Read Chol 2 Cronicas 3 Bible Online

2 Cronicas 3 - Chol bible

2 Cronicas 3

¹Che' lu' chajpʌbilix, Salomón tsa' caji i tech i wa'chocontel i yotot lac Yum ya' ti wits i c'aba' Moríah am bʌ ti Jerusalén. Jiñʌch i patiojlel Ornán jini jebuseo, ba' tsi' jats'ʌ trigo, ya' ba' lac Yum tsi' pʌsbe i bʌ David. David tsi' ña'ta ya' yom wa'chocontel jini Templo.

²Salomón tsa' caji i tech i wa'chocon Templo che' ti 17 de abril che' i chʌmp'ejlel jab i reyintel.

³Jiñʌch i p'isol i yebal tsa' bʌ i mele Salomón: Lujump'ejl i cha'c'al (30) metro i ñajtlel, lujump'ejl metro i xujc.

⁴I lejch' jini otot am bʌ ti c'ajpam jini colem otot, an i ñajtlel lujump'ejl metro, lajal bajche' i xujc otot. Uxc'al metro i chanlel. Tsi' laj tep'e ti oro i mal jini otot.

⁵Tsi' mele jini colem bʌ i mal otot yic'ot i tablajlel ciprés. Tsi' tep'e ti oro. Tsi' t'obo tac i yejtal i yopol ch'ib yic'ot cadena.

⁶Tsi' ch'ʌlbe i mal otot yic'ot alʌ xajlel tac wen i t'ojol bʌ. Tsi' c'ʌñʌ oro ch'oyol bʌ ti Parvaim.

⁷Tsi' laj tep'e ti oro jini otot: i cucujlel, yic'ot i yoyel, yic'ot i ñʌc' tac jini tsalʌl ti pejtelel i tablajlel, yic'ot i ti' tac jini otot ba' tsi' meleyob i yejtal tac ángelob.

⁸Ti mal jini Templo tsi' mele jini C'ax* Ch'ujul bʌ Ajñibʌl. Joy lajal i ñajtlel yic'ot i xujc, lujump'ejl metro. Tsi' laj tep'e ti oro am bʌ i tojol lujunc'al ti millón peso.

⁹Jini lawux melbil bʌ ti oro an i yalel uxc'al gramo jujunts'ijt. Tsi' tep'e ti oro ja'el jini tsalʌl tac am bʌ ti' cha'lajmlel otot ya' ti chan.

¹⁰Ya' ti' mal jini C'ax Ch'ujul bʌ Ajñibʌl tsi' wa'choco cha'tiquil ángelob melbil bʌ ti te' tep'bil bʌ ti oro.

¹¹Ya' wa'alob i yejtal ángelob ti' tojel jini Ch'ujul* bʌ Ajñibʌl. Tich'bilob i wich' tsi' tajayob i bʌ ti ojlil. Tsa' c'ʌlʌl c'otiyob ti' tablajlel otot ti jujunwejl.

¹⁴Ya' ti' tojel i wut tsi' joc'choco pisil wen fino bʌ melbil bʌ ti lino, jalbil bʌ ti yʌjyʌx bʌ yic'ot ti chʌchʌc bʌ puy. Ya' jalbil i yejtal tac ángelob ti jini pisil.

¹⁵Ti' tojel jini otot tsi' mele cha'ts'ijt i yoyel, wuwucp'ejl metro i chanlel. Yambʌ ojlil i yuxp'ejl metro i chanlel i jol jini oy.

¹⁶Tsi' mele cadena tac cha'an i ch'ʌjlil i jol ti' cha'ts'ijtlel. Lʌpʌl ti cadena tac jo'c'al granada melbil bʌ ti bronce.

¹⁷Tsi' wa'choco jini oy ti' tojel Templo, junts'ijt ti' ñoj, yambʌ ti' ts'ej. Tsi' yotsʌbe i c'aba' Jaquín jini am bʌ ti' ñoj yic'ot Boaz jini am bʌ ti' ts'ej.