Read Chol 2 Cronicas 23 Bible Online

2 Cronicas 23 - Chol bible

2 Cronicas 23

¹Che' ti wucp'ejlel jab tsa' ñumen caji ti ch'ejl'an jini motomaj Joiada. Tsa' caji i tem i t'an yic'ot lamital i yumob soldadojob, jiñobʌch Azarías (i yalobil Jeroham), Ismael (i yalobil Johanán), Azarías (i yalobil Obed), Maasías (i yalobil Adaía), yic'ot Elisafat (i yalobil Zicri).

²Jini yumʌlob tsa' cajiyob ti ñumel ti pejtelel i lumal Judá. Tsi' pʌyʌyob tilel ti Jerusalén jini levíjob yic'ot jini xñoxob ti Israel. Pejtelel jini winicob tsa' bʌ i tempayob i bʌ tsi' temeyob i t'an yic'ot jini motomaj Joiada ya' ti yotot Dios. Joiada tsi' subeyob: I yorajlelix mi' buchchocontel ti' yumʌntel jini ch'iton Joas ti' q'uexol i tat, come tsi' yʌlʌ lac Yum: “Mi caj i yajñel ti rey i p'olbal David”, che'en.

⁴Jini cha'an wʌle melela che' bajche' yom: Junmojt motomajob yic'ot levíjob mu' bʌ caj i yochelob ti tejclum ti' q'uiñilel c'aj o mi caj i cʌntañob i ti' Templo.

⁵Yambʌ junmojt mi caj i majlel ti' yotot ba' chumul Atalía. Yambʌ junmojt mi caj i yajñel ti' ti' jini ts'ajc am bʌ ti entʌl che' tempʌbilob xtejclumob ti' patiojlel jini Templo. Mach ochic mi juntiquilic winic ti' yotot Dios. Cojach mi' yochelob motamajob yic'ot levíjob, come yajcʌbilob cha'an ili e'tel.

⁷Jini levíjob mi caj i joyob jini rey, chuculob i cha'an i yespada ti' c'ʌb ti jujuntiquilob. Majqui jach mi' yochel ti Templo wersa mi caj i chʌmel. Yom mi' yajñelob yic'ot jini rey baqui jach mi' majlel. Che' tsi' yʌlʌ Joiada.

⁸Che'ʌch tsi' meleyob jini levíjob yic'ot pejtel año' bʌ ti Judá che' bajche' tsi' yʌlʌ jini motomaj Joiada. Tsi' wa'choco ti' ye'tel jini motomajob woli bʌ i yochelob ti' q'uiñilel c'aj o, yic'ot yaño' bʌ woli bʌ i loq'uelob, come maxto anic tsi' yʌq'ueyob permiso cha'an mi' sujtelob.

⁹Jini motomaj Joiada tsi' loc'sa ti Templo jini lanza tac yic'ot mʌctijibʌl tac tsa' bʌ i c'ʌñʌyob i winicob jini rey David ti wajali. Tsi' yʌq'ueyob i yumob soldadojob.

¹⁰I yumob soldadojob tsi' ch'ʌmʌyob i yespada. Tsi' tsoloyob i bʌ ti' joytʌlel jini pulʌntib ya' ti' patiojlel jini Templo.

¹¹Tsi' pʌyʌyob tilel Joas i yalobil rey. Tsi' c'ʌcchocobeyob jini corona. Tsi' yʌq'ueyob i t'an Dios ti' c'ʌb. Che' jini tsi' wa'chocoyob ti rey. Joiada yic'ot i yalobilob tsi' bombeyob ti aceite. C'am tsi' yʌlʌyob: La' sujbic i ñuclel jini rey, che'ob.

¹²Atalía tsi' yubi che' ju'ucñayob ti t'an che' c'am woli' subob i ñuclel jini rey. Tsa' tili ba' motocñayob winicob ti Templo.

¹³Che' bʌ tsi' can q'uele, ya'ix wa'al jini rey ti' tojel jini chan bʌ ts'ajc ti' ti' jini otot yic'ot jini ñuco' bʌ i ye'tel yic'ot xwus trompetajob. Pejtelel jini tempʌbilo' bʌ wen tijicñayob i pusic'al. Woli' wusob trompeta. Woli' cha'leñob c'ay yic'ot música. Atalía tsi' jet' tsili i pislel. Tsa' caji i yʌl: Wola' contrajiñon, wola' bajñel otsan a bʌ ti yumʌl, che'en.

¹⁴Jini motomaj Joiada tsi' sube i yumob soldadojob: Pʌyʌla loq'uel jini x'ixic. Tsʌnsanla. Majqui jach mi' majlel i coltan, la' tsʌnsʌntic ti espada. Pero mach yomic mi la' tsʌnsan ti' yotot Dios.

¹⁵Ti ora tsa' majli i chucob. Che' bʌ tsa' c'oti ti' ti' ba' mi' yochel caballo ti' pam i yotot rey, ya'i tsi' tsʌnsayob.

¹⁶Jini motomaj Joiada yic'ot pejtelel winicob yic'ot jini rey tsi' tem cha'leyob trato cha'an ti jump'ejl i pusic'al mi caj i yajñelob ti' cha'an bʌ lac Yum. Che' bʌ tsi' yʌc'ʌyob i t'an ti' pejtelelob, tsa' majliyob ti' templo Baal. Tsi' laj jemeyob yic'ot jini pulʌntib tac. Tsi' bic'ti top'oyob jini diosob. Tsi' tsʌnsayob jini motomaj i cha'an Baal i c'aba' Matán ti' t'ejl jini pulʌntib.

¹⁸Joiada tsa' caji i yʌq'ueñob i ye'tel levíjob yic'ot motomajob ti' yotot Dios che' bajche' tsi' mele David. Añob ti' wenta cha'an mi' yʌq'ueñob i majtan lac Yum che' bajche' ts'ijbubil ti' mandar Moisés, yic'ot c'ay yic'ot i tijicñʌyelob i pusic'al che' bajche' tsi' yʌc'ʌ mandar David.

¹⁹Joiada tsi' wa'choco xcʌntayajob ti' yotot lac Yum ame ochic juntiquil tic'bil bʌ.

²⁰Joiada yic'ot i yumob soldadojob, yic'ot año' bʌ i ye'tel ti tejclum tac, yic'ot pejtelel winicob, tsi' pʌyʌyob loq'uel jini rey ya' ba' wa'al ti Templo. Tsa' loq'uiyob ti' ti' am bʌ ti chan cha'an mi' majlelob ti' yotot rey. Ya' tsi' buchchocoyob jini rey ti' ye'tel.

²¹Wen tijicñayob ti pejtelelob. Ñʌch'ʌlob i pusic'al, come tsa' tsʌnsʌnti Atalía.