Read Chol 2 Cronicas 29 Bible Online

2 Cronicas 29 - Chol bible

2 Cronicas 29

¹An jo'p'ejl i cha'c'al (25) i jabilel Ezequías che' bʌ tsa' caji ti yumʌntel. Bolomp'ejl i cha'c'al (29) jab tsi' cha'le yumʌl ya' ti Jerusalén. I c'aba' i ña' jiñʌch Abías (i yalobil Zacarías).

²Ezequías tsi' mele chuqui uts'at ti' wut lac Yum, che' bajche' tsi' mele David i ñojte'el.

³Che' ti ñaxan bʌ uw ti' tejchibal i ye'tel jini Ezequías, tsi' cha' jamʌ jini Templo. Tsi' cha' wen mele ya' ba' jejmen.

⁴Tsi' cha' pʌyʌ tilel jini motomajob yic'ot levíjob. Tsi' much'quiyob i bʌ ti jini patio am bʌ ti' tojel i pasibal q'uin. Ezequías tsi' subeyob: Ubinla levíjob, yom mi la' sʌq'uesan la' bʌ. Sʌq'uesanla i yotot lac Yum, i Dios lac ñojte'el. Loc'sanla jini leco tac bʌ yic'ot misujelʌl am bʌ ti Ch'ujul bʌ Ajñibʌl.

⁶Come lac ñojte'elob tsi' meleyob chuqui jontol. Tsi' ñusʌbeyob i t'an lac Yum, i Dios lac ñojte'elob. Tsi' cʌyʌyob lac Yum yic'ot i Templo.

⁷Tsi' ñup'beyob i ti' tac jini Templo. Tsi' yʌpʌyob jini lámpara. Ma'anix woli' pulbeñob pom. Ma'anix woli' tsʌnsʌbeñob i majtan i Dios israelob.

⁸Jini cha'an lac Yum woli' mich'len jini año' bʌ ti Judá yic'ot ti Jerusalén. Tsa'ix i yʌc'ʌyonla ti ts'a'lentel yic'ot ti wajlentel, cha'an mi' toj sajtelob i pusic'al pejtelel pañimil.

⁹Jini cha'an tsa' jisʌntiyob lac ñojte'elob ti guerra. Tsa' wersa pʌjyiyob majlel ti to'ol jach bʌ e'tel jini la calobilob yic'ot la quijñamob.

¹⁰Jini cha'an comix c mel trato ti' tojlel lac Yum i Dios Israel, cha'an mi' lajmel i mich'lel ti lac tojlel.

¹¹Jini cha'an c'uxbibilo' bʌ c pi'ʌlob, mach yomic mi la' chʌn cʌy lac Yum, come yajcʌbiletla cha'an mi la' ch'ujutesan. Melbenla i ye'tel. Pulbenla i majtan come i cha'añetla. Che' tsi' yʌlʌ Ezequías.

¹²Tsa' cajiyob ti e'tel jini levíjob. I p'olbal Coat: jini Mahat (i yalobil Amasai) yic'ot Joel (i yalobil Azarías). I p'olbal Merari: Cis (i yalobil Abdi) yic'ot Azarías (i yalobil Jehalelel). I p'obal Gersón: Joa (i yalobil Zima) yic'ot Edén (i yalobil Joa). I p'olbal Elizafán: Simri yic'ot Jeiel. I p'olbal Asaf: Zacarías yic'ot Matanías. I p'olbal Hemán: Jehiel yic'ot Simei. I p'olbalob Jedutún: Semaías yic'ot Uziel.

¹⁵Ti pejtelelob tsi' tempayob i pi'ʌlob. Tsi' sʌq'uesayob i bʌ. Che' jini tsa' ochiyob ti Templo cha'an mi' sʌq'uesañob che' bajche' tsi' yʌc'ʌ mandar jini rey cha'an ti' t'an lac Yum.

¹⁶Jini motomajob tsa' ochiyob ti Templo cha'an mi' sʌq'uesañob. Tsi' misuyob loq'uel pejtelel i bibi'lel jini Templo. Jini levíjob tsa' majli i chocob ya' ti' jajp ch'en i c'aba' Cedrón.

¹⁷Tsi' techeyob jini e'tel che' ti ñaxan bʌ q'uin che' ti abril. Che' ti' waxʌcp'ejlel q'uin ti jini jach bʌ uw tsa' c'ʌlʌl c'otiyob ti' patiojlel jini Templo. Yambʌ waxʌcp'ejl q'uin tsi' sʌq'uesayob jini patio. Ti wʌclujump'ejl (16) q'uin tsa' ujti pejtelel jini e'tel.

¹⁸Tsa' majli i subeñob jini rey Ezequías: Tsa'ix ujti c sʌq'uesan lojon jini Templo yic'ot jini pulʌntib ba' mi' pulbentel i majtan lac Yum, yic'ot pejtelel chuqui tac mi' c'ʌjñel cha'an i ñuq'uesʌntel lac Yum, yic'ot jini mesa* ba' mi' pʌstʌl waj, yic'ot pejtelel an tac bʌ i c'ʌjñibal.

¹⁹Tsa'ix c cha' taja lojon jini e'tijibʌl tsa' bʌ i choco jini rey Acaz che' bʌ tsi' ñup'u jini Templo. Wʌle laj sʌq'uesʌbilix. Ya'ix an ba'an jini pulʌntib i cha'an lac Yum.

²⁰Che' ti yijc'ʌlal tsa' seb ch'ojyi jini rey Ezequías. Tsa' majli ti Templo yic'ot pejtelel jini ñuco' bʌ i ye'tel ti tejclum.

