Read Chol 2 Cronicas 24 Bible Online

2 Cronicas 24 - Chol bible

2 Cronicas 24

¹Anix wucp'ejl i jabilel Joás che' bʌ tsa' caji ti yumʌntel. Cha'c'al jab tsi' cha'le yumʌl ti Jerusalén. I c'aba' i ña' jiñʌch Sibia ch'oyol bʌ ti Beerseba.

²Uts'at tsi' ñusa q'uin Joás ti' wut lac Yum che' cuxul to jini motomaj Joiada.

³Joiada tsi' yajcʌbe cha'tiquil i yijñam. Tsa' p'ojli i yalobilob.

⁴Ti wi'il Joás tsi' ña'ta i wen'esan i yotot lac Yum.

⁵Tsi' tempa tilel motomajob yic'ot levíjob. Tsi' subeyob: Yom mi la' ñumel ti' joytʌlel Judá cha'an mi la' tempan taq'uin ti jujump'ejl jab, cha'an mi' cha' mejlel jini Templo. Yom bʌxetla ti jini e'tel, che'en. Pero jini levíjob ma'anic tsi' ch'ʌmʌyob ti' wenta jini e'tel.

⁶Jini cha'an jini rey tsi' pʌyʌ tilel Joiada jini ñuc bʌ motomaj. Tsi' sube: ¿Chucoch ma'anic tsa' wersa xiq'uiyob jini levíjob? Subeñob cha'an mi' ch'ʌmob tilel i yofrenda jini chumulo' bʌ ti Judá yic'ot ti Jerusalén che' bajche' tsi' yʌc'ʌ mandar Moisés jini x'e'tel i cha'an lac Yum, cha'an mi lac cha' wen mel jini Templo. Che' tsi' yʌlʌ Joás.

⁷Jini jontol bʌ Atalía yic'ot jini tsa' bʌ i tsajcayob tsi' xujch'iyob loq'uel ti Templo pejtel chuqui tac aq'uebil Dios. Tsi' c'axtesayob ti' yotot i dios i c'aba' Baal. Jini cha'an jini rey tsi' yʌc'ʌ ti melol jump'ejl caxate'. Tsi' yʌc'ʌyob ya' ti' ti' i Templo lac Yum.

⁹Tsi' sube winicob ti Judá yic'ot ti Jerusalén cha'an mi' ch'ʌmbeñob tilel i tojoñel lac Yum che' bajche' tsi' yʌc'ʌ mandar Moisés i winic lac Yum che' bʌ tsa' ajniyob jini israelob ti colem bʌ i tiquiñal lum.

¹⁰Tijicñayob pejtel año' bʌ i ye'tel yic'ot pejtelel winicob. Tsi' ch'ʌmʌyob tilel jini tojoñel. Tsi' yotsayob ti caxate' jinto tsa' bujt'i.

¹¹Che' but'ulix jini caxate', jini levíjob tsi' ch'ʌmʌyob majlel ba'an i yaj ts'ijbaya jini rey, yic'ot i winic jini ñuc bʌ motomaj. Tsi' lu' loc'sayob jini taq'uin cha'an mi' tsicob. Tsi' cha' ch'ʌmʌyob majlel jini caxate' cha'an mi' cha' ac'ob ti' yajñib. Che'ʌch tsi' meleyob ti jujump'ejl q'uin jinto tsa' wen tempʌyi taq'uin.

¹²Jini rey yic'ot jini motomaj Joiada tsi' yʌc'ʌyob ti' wenta jini woli bʌ i cha'leñob e'tel ti Templo cha'an mi' tojob albañilob yic'ot xjuc' te'ob yic'ot jini xe'telob ti tsucu taq'uin yic'ot ti c'ʌnc'ʌn taq'uin cha'an mi' cha' wen mejlel jini Templo.

¹³Tsi' wen meleyob i ye'tel. Tsi' cha' tsijibtesayob jini Templo che' bajche' ti ñaxan.

¹⁴Che' bʌ tsa' ujti i melob, tsi' cha' ch'ʌmʌyob tilel jini rey yic'ot jini motomaj i colojbal jini taq'uin. Tsi' yʌc'ʌyob ti melol e'tijibʌl am bʌ i c'ʌjñibal ti' Templo Dios che' mi' pulbentel i majtan lac Yum, yic'ot cuchara tac yic'ot vaso melbil tac bʌ ti oro yic'ot ti plata. Ti pejtelel ora che' cuxul to jini motomaj Joiada, tsa' chʌn pulbenti i majtan lac Yum ya' ti' yotot lac Yum.

