Read Chol 2 Cronicas 30 Bible Online

2 Cronicas 30 - Chol bible

2 Cronicas 30

¹Ezequías tsi' choco ti subentel pejtelel año' bʌ ti Israel yic'ot ti Judá, yic'ot ti Efraín, yic'ot ti Manasés, cha'an mi' tilelob ti Templo ya' ti Jerusalén, cha'an mi' melob jini Pascua, jini ñuc bʌ q'uiñijel i cha'an lac Yum, i Dios israelob.

²Jini rey Ezequías yic'ot año' bʌ i ye'tel yic'ot pejtelel año' bʌ ti Jerusalén tsi' comol ña'tayob i mel jini Pascua che' ti mayo, come maxto anic tsi' laj sʌq'uesayob i bʌ jini motomajob che' ti abril. Maxto laj tempʌbilobic winicob ti Jerusalén.

⁴Jini cha'an jini rey yic'ot pejtel ñuco' bʌ i ye'tel tsi' ña'tayob uts'at mi' melob ti mayo.

⁵Tsi' chocoyob ñumel x'ac'juñob ti pejtelel Israel c'ʌlʌl ti Beerseba c'ʌlʌl ti Dan, cha'an mi' pʌyob tilel ti Jerusalén ti pejtelelob cha'an mi' melob jini Pascua i cha'an lac Yum, i Dios israelob. Come anix ora tsi' cʌyʌ i melob che' bajche' ts'ijbubil.

⁶Jini cha'an tsa' majliyob jini x'ac'juñob i yʌc'ob jini jun ti pejtelel Israel yic'ot ti Judá che' bajche' tsi' ña'ta jini rey yic'ot x'e'telob i cha'an. Tsi' yʌlʌ ti jun: Israelob, cha' sutq'uin la' bʌ ti lac Yum i Dios Abraham yic'ot Isaac yic'ot Israel, cha'an mi' cha' uts'an i pusic'al ti' tojlel i colojbal israelob tsa' bʌ cʌleyob che' bʌ tsa' ñumi jini rey ti Asiria.

⁷Mach yomic lajaletla bajche' la' ñojte'elob yic'ot la' pi'ʌlob tsa' bʌ i contrajiyob lac Yum, i Dios lac ñojte'elob. Jini cha'an lac Yum tsi' yʌc'ʌyob ti jisʌntel che' bajche' woli la' q'uel wʌle.

⁸Mach la' tsʌts'esan la' pusic'al che' bajche' la' ñojte'elob. Ac'ʌ la' bʌ ti' wenta lac Yum. Yom mi la' tilel ti jini ch'ujul bʌ Templo i cha'an ti pejtelel ora. Ch'ujutesanla lac Yum Dios cha'an mi' lajmel i mich'ajel ti la' tojlel.

⁹Mi uts'at mi la' cha' ac' la' bʌ ti' tojlel lac Yum, mi caj i cha' p'untʌntelob la' pi'ʌlob yic'ot la' walobilob ya' ba' cʌchbilob. Mi caj i cha' julelob ti' lumal. Come wen uts i pusic'al lac Yum Dios. Jal mi' mich'an. Ma'anic mi caj i junyajlel choquetla mi tsa' la' sutq'ui la' bʌ ti' tojlel, che'en.

¹⁰Jini cha'an tsa' ñumiyob jini x'ac'juñob ti jujump'ejl tejclum ya' ti Efraín yic'ot ti Manasés c'ʌlʌl ti Zabulón, pero cabʌlob tsa' jach caji i tse'tañob. Tsi' wajleyob.

¹¹Pero lamital jini año' bʌ ti Aser yic'ot ti Manasés yic'ot ti Zabulón uts'at tsi' jac'beyob i t'an. Tsa' tiliyob ti Jerusalén.

¹²Lac Yum tsi' ñijcʌbeyob i pusic'al pejtelel jini winicob ti Judá cha'an mi' jac'beñob i t'an jini rey yic'ot i yaj e'telob ti jump'ejl i pusic'al come tilem i t'an ti lac Yum.

¹³Che' jini cabʌl winicob tsi' tempayob i bʌ ti Jerusalén che' ti mayo cha'an mi' melob Pascua.

¹⁴Tsa' caji i jisañob jini pulʌntib tac ti Jerusalén ba' tsi' ch'ujutesayob dioste' yic'ot jini pulʌntib tac ba' tsi' pulbeyob pom. Tsa' majli i chocob ya' ti' jajp ch'en ba' tsa' ñumi pa' i c'aba' Cedrón.

