Read Chol 2 Cronicas 25 Bible Online

2 Cronicas 25 - Chol bible

2 Cronicas 25

¹An jo'p'ejl i cha'c'al (25) i jabilel Amasías che' bʌ tsa' ochi ti' ye'tel. Bolomp'ejl i cha'c'al (29) jab tsi' cha'le yumʌntel ya' ti Jerusalén. I c'aba' i ña' jiñʌch Joadán ch'oyol bʌ ti Jerusalén.

²Uts'at chuqui tsi' mele ti' wut lac Yum anquese mach ti jump'ejlic i pusic'al.

³Che' wen wa'chocobilix ti' ye'tel, Amasías tsi' tsʌnsa jini x'e'telob tsa' bʌ i tsʌnsʌbeyob i tat.

⁴Pero ma'anic tsi' tsʌnsʌbeyob i yalobilob, come ts'ijbubil ti' juñilel i mandar Moisés: “Mach yomic mi' chʌmelob jini tatʌlob cha'an i mul i yalobilob, mi i yalobilobic ti' caj i mul i tatob. Jujuntiquil la' chʌmic cha'an i bajñel mul”.

⁵Amasías tsi' tempa tilel pejtelel i soldadojob. Tsi' wa'choco i yumob ti jujunmojt loq'uemo' bʌ ti Judá yic'ot Benjamín. Tsa' caji i yotsañob ti jun pejtel winicob tsa' bʌ i tajayob junc'al i jabilel yic'ot ñumeñix bʌ ti junc'al jab. Añob jo'lujunc'al mil (300,000) chajpʌbilo' bʌ cha'an guerra año' bʌ i cha'an lanza yic'ot espada. Amasías tsi' tojo ojlil i yuxp'ejl millón peso jini soldadojob ch'oyolo' bʌ ti Israel cha'an mi' coltañob ti guerra.

⁷Pero juntiquil x'e'tel i cha'an Dios tsa' tili ba'an Amasías. Tsi' sube: Mach ma' c'ʌn jini soldadojob ch'oyolo' bʌ ti Israel, come ma'anic mi' majlel lac Yum yic'otob.

⁸Mi wersa a wom a pʌyob majlel ti guerra, ma'anic mi caj i mʌjlel a cha'an anquese ma' ch'ejl'esan a bʌ cha'an guerra. Lac Yum mi caj i yʌq'uet ti yajlel ti' p'ʌtʌlel a contrajob, come an i p'ʌtʌlel lac Yum ti coltaya yic'ot ti jisaya, che'en.

⁹Pero Amasías tsi' sube jini x'e'tel i cha'an Dios: Jixcu jini c taq'uin tsa' bʌ cʌq'ueyob jini soldadojob ti Israel, ¿mach ba muq'uic i laj sajtel? che'en. Jini x'e'tel i cha'an Dios tsi' jac'ʌ: La' sajtic. Lac Yum mi mejlel i yʌq'ueñet yambʌ taq'uin ñumen bajche' ti ñaxan, che'en.

¹⁰Jini cha'an Amasías tsi' subeyob jini soldadojob tsa' bʌ tiliyob ti Efraín cha'an mi' cha' sujtelob ti' yotot. Jini cha'an tsa' caji i mich'leñob Judá.

¹¹Pero tsi' ch'ejl'esa i bʌ Amasías. Tsa' caji i pʌy majlel i soldadojob. Tsa' c'ʌlʌl c'otiyob ya' ti joctʌl i c'aba' Ats'am. Che' jini tsi' tsʌnsayob lujump'ejl mil winicob año' bʌ ti Seir.

¹²Tsi' cʌchʌyob yambʌ lujuntiquil mil winicob. Tsi' pʌyʌyob majlel ti' pam wits ba' tsi' chocoyob jubel ti entʌl. Bic'ti wisil tsa' cʌleyob pejtel jini winicob.

¹³Pero jini soldadojob israelob tsa' bʌ to'ol chojquiyob sujtel cha'an Amasías tsa' caji i techob guerra ti contra cha'p'ejl uxp'ejl tejclum ti Judá, lʌc'ʌl ti Bethorón am bʌ ti' tojlel Samaria. Tsi' tsʌnsayob uxp'ejl mil año' bʌ ti Judá. Tsi' chilbeyob chuqui an i cha'añob.

¹⁴Che' bʌ tsa' sujti Amasías ya' ba' tsi' tsʌnsa jini edomob, tsi' ch'ʌmʌ tilel cabʌl i dios tac jini winicob ti Seir. Tsa' caji i diosiñob. Tsi' ñocchoco i bʌ ti' tojlel. Tsi' pulbeyob pom.