¹⁵Tsa' chʌmi Joiada che' ñoxix. Anix lujump'ejl i wucc'al (130) i jabilel che' bʌ tsa' chʌmi.

¹⁶Tsi' mucuyob ba' mucbilob jini reyob ya' ti' tejclum David, come wen uts'at tsi' ñusa q'uin ti' tojlel pejtelel israelob yic'ot ti' tojlel Dios.

¹⁷Che' chʌmenix Joiada, tsa' tili jini año' bʌ i ye'tel ti Judá. Tsi' ñocchocoyob i bʌ ba'an jini rey. Jini rey tsa' caji i jac'beñob i t'an.

¹⁸Che' jini tsi' cha' cʌyʌyob i Dios i ñojte'elob yic'ot i Templo. Tsa' caji i cha' ch'ujutesañob jini quisintic jax bʌ dios Asera yic'ot yan tac bʌ dioste'. Che' jini lac Yum tsi' cha' mich'le Judá yic'ot Jerusalén.

¹⁹Tsi' chocbeyob tilel x'alt'añob cha'an mi' cha' toj'esañob ti' bijlel, pero jini winicob ma'anic tsi' yubiyob i cʌntesʌntel.

²⁰Jini Ch'ujul bʌ i Ch'ujlel lac Yum tsa' c'oti ti' tojlel Zacarías (i yalobil jini motomaj Joiada). Zacarías tsi' pʌyʌ tilel winicob x'ixicob. Tsa' wa'le ti t'uchlibʌl ti' tojlelob. Tsi' subeyob: ¿Chucoch tsa' la' ñusʌbe i t'an lac Yum? Che' jini ma'anic mi caj la' taj la' wenlel. Ti' caj la' mul cha'an tsa' la' cʌyʌ lac Yum mi caj i cʌyetla, che'en Zacarías.

²¹Pero jini winicob tsi' techeyob cabʌl t'an ti' contra. Jini cha'an ti' mandar jini rey tsi' juluyob ti xajlel. Tsa' chʌmi ya' ti' patiojlel jini Templo.

²²Che'ʌch tsa' ñajʌyi i cha'an jini rey Joás pejtel jini uts'at bʌ i melbal yic'ot i yutslel i pusic'al Joiada tsa' bʌ i cosa. Tsi' tsʌnsʌbe i yalobil. Che' woli ti chʌmel Zacarías tsi' yʌlʌ: C Yum, q'uelbeñob i mul, sutq'uibeñob, che'en.

²³Che' ñumeñix cha'p'ejl uxp'ejl uw, tsa' tiliyob siriajob cha'an mi' contrajiñob Judá yic'ot Jerusalén. Tsi' laj jisayob winicob yic'ot año' bʌ i ye'tel. Tsi' chilbeyob pejtelel i chubʌ'an. Tsi' chocoyob majlel ba'an jini rey ti Damasco.

²⁴Anquese ma'anic jaytiquilob jini siriajob tsa' bʌ tiliyob, lac Yum tsi' yʌc'ʌ ti jilel cabʌl israelob ti' caj i mul cha'an tsi' cʌyʌyob lac Yum, i Dios i ñojte'elob. Che' jini tsa' ju'sʌnti i pusic'al Joás.

²⁵Che' bʌ tsa' sujtiyob jini siriajob ti' lumal, wen ch'ijiyem tsi' cʌyʌyob jini Joás. I winicob Joás tsi' temeyob i t'an ti' contra i yum cha'an ti' caj tsi' tsʌnsʌbe i yalobil Joiada jini motomaj. Jini cha'an tsa' majli i tsʌnsañob Joás ti' wʌyib. Tsi' mucuyob ti' tejclum David, pero mach ya'ic ba' muculob jini reyob.

²⁶Jini winicob tsa' bʌ i tsʌnsayob jiñobʌch Zabad (i yalobil Simeat i p'olbal Amón) yic'ot Jozabad (i yalobil Simrit i p'olbal Moab).

²⁷Ts'ijbubil ti' juñilel jini reyob bajche' tsi' ñusayob q'uin i yalobilob Joás, yic'ot bajche' tsa' ts'a'lenti Joás cha'an i jontolil, yic'ot bajche' tsi' cha' wa'choco jini Templo. Amasías tsa' caji ti yumʌntel ti' q'uexol i tat.