¹⁵Che' ti ñaxan bʌ tsic ti mayo jini winicob tsi' tsʌnsayob jini tiñʌme'. Jini motomajob yic'ot levíjob tsi' wen cha'leyob quisin, come ma'anic woli' melob i ye'tel che' bajche' yom. Tsi' sʌq'uesayob i bʌ. Tsi' ch'ʌmbeyob tilel i majtan lac Yum ti Templo.

¹⁶Tsa' caji i melob jini e'tel ti jujuntiquil che' bajche' tsi' yʌc'ʌ mandar Moisés i winic Dios. Jini motomajob tsa' caji i tsijcañob jini ch'ich' tsa' bʌ i ch'ʌmbeyob tilel levíjob.

¹⁷Cabʌlob ch'oyolo' bʌ ti Efraín, Manasés, Isacar, yic'ot Zabulón bibi'ob to ti' wut Dios, come maxto anic tsi' sʌq'uesayob i bʌ. Jini cha'an jini levíjob tsi' tsʌnsʌbeyob i tiñʌme' cha'an mi' sʌq'uesañob. Ezequías tsi' mele oración. Jini cha'an tsa' mejli i c'uxob jini Pascua, anquese tic'bil ti' mandar Dios. Ezequías tsi' yʌlʌ: C Yum, yom ma' ñusʌbeñob i mul pejtelel winicob woli bʌ i ña'tan i sajcañetob, anquese mach sʌq'uesʌbilobic che' bajche' tsa' wʌc'ʌ mandar, che'en.

²⁰Lac Yum tsi' yubibe i yoración Ezequías. Ma'anic tsi' jisa jini winicob.

²¹Wucp'ejl q'uin tsi' meleyob jini ñuc bʌ i q'uiñilel Pascua ya' ti Jerusalén jini israelob. Ti pejtelelob wen tijicñayob i pusic'al. Jini levíjob yic'ot jini motomajob tsi' ñuq'uesayob lac Yum ti jujump'ejl q'uin. Tsi' cha'leyob c'ay yic'ot música.

²²Ezequías tsi' subeyob wocolix i yʌlʌ jini levíjob tsa' bʌ i ch'ujutesayob lac Yum yic'ot música. Tijicñayob tsi' cha'leyob q'uiñijel wucp'ejl q'uin. Tsi' yʌq'ueyob i majtan lac Yum cha'an i ñʌch'tʌlel i pusic'al. Tsi' subeyob wocolix i yʌlʌ lac Yum i Dios i ñojte'elob. Tsi' subuyob i mul.

²³Jini winicob tsa' bʌ i tempayob i bʌ tsi' ña'tayob i chʌn cha'leñob q'uiñijel yambʌ wucp'ejl q'uin. Che' jini tsa' caji i cha' melob q'uiñijel yambʌ wucp'ejl q'uin cha'an tijicñayob i pusic'al.

²⁴Come Ezequías jini rey ti Judá tsi' yʌq'ue israelob jump'ejl mil alʌ tat wacax, yic'ot wucp'ejl mil tiñʌme'. Tsi' yʌq'ueyob ñuco' bʌ i ye'tel jump'ejl mil alʌ tat wacax yic'ot lujump'ejl mil tiñʌme'. Ti jim bʌ q'uin cabʌl motomajob tsi' sʌq'uesayob i bʌ.

²⁵Wen tijicña tsi' yubiyob pejtelel jini winicob ti Judá, yic'ot jini motomajob yic'ot levíjob, yic'ot jini israelob tsa' bʌ c'otiyob, yic'ot jini ya' bʌ chumulob mach bʌ i pi'ʌlobic.

²⁶Wen tijicñayob jini año' bʌ ti Jerusalén, come c'ʌlʌl ti oñiyi che' bʌ tsi' cha'le yumʌl Salomón i yalobil David, ma'anic tsa' ujti ti' tojlel israelob ñuc bʌ q'uin che' bajche' jini.

²⁷Che' ujtemix jini q'uin, jini motomajob yic'ot jini levíjob tsa' wa'leyob. Tsi' yʌq'ueyob i yutslel i t'an pejtel winicob. Lac Yum am bʌ ti Ch'ujul bʌ Ajñibʌl ya' ti panchan tsi' yubibeyob i yoración.