac Yum ti lac tojlel. Mi toj mi la' mel ti pejtelel, ma'anic mi caj lac taj lac mul ti' tojlel Dios.

¹¹Na'tan ja'el, an ti' wenta jini ñuc bʌ motomaj Amarías cha'an mi' meletla ti' tojlel lac Yum, pero Zebadías (i yalobil Ismael) am bʌ i ye'tel ti Judá mi caj i meletla ti' tojlel jini rey. Jini levíjob mi caj i coltañetla. Cha'len la' we'tel ti xuc'ul. Lac Yum mi caj i wen coltañetla, che'en Josafat.