Read Chol 2 Cronicas 28 Bible Online

2 Cronicas 28 - Chol bible

2 Cronicas 28

¹An junc'al i jabilel Acaz che' bʌ tsa' caji ti yumʌntel. Wʌclujump'ejl (16) jab tsi' cha'le i ye'tel ya' ti Jerusalén. Ma'anic tsi' mele chuqui uts'at ti' wut lac Yum che' bajche' tsi' mele David i ñojte'el.

²Tsa' caji i mel jontolil che' bajche' jini reyob ti Israel. Tsi' mele i yejtal tac jini dios Baal.

³Tsi' pulbe i majtan ya' ti joctʌl i c'aba' Hinom. Tsi' yʌc'ʌ i yalobilob ti c'ajc i wenta pulbil bʌ i majtan che' bajche' tsi' cha'leyob jini winicob tsa' bʌ chojquiyob loq'uel ti' lumal cha'an mi' yochelob ti chumtʌl jini israelob.

⁴Che' ja'el tsi' tsʌnsa majtañʌl tac. Tsi' pulbe pom ya' ti bujbujtʌl ti yebal colem te'.

⁵Jini cha'an lac Yum Dios tsi' yʌc'ʌ ti cʌjchel majlel ti' c'ʌb jini rey ti Siria. Tsa' mʌjli i cha'an jini rey ti Siria. Tsi' jisa cabʌl winicob. Tsi' cʌchʌ majlel yaño' bʌ c'ʌlʌl ti Damasco. Yaño' bʌ tsa' jisʌntiyob cha'an i rey israelob, i c'aba' Peka.

⁶Peka (i yalobil Remalías) tsi' cha'le tsʌnsa ya' ti Judá. Ti jump'ejl jach q'uin tsi' tsʌnsa wʌcc'al mil (120,000) winicob wen ch'ejlo' bʌ ti guerra cha'an tsi' cʌyʌyob lac Yum, i Dios i ñojte'elob.

⁷Juntiquil ch'ejl bʌ winic ch'oyol bʌ ti Efraín, i c'aba' Zicri, tsi' tsʌnsa Maasías (i yalobil jini rey) yic'ot Azricam i yaj q'uel e'tel, yic'ot Elcana jini ñoj ñuc bʌ x'etel i cha'an rey.

⁸Jini israelob tsi' cʌchʌyob majlel lujunc'al mil x'ixicob, yic'ot ch'itoñob yic'ot xch'ocob. Tsi' chilbeyob cabʌl chubʌ'añʌl ja'el. Tsi' ch'ʌmʌyob majlel ti Samaria.

⁹Pero ya' ti Samaria an juntiquil x'alt'an i cha'an lac Yum i c'aba' Obed, tsa' bʌ majli i taj jini soldadojob che' woli' sujtelob ti Samaria. Tsi' subeyob: Awilan, lac Yum, i Dios la' ñojte'elob, tsi' mich'leyob jini año' bʌ ti Judá, come tsi' ñusʌbeyob i t'an. Jini cha'an tsi' yʌc'ʌyob ti la' c'ʌb, pero ma'anic tsa' la' p'untayob. Cʌlʌx jax tsa' la' tsʌnsayob ti la' mich'lel. Jini cha'an tal i mich'lel jini am bʌ ti panchan ti la' tojlel.

¹⁰Wʌle la' womix la' wotsan ti majtan e'tel la' pi'ʌlob ti Judá yic'ot Jerusalén. ¿Mach ba cabʌlix la' mul ti' contra lac Yum?

¹¹Ñich'tanla c t'an wʌle. Cha' chocola sujtel pejtelel la' pi'ʌlob tsa' bʌ la' cʌchʌyob, come mich' woli' q'ueletla lac Yum. Che' tsi' yʌlʌ jini x'alt'an.

¹²Jini cha'an cha'tiquil uxtiquil jini ñuco' bʌ i ye'tel ti Efraín tsi' jac'ʌyob, jiñobʌch Azarías (i yalobil Johanán), yic'ot Berequías (i yalobil Mesilemot), Ezequías (i yalobil Salum), yic'ot Amasa (i yalobil Hadlai).

¹³Tsi' subeyob i pi'ʌlob woli bʌ i sujtelob ti guerra: Mach la' pʌyob tilel jini tsa' bʌ la' cʌchʌyob ti guerra, come woli la' p'ojlesan lac mul ti' tojlel lac Yum. Cabʌlix lac mul, cabʌlix i mich'ajel lac Yum, che'ob.

