Read Chol 2 Cronicas 2 Bible Online

2 Cronicas 2 - Chol bible

2 Cronicas 2

¹Salomón tsa' caji i wa'chocoben i yotot lac Yum yic'ot i bajñel otot.

²Tsi' yotsa ti e'tel lujuntiquil i chʌnc'al mil (70,000) xcuchijelob yic'ot chʌnc'al mil (80,000) xtoj'esa xajlelob. Tsi' wa'choco bolombajc' (3,600) xq'uel e'telob.

³Salomón tsi' chocbe majlel t'an jini rey Hiram ya' ti Tiro. Tsi' sube: Coltañon che' bajche' tsa' colta c tat David che' bʌ tsa' chocbe tilel ch'ujte' cha'an i melol i yotot.

⁴Joñon mi caj c wa'chocoben i Templo lac Yum Dios, mu' bʌ caj cʌq'uen lac Yum cha'an mi mejlel cʌq'uen lojon i majtan ti sʌc'ajel, yic'ot ti ic'ajel, yic'ot ti' yorajlel c'aj o, yic'ot che' mi' pasel uw, yic'ot ti ñuc tac bʌ i q'uiñilel lac Yum Dios, cha'an mi' pulbentel pom yic'ot tsʌnsʌbil bʌ i majtan xojocña bʌ i yujts'il che' bajche' yom melol ti Israel ti pejtelel ora.

⁵Wen ñuc jini otot mu' bʌ caj c wa'chocon. Wen ñuc lac Dios. Ma'anic yambʌ ñuc bʌ ti' tojlel jini diosob.

⁶Pero ¿majqui mi mejlel i melben i yotot jini ñuc bʌ Dios mu' bʌ i but' i chañelal panchan? Mach ñuconic cha'an mic wa'chocoben i yotot, pero jiñʌch i yotot ba' mi caj c ch'ujutesan lojon.

⁷Jini cha'an chocbeñon tilel winicob yujilo' bʌ e'tel ti oro yic'ot ti plata yic'ot ti bronce yic'ot ti tsucu taq'uin. Choco tilel ja'el jini yujilo' bʌ jalbal ti chʌchʌc bʌ yic'ot ti yʌyʌx bʌ puy. La' i comol cha'leñob e'tel yic'ot c winicob ti Judá yic'ot ti Jerusalén yajcʌbilo' bʌ i cha'an c tat David.

⁸Chocbeñon tilel te' ch'oyol bʌ ti Líbano, ch'ujte' yic'ot ciprés yic'ot wen tac bʌ te', come a winicob wen yujilob i p'elol te'. C winicob mi caj i comol cha'leñob e'tel yic'ot a winicob

⁹cha'an mi' loc'ob cabʌl te', come wen melbil yom jini colem otot mu' bʌ caj c wa'chocon. Yom wen i t'ojol jax.

¹⁰Mi caj cʌq'ueñob a winicob junc'al mil costal trigo yic'ot junc'al mil tambo cebada, yic'ot junc'al mil tambo i ya'lel ts'usub, yic'ot junc'al mil tambo olivo aceite. Che' tsi' yʌlʌ Salomón.

¹¹Ti ora jach jini rey Hiram am bʌ ti Tiro tsi' chocbe majlel jun Salomón. Tsi' yʌlʌ: Tsiquil wen c'uxbibilob jini israelob ti Dios. Jini cha'an lac Yum tsi' yotsayet ti rey ti' tojlelob.

¹²La' ñuq'uesʌntic lac Yum i Dios israelob tsa' bʌ i mele panchan yic'ot pañimil. Tsa'ix i yʌq'ue David juntiquil i yalobil wen toj bʌ, wen cabʌl bʌ i pusic'al yic'ot i ña'tʌbal cha'an ili e'tel. Uts'at mi caj a wa'chocoben i Templo lac Yum. Uts'at mi caj a mel a wotot ja'el ba' ma' cha'len yumʌl.

¹³Wolic chocbeñet majlel juntiquil c winic cabʌl bʌ i ña'tʌbal, wen yujil bʌ e'tel, jini wen ñuc bʌ Hiramabi.

¹⁴I yalobilʌch x'ixic judea ch'oyol bʌ ti Dan yic'ot winic loq'uem bʌ ti Tiro. Wen fino i ye'tel ti oro yic'ot ti plata yic'ot ti bronce yic'ot ti tsucu taq'uin. Che' ja'el wen yujil e'tel ti xajlel yic'ot te'. Yujil jalbal ja'el. Yujil i melol pejtelel chuqui mi lac suben. Yujil i yotsʌbentel i ts'ijbal pisil ti chʌchʌc yic'ot ti c'ʌnc'ʌn. Mi caj i cha'len e'tel yic'ot a winicob yic'ot jini winicob yajcʌbilo' bʌ i cha'an a tat David.

¹⁵Jini cha'an, c yum, choco tilel jini trigo, yic'ot cebada, yic'ot aceite, yic'ot i ya'lel ts'usub che' bajche' tsa' wʌlʌ.

¹⁶Mi caj c loc'san lojon jini te' ya' ti Líbano che' bajche' c'amel a wom. Mi caj c ts'ʌl cʌch lojon jini te' cha'an mic chocbeñet lojon majlel ya' ti colem ja' c'ʌlʌl ti Jope. Ya' mi caj i ch'ʌmob a winicob cha'an mi' jexbañob majlel ti Jerusalén. Che' tsi' yʌlʌ Hiram.

¹⁷Salomón tsi' tsiqui pejtelel jini ñajt bʌ ch'oyolob chumulo' bʌ ti Jerusalén che' bajche' tsi' mele David i tat. Ti pejtelelob añob 153,600 winicob.

¹⁸Tsi' yotsayob ti e'tel lujump'ejl i chʌnc'al mil xcuchijelob yic'ot chʌnc'al mil xp'el te'ob yic'ot xtoj'esa xajlelob, yic'ot bolonc'al xq'uel e'telob.