²¹Tsi' pʌyʌyob tilel wuccojt alʌ tat wacax, wuccojt i tat tiñʌme', wuccojt alʌ tiñʌme', yic'ot wuccojt tat chivo. Tsi' sube motomaj cha'an mi' tsʌnsañob cha'an i tojol i mul jini Judá, yic'ot cha'an i sʌq'uesʌntel jini Templo.

²²Tsi' tsʌnsayob jini alʌ tat wacax. Jini motomajob tsi' ch'ʌmbeyob i ch'ich'el, tsi' tsijcayob ya' ti' pam jini pulʌntib. Che' ja'el tsi' tsʌnsayob i tat tiñʌme'. Tsi' tsijcayob jini ch'ich' ti' pam jini pulʌntib. Lajal tsi' meleyob yic'ot jini alʌ tiñʌme'.

²³Tsi' pʌyʌyob tilel i tat chivo ba'an jini rey yic'ot ba'an jini ñuco' bʌ i ye'tel cha'an i ñusʌntel mulil. Tsi' c'ʌcchoco i c'ʌb ti' jol jini chivo tac.

²⁴Jini motomajob tsi' tsʌnsayob jini alʌc'ʌl. Tsi' yʌc'ʌyob yic'ot i ch'ich'el ya' ti pulʌntib cha'an i ñusʌbentel i mul Israel. Come jini rey tsi' yʌc'ʌ mandar cha'an mi' yʌc'ob jini majtañʌl cha'an i ñusʌbentel i mul pejtelel Israel.

²⁵Jini rey tsi' wa'choco levíjob cha'an mi' melob música ti Templo yic'ot címbalo, yic'ot salterio, yic'ot arpa che' bajche' tsi' yʌc'ʌ mandar David yic'ot jini x'alt'añob, Gad yic'ot Natán tsa' bʌ i subeyob bajche' yom lac Yum. Jini levíjob tsa' caji i ñijcañob jini música i cha'an David. Jini motomajob tsa' caji i wusob trompeta.

²⁷Ezequías tsi' yʌc'ʌ mandar cha'an mi' pulel jini majtañʌl ya' ti pulʌntib. Che' bʌ tsa' caji i pulob jini majtañʌl*, tsa' cajiyob ti c'ay. Tsi' ñijcayob música, tsi' wusuyob trompeta. Tsi' c'ʌyibeyob i ñuclel lac Yum.

²⁸Ti pejtelelob tsi' ñuq'uesayob lac Yum. Jini yujilo' bʌ c'ay tsi' c'ʌyiyob lac Yum. Jini yujilo' bʌ i wusol trompeta tsi' wusuyob trompeta. Tsi' laj ch'ujutesayob lac Yum che' woli ti pulel jini majtañʌl.

²⁹Che' pulbilix tsi' c'uchchocoyob i bʌ jini rey yic'ot pejtelel tsa' bʌ i tempayob i bʌ. Tsi' ch'ujutesayob lac Yum.

³⁰Jini rey Ezequías yic'ot año' bʌ i ye'tel tsi' subeyob levíjob cha'an mi' ñuq'uesañob lac Yum yic'ot i salmo David, yic'ot i salmo Asaf jini x'alt'an. Tijicñayob i pusic'al tsi' jac'ʌyob. Che' bʌ tsi' c'uchchocoyob i bʌ, jini tempʌbilo' bʌ tsi' laj ch'ujutesayob lac Yum.

³¹Jini rey Ezequías tsi' yʌlʌ: Tsa'ix la sʌq'uesa la' bʌ ti' tojlel lac Yum. Lʌc'tesan la' bʌ. Ch'ʌmʌla jini majtañʌl tac. Subenla wocolix i yʌlʌ lac Yum yic'ot majtañʌl, che'en. Che' jini pejtelel jini winicob tsi' ch'ʌmʌyob tilel majtañʌl ti chajp ti chajp. Tsa' caji i subeñob wocolix i yʌlʌ lac Yum. Che' bajche' jaytiquil yomob tsi' ch'ʌmbeyob tilel i majtan lac Yum cha'an mi' pulbentel.

³²Ti pejtelel jini majtañʌl tsa' bʌ i ch'ʌmʌyob tilel israelob cha'an mi' pulbentel lac Yum, an lujuncojt i chʌnc'al (70) tat wacax, yic'ot jo'c'al tat tiñʌme', yic'ot junc'al alʌ tiñʌme'. An ja'el yambʌ lujunc'al i cha'bajc' (600) tat wacax, yic'ot uxp'ejl mil (3,000) tiñʌme'.

³⁴Pero ma'anic jaytiquil motomajob. Anto yom mu' bʌ i ts'ulob jini majtañʌl tac. Jini cha'an jini levíjob i pi'ʌlo' bʌ ti e'tel tsa' caji i coltañob jinto tsa' ujti i melob jini e'tel, jinto tsa' mejli i sʌq'uesañob i bʌ yaño' bʌ motomajob, come ñumen bʌxob jini levíjob cha'an mi' sʌq'uesañob i bʌ che' bajche' jini motomajob.

³⁵Wen cabʌl tsa' tempʌyi majtañʌl tac yic'ot japbil tac bʌ majtañʌl yic'ot jini majtañʌl cha'an i ñʌch'tʌlelob i pusic'al.

³⁶Che' jini wen tijicña i pusic'al Ezequías yic'ot pejtelel jini winicob x'ixicob, come lac Yum tsi' wen coltayob cha'an mi' bʌc' jac'ob.