Read Chol 2 Cronicas 26 Bible Online

2 Cronicas 26 - Chol bible

2 Cronicas 26

¹Pejtelel jini winicob ti Judá tsi' wa'chocoyob ti rey jini ch'iton Uzías (i yalobil Amasías) ti' q'uexol i tat. Wʌclujump'ejl (16) i jabilel Uzías.

²Che' chʌmenix i tat, tsi' cha' wen mele jini tejclum i c'aba' Elot. Tsi' cha' otsa ti' wenta Judá.

³An wʌclujump'ejl i jabilel Uzías che' bʌ tsa' caji i mel i ye'tel. Lajchʌmp'ejl i yuxc'al (52) jab tsi' cha'le yumʌntel ya' ti Jerusalén. I c'aba' i ña' jiñʌch Jecolías am bʌ ti Jerusalén.

⁴Uts'at chuqui tsa' caji i mel Uzías ti' wut lac Yum che' bajche' tsi' mele Amasías i tat.

⁵Che' cuxul to Zacarías tsi' cʌntesa ti' bijlel Dios. Uzías tsi' tsajca Dios ti pejtelel i pusic'al. Che' bʌ tsi' jac'be i t'an lac Yum wen uts'at tsi' ñusa q'uin, come Dios tsi' colta.

⁶Tsa' majli ti guerra ti' contra jini filisteojob. Tsi' jembe i ts'ajquil jini tejclum tac i c'aba' Gat yic'ot Jabnia yic'ot Asdod. Tsi' cha' mele tsiji' bʌ tejclum tac ya' ti Asdod yic'ot ti Filistia.

⁷Dios tsi' colta ti guerra ti' tojlel jini filisteojob yic'ot arabejob año' bʌ ti Gurbaal, yic'ot ti' tojlel meuñob. Jini amoñob tsa' caji i yʌq'ueñob tojoñel jini Uzías. Tsa' caji ti cʌjñel jini ñuc tac bʌ i ye'tel ti pejtelel lum c'ʌlʌl ti Egipto, come wen ch'ejl tsi' mele i bʌ.

⁹Tsi' mele ja'el chan tac bʌ q'ueloñib ya' ti' ts'ajquil Jerusalén, ya' ti' ti' tac i c'aba' I Xujc, yic'ot Joctʌl, yic'ot ya' ba' mi' lux i bʌ jini ts'ajc. Tsi' wen tsʌts'esa.

¹⁰Tsi' wa'choco q'ueloñib tac ya' ti sur. Cabʌl tsi' top'o i yajñib ja', come tsi' p'olo wacax ya' ti Sefela yic'ot ti joctʌl. Cabʌl i ts'usubil yic'ot yan tac bʌ pʌc'ʌb ti bujbujtʌl yic'ot ti jojoctʌl, come tsi' wen mula i pʌc' pejtelel i bʌl ñʌc'ʌl ti chajp ti chajp.

¹¹Uzías tsi' t'oxo soldadojob ti mojt ti mojt. Tsi' yotsa ti' wenta Jeiel jini sts'ijbaya yic'ot Maasías i yaj coltaya cha'an mi' xic'ob winicob cha'an mi' yochelob ti soldado. Jini ñuc bʌ i yum soldado jiñʌch Hananías.

¹²Añob lujunc'al i wucbajc' (2,600) i yumob soldadojob año' bʌ i ye'tel ti mojt ti mojt.

¹³Añob 307,500 soldadojob ti pejtelel, wen ch'ejlo' bʌ ti guerra.

¹⁴Uzías tsi' chajpʌbeyob mʌctijibʌl yic'ot lanza yic'ot pixolʌl yic'ot i mʌctijib i tajn, yic'ot jalʌjb yic'ot pʌrʌntun cha'an mi' c'ʌñob ti julbʌl yic'ot xajlel ti jujuntiquil.

¹⁵Ya' ti Jerusalén tsi' mele ja'el maquina cha'an guerra cha'an mi' julob i contrajob yic'ot i te'el i jalʌjb yic'ot colem xajlel. Ti pejtelel pañimil tsa' pam pujqui i ñuclel, come tsa' wen coltʌnti jinto tsi' taja cabʌl i p'ʌtʌlel.

¹⁶Pero che' cabʌlix i p'ʌtʌlel, tsa' caji i chañ'esan i bʌ. Cabʌl tsi' taja i sajtemal, come tsi' ñusʌbe i t'an lac Yum Dios. Tsa' ochi ti' yotot lac Yum cha'an mi' pulben pom ya' ti pulʌntib*.

¹⁷Ti wi'il pat tsa' tili jini motomaj Azarías, yic'ot chʌnc'al motomajob i cha'an lac Yum. Wen ch'ejlob jini winicob. Tsi' subeyob jini rey: Tic'bilet rey Uzías. Mach a we'telic cha'an ma' pulben pom lac Yum. An ti' wenta jini motomajob, come wa'chocobilob i p'olbal Aarón cha'an mi' melob jini e'tel. Yom ma' loq'uel ila ti Ch'ujul bʌ Ajñibʌl, come tsa'ix a ñusʌbe i t'an lac Yum. Mach uts'atic mi caj i q'uelet lac Yum cha'an chuqui tsa' mele, che'ob.

¹⁹Tsa' mich'a Uzías che' chucul i cha'an i pulʌntib pom. Ti ora tsa' loq'ui leco bʌ i tsoy ti' pam ya' ti' tojlel jini motomajob ti' yotot lac Yum ya' ti' t'ejl i pulʌntib pom.

²⁰Jini ñuc bʌ motomaj Azarías yic'ot pejtelel jini motomajob tsi' q'ueleyob che' bʌ tsa' pasi leco bʌ tsoy ti' pam Uzías. Tsi' bʌc' chocoyob loq'uel ya' ba' wa'al. Uzías ja'el tsi' se'ñu i bʌ cha'an mi' loq'uel ya'i, come lac Yum Dios tsi' yʌq'ue i chʌmel.

²¹Anto i tsoy jini rey Uzías c'ʌlʌl tsa' chʌmi. Jini cha'an tsa' bajñel chumle ti joch otot. Ma'anix tsa' chʌn ch'ʌjmi ti tsic yic'ot i cha'año' bʌ lac Yum tsa' bʌ i tempayob i bʌ ti' yotot lac Yum. Tsa' ochi wi' wenta Jotam cha'an mi' ch'ʌmben i ye'tel i tat. Tsi' cha'le yumʌl ti Judá.

²²Ts'ijbubil ti' juñilel x'alt'an Isaías (i yalobil Amoz) pejtelel i melbal Uzías c'ʌlʌl ti' tejchibal i yumʌntel.

²³Che' bʌ tsa' chʌmi Uzías, tsa' mujqui ya' ba' muculob jini reyob, i ñojte'elob, anquese leco i chʌmel. Tsa' caji ti yumʌntel Jotam ti' q'uexol i tat.