¹⁴Jini cha'an i yumob soldadojob tsi' cʌyʌyob jini xcʌjchelob yic'ot jini chubʌ'añʌl ti' wenta jini xñoxob yic'ot pejtel jini tempʌbilo' bʌ.

¹⁵Jini chʌntiquil año' bʌ i ye'tel ti Efraín tsi' yʌq'ueyob i pislelob jini x'ixicob yic'ot alobob che' bajche' jaytiquil yomob. Che' ja'el tsi' yʌq'ueyob i xʌñʌb, yic'ot chuqui mi' c'uxob, yic'ot chuqui mi' japob. C'ʌchʌl tsa' caji i pʌyob majlel jini c'uño' bʌ ti mula c'ʌlʌl ti Jericó, jini tejclum ba'an cabʌl ch'ib, lʌc'ʌl ba' chumulob i pi'ʌlob. Che' jini tsa' cha' sujtiyob ti Samaria.

¹⁶Ti jim bʌ ora jini rey Acaz am bʌ ti Judá tsi' c'ajti i coltʌntel ti' tojlel jini rey ti Asiria.

¹⁷Come tsa' cha' tiliyob jini edomob cha'an mi' contrajiñob Judá. Tsi' wersa pʌyʌyob majlel cabʌlob. Che' ja'el jini filisteojob tsa' pam pujquiyob ti' tejclum tac Judá ya' ti Sefela yic'ot ti Neguev. Tsi' ch'ʌmʌyob Betsemes, Ajalón, Gederot, Soco, yic'ot jini xchumtʌl tac am bʌ ti' joytʌlel yic'ot Timna yic'ot jini xchumtʌl tac ti' joytʌlel, yic'ot Gimzo yic'ot jini xchumtʌl tac ti' joytʌlel.

¹⁹Come lac Yum tsi' peq'uesa jini winicob ti Judá cha'an i mul Acaz i rey jini israelob chumulo' bʌ ti Judá, come tsi' xiq'ui ti mulil jini año' bʌ ti Judá. Jini cha'an tsi' cʌyʌyob lac Yum.

²⁰Che' bʌ tsa' pʌjyi tilel Tiglat Pileser rey bʌ ti Asiria, ma'anic tsi' colta che' bajche' tsi' lon ña'ta Acaz pero tsi' contraji.

²¹Anquese tsi' ch'ʌmʌ cabʌl i majtan ti' c'ʌb jini rey Acaz, oro yic'ot yambʌ letsem tac bʌ i tojol am bʌ ti Templo yic'ot ti colem otot, ma'anic tsi' colta.

²²Che' bʌ tsa' p'ojli i wocol jini rey Acaz, tsa' caji i ñumen cha'len mulil ti' contra lac Yum.

²³Come tsi' pulbe i majtan dios tac i cha'an i contrajob ti Damasco tsa' bʌ i jisayob, come tsi' lon ña'ta Acaz cabʌl i p'ʌtʌlel jini diosob año' bʌ ti Siria cha'an woli' wen coltañob jini siriajob. Jini cha'an tsi' pulbeyob i majtan cha'an mi' coltʌntel ja'el. Pero i mul Acaz tsi' yʌc'ʌ ti yajlel yic'ot pejtelel i pi'ʌlob.

²⁴Che' bʌ tsi' tempa pejtelel jini melbil tac bʌ am bʌ i c'ʌjñibal ti Templo, tsi' top'o. Tsi' ñup'u i ti' Templo ame chʌn ochicob i ch'ujutesañob lac Yum. Tsa' caji i melben i pulʌntib dioste' tac ba' mi' rusiñob i bʌ i bijlel Jerusalén.

²⁵Che'ʌch tsi' mele ti pejtelel tejclum ti Judá cha'an mi' pulbeñob i majtan yambʌ diosob. Tsi' techbe i mich'ajel lac Yum, i Dios i ñojte'elob.

²⁶Ts'ijbubil ti' juñilel reyob ya' ti Judá yic'ot ti Israel pejtelel i melbal yic'ot bajche' tsi' ñusa q'uin c'ʌlʌl ti' tejchibal i yumʌntel.

²⁷Che' bʌ tsa' chʌmi Acaz tsi' mucuyob ti Jerusalén, pero mach ya'ic ba' muculob jini reyob. Tsa' caji ti yumʌntel Ezequías ti' q'uexol i tat.