Read Chol 2 Cronicas 31 Bible Online

2 Cronicas 31 - Chol bible

2 Cronicas 31

¹Che' bʌ tsa' majliyob jini israelob, tsa' ñumiyob ti Jerusalén yic'ot ti pejtelel tejclum tac ti Judá, Benjamín, Efraín yic'ot Manasés. Tsi' laj c'ʌsʌyob jini dioste' yic'ot i yejtal tac jini quisintic jax bʌ dios Asera. Tsi' laj jemeyob jini pulʌntib tac. Che' jini tsa' cha' sujtiyob majlel ti' lumal, jujuntiquil ti' chumlib.

²Ezequías tsi' cha' t'oxbeyob i ye'tel motomajob yic'ot levíjob cha'an mi' q'uexob i bʌ ti e'tel ti jujunmojt cha'an mi' melob jini e'tel ti chajp ti chajp. An mu' bʌ i pulbeñob i majtan lac Yum. An mu' bʌ i yʌq'ueñob majtañʌl cha'an i ñʌch'tʌlel i pusic'al. Mi' yʌq'ueñob wocolix i yʌlʌ lac Yum. Mi' ñuq'uesañob lac Yum ti' ti' tac i yotot.

³Jini rey tsi' yʌc'ʌ alʌc'ʌl cha'an mi' pulel ti sʌc'ajel yic'ot ti ic'ajel, yic'ot ti' q'uiñilel c'aj o, yic'ot ti tsiji' bʌ uw, yic'ot che' mi' melob ñuc bʌ q'uiñijel che' bajche' ts'ijbubil ti' juñilel i mandar lac Yum.

⁴Tsi' subeyob jini chumulo' bʌ ti Jerusalén cha'an mi' yʌq'ueñob i diezmo jini motomajob yic'ot jini levíjob cha'an xuc'ul mi' melob i ye'tel ya' ti Templo che' bajche' ts'ijbubil ti' mandar Dios.

⁵Che' bʌ tsa' pam pujqui ili t'an, pejtel israelob tsa' caji i ch'ʌmob tilel jini ñaxan bʌ i wut i pʌc'ʌb, yic'ot vino, yic'ot olivo aceite, yic'ob chab, yic'ot pejtelel i wut pʌc'ʌbʌl. Tsi' laj ch'ʌmʌyob tilel i diezmo loq'uem bʌ ti pejtelel i pʌc'ʌb. Wen on tsi' yʌc'ʌyob. Jini israelob ya' bʌ chumulob ti Judá yic'ot i p'olbal Judá tsi' pʌyʌyob tilel ja'el i diezmojlel i wacax yic'ot i tiñʌme'. Tsi' ch'ʌmʌyob tilel ja'el i diezmojlel yan tac bʌ majtañʌl cha'an mi' yʌq'ueñob Dios. Che' jini cabʌl tsa' tempʌyi.

⁷Che' ti junio tsa' caji i much'quiñob i yofrenda. Jo'p'ejl uw tsi' much'quiyob. Ezequías yic'ot jini ñuco' bʌ i ye'tel, che' bʌ tsi' q'ueleyob tempʌbil jini ofrenda tac, tsi' yʌq'ueyob wocolix i yʌlʌ lac Yum. Tsi' yʌq'ueyob i yutslel i t'an jini winicob ti Israel.

⁹Ezequías tsi' c'ajtibeyob jini motomajob yic'ot levíjob baqui tilem pejtelel jini chubʌ'añʌl.

¹⁰Azarías jini ñuc bʌ motomaj (i pi'ʌl bʌ Sadoc) tsi' jac'be: Jiñʌch diezmo tac. C'ʌlʌl che' bʌ tsa' caji i ch'ʌmob tilel i yofrenda ti' yotot lac Yum, jasʌlon lojon. Uts'at mic cha'len lojon we'el. Cabʌl woli' tempʌyel i colojbal, come lac Yum woli' wen coltan jini tejclumob. Jini cha'an tsa' wen tempʌyi cabʌl chubʌ'añʌl, che'en.

¹¹Ezequías tsi' subeyob cha'an mi' melob tsalʌl ya' ti Templo ba' mi' lojtel jini majtañʌl. Jini cha'an che'ʌch tsi' cha'leyob.

¹²Ya' ti tsalʌl tac tsa' caji i yʌc'ob jini ñaxan tac bʌ i wut pʌc'ʌbʌl, yic'ot yan tac bʌ i majtan Dios. Ti' xuc'tilel i pusic'al tsi' yʌc'ʌyob ti' wenta jini leví i c'aba' Conanías. Simei i yeran Conanías tsi' colta ti e'tel.

¹³Yaño' bʌ tsi' coltayob ja'el: Jehiel, Azazías, Nahat, Asael, Jerimot, Jozabad, Eliel, Ismaquías, Mahat yic'ot Benaía. Ti pejtelelob tsa' wa'chocontiyob cha'an jini rey Ezequías yic'ot jini c'ax ñuc bʌ motomaj Azarías.

¹⁴Coré (i yalobil Imna jini leví) tsa' wa'choconti ti xcʌnta ti' otot ya' ti' tojel i pasibal q'uin. Tsa' ajni ti' wenta cha'an mi' ch'ʌm jini ofrenda tac tsa' bʌ aq'uenti lac Yum cha'an mi' pucbeñob jini motomajob. I pi'ʌlob ti e'tel jiñobʌch: Edén, Miniamin, Jesúa, Semaías, Amarías yic'ot Secanías. Yajcʌbilob cha'an mi' pucbeñob jini motomajob yic'ot i pi'ʌlob ti jujump'ejl tejclum ti mojt ti mojt. Lajal tsi' t'oxbeyob jini añobix bʌ i jabilel che' bajche' jini maxto bʌ anic i colel.

¹⁶Jini motomajob woliyo' bʌ ti e'tel ti Templo ti mojt ti mojt tsa' majliyob ti Templo cha'an mi' ch'ʌmob i bʌl i ñʌc' ti jujump'ejl q'uin yic'ot ch'iton bʌ i yalobilob.

¹⁷Jini motomajob tsa' ch'ʌjmiyob ti tsic ti' c'aba'ob i tatob, che' ja'el jini levíjob che' bʌ tsi' tajayob junc'al i jabilel. Tsa' ochiyob ti jun ti mojt ti mojt che' bajche' jaychajp an i ye'tel.

¹⁸Ti pejtelelob yic'ot i yijñamob yic'ot i yalobilob tsa' laj ochiyob ti jun. Tsa' aq'uentiyob i bʌl i ñʌc' che' bajche' jaytiquil añob. Come xuc'ulob ti' ye'tel Dios. Ma'anic yambʌ i ye'tel.

¹⁹Ti pejtelel jini tejclum i cha'an motomajob tsa' wa'chocontiyob winicob cha'an mi' t'oxbeñob i chubʌ'an jini motomajob, yic'ot jini levíjob ochemo' bʌ ti jun.

²⁰Che'ʌch tsi' mele jini rey Ezequías ti pejtelel Judá. Ti' xuc'tʌlel i pusic'al tsi' mele