¹⁵Jini cha'an lac Yum tsi' mich'le Amasías. Tsi' chocbe tilel juntiquil x'alt'an tsa' bʌ i sube: ¿Chucoch tsa' ñochta yambʌ diosob ti pañimil? Ma'anic tsi' wis coltayob jini edomob tsa' bʌ i ch'ujutesayob, che'en.

¹⁶Che' woli to ti t'an jini x'alt'an, Amasías tsi' jac'ʌ: ¿Tsa' ba wa'chocontiyet cha'an ma' toj'esañon? Ch'abix. ¿Mach ba a wujilic mi mejlel c tsʌnsañet? che'en. Jini x'alt'an tsi' cha' sube: Tsiquil che' jini lac Yum woli' ña'tan i jisañet, come leco jax bajche' tsa' mele. Ma'anic tsa' jac'ʌ c t'an, che'en.

¹⁷Ti wi'il tsi' comol temeyob i t'an Amasías rey ti Judá yic'ot i winicob cha'an mi' techob guerra ti' contra Israel. Amasías tsi' sube Joás (i yalobil Joacaz i yalobil Jehú rey bʌ ti Israel): Yom mi laj contrajin lac bʌ ti guerra, che'en.

¹⁸Joás rey bʌ ti Israel tsi' choco ti subentel ili t'an: Jini ch'ixte' ya' ti Líbano tsi' sube ch'ujte' ya' ti Líbano: “Aq'ueñon xch'oc bʌ a walobil cha'an i yijñam calobil”, che'en. Pero tsa' ñumi jontol bʌ bʌte'el ya' ti Líbano. Tsi' t'uchta jini ch'ixte'.

¹⁹Che'ʌch mi caj a wujtel, Amasías, come chan wola' q'uel a bʌ cha'an tsa' jisa jini edomob. Ma' lon ña'tan mi caj i mʌjlel a cha'an. Pero ajñen ti a wotot ame a taj wocol. ¿Chucoch ma' lon ac' a bʌ ti jisʌntel yic'ot pejtelel jini año' bʌ ti Judá? che'en.

²⁰Pero Amasías ma'anic tsi' ñopbe i t'an. Tilem ti Dios jini leco bʌ i pensar Amasías cha'an mi' yʌjq'uel ti chʌmel ti' c'ʌb i contrajob ti' caj i mul cha'an tsi' ch'ujutesa jini diosob i cha'an edomob.

²¹Jini cha'an tsa' tili ti guerra Joás rey bʌ ti Israel. Tsi' tajayob i bʌ Joás yic'ot Amasías ya' ti Betsemes ti Judá.

²²Pero jini soldadojob ti Judá tsa' jisʌntiyob cha'an Israel. Jini cuxulob to bʌ tsa' puts'iyob ti' yotot.

²³Joás rey bʌ ti Israel tsi' cʌchʌ Amasías rey bʌ ti Judá (i yalobil Joás, i yalobil Joacaz). Tsi' pʌyʌ majlel ti Jerusalén. Tsi' jembe i ts'ajquil tejclum c'ʌlʌl ti' ti' Efraín, c'ʌlʌl ti' xujc, bolonc'al metro ti pejtelel.

²⁴Tsi' laj ch'ʌmʌ majlel pejtel jini oro yic'ot plata, yic'ot e'tijibʌl am bʌ ti' wenta Obed Edom ya' ti Templo yic'ot jini an tac bʌ ti' yotot rey. Tsi' wersa pʌyʌ majlel Obed Edom yic'ot cabʌl winicob. Tsa' sujti ti Samaria.

²⁵Che' bʌ tsa' chʌmi Joás (i yalobil Joacaz, rey bʌ ti Israel), cuxul to Amasías (i yalobil Joás, rey bʌ ti Judá), yambʌ jo'lujump'ejl jab.

²⁶Ts'ijbubil ti' juñilel i reyob Judá yic'ot Israel pejtelel i melbal Amasías c'ʌlʌl ti' tejchibal.

²⁷Che' bʌ tsi' tʌts'ʌ i bʌ Amasías ti' tojlel lac Yum, jini winicob ti Jerusalén tsa' caji i ts'a'leñob. Tsa' puts'i majlel jini rey ti Laquis, pero ya' tsa' c'otiyob i tsʌnsan.

²⁸Tsi' pʌyʌyob tilel ti caballo. Tsi' mucuyob ba' muculob i ñojte'elob ya' ti' tejclum David.