Read Chol 2 Cronicas 22 Bible Online

2 Cronicas 22 - Chol bible

2 Cronicas 22

¹Jini winicob ya' ti Jerusalén tsi' wa'chocoyob Ocozías cha'an mi' cha'len yumʌntel ti' q'uexol i tat. Jiñʌch ijts'iñʌl bʌ, come jini arabejob tsi' tsʌnsʌbeyob i yʌscuñob.

²An cha'p'ejl i cha'c'al (22) i jabilel Ocozías che' bʌ tsa' ochi ti' ye'tel. Jump'ejl jab tsi' cha'le yumʌntel ya' ti Jerusalén. I c'aba' i ña' jiñʌch Atalía, i yalobil Acab.

³Jontol Ocozías che' bajche' Acab, come i ña' tsi' xiq'ui ti jontolil.

⁴Jini cha'an Ocozías tsa' caji i mel chuqui tac jontol ti' wut lac Yum che' bajche' pejtel i pi'ʌlob Acab, come che' chʌmenix i tat, i pi'ʌlob tsi' cʌntesayob. Tsi' socoyob.

⁵Ocozías tsi' jac'beyob i t'an jini año' bʌ ti' yotot Acab. Tsi' laja i t'an yic'ot Joram i rey Israel (i yalobil bʌ Acab). Joram woli ti guerra ti' contra Hazael rey bʌ ti Siria ya' ti Ramot ti Galaad. Ocozías tsa' majli ti guerra yic'ot Joram i yichan. Tsa' lojwi Joram cha'an siriajob.

⁶Jini cha'an tsa' sujti Joram ti' yotot ya' ti Jezreel cha'an mi' ts'ʌcʌntel. Ocozías tsa' majli i jula'tan jini rey ti Israel tsa' bʌ lojwi.

⁷Pero ch'oyol ti Dios ili wocol cha'an mi' junyajlel jisʌntel Ocozías che' woli' majlel i jula'tan Joram. Come che' bʌ tsa' c'oti ba'an i yichan, Joram tsi' pʌyʌ majlel cha'an comol mi' contrajiñob Jehú (i yalobil Nimsi), jini yajcʌbil bʌ i cha'an lac Yum cha'an mi' junyajlel jisan pejtel i p'olbal Acab.

⁸Jehú tsa' caji' tsʌnsan pejtel i pi'ʌlob Acab yic'ot i cʌñʌyo' bʌ. Tsa' c'oti i taj i yʌlijelob Ocozías año' bʌ ti' wenta Ocozías. Tsi' laj tsʌnsayob.

⁹Jehú tsi' sʌcla Ocozías, pero puts'emix ti Samaria. I winicob Jehú tsa' majli i tajob. Che' bʌ tsi' pʌyʌyob tilel ba'an Jehú, tsi' tsʌnsa. Tsi' mucuyob che' bajche' i tilel mi' mucob reyob, come tsi' yʌlʌyob: Jiñʌch i buts Josafat tsa' bʌ i tsajca lac Yum ti pejtelel i pusic'al. Ti pejtelel i yalobilob Ocozías tsa' laj tsʌnsʌntiyob. Cojax Joás tsa' cʌle.

¹⁰Che' bʌ tsi' q'uele Atalía chʌmenix Ocozías i yalobil, tsi' tsʌnsa pejtel i yalobilob Ocozías cha'an mi' bajñel otsan i bʌ ti yumʌl ti Judá.

¹¹Pero Josabet, i yixic'al Joram i chich jini rey Ocozías, tsi' mucul pʌyʌ Joás jini ñoj ijts'iñʌl bʌ. Tsi' mucu ti jump'ejl tsalʌl yic'ot xmec' alʌl ya' ti Templo ba' mi' lojtel chubʌ'añʌl. Josabet jiñʌch i chich jini rey Ocozías. I yijñamʌch jini motomaj Joiada.

¹²Wʌcp'ejl jab tsi' mucul cʌnta jini ch'iton ya' ti' yotot lac Yum che' woli ti yumʌntel Atalía ti' lumal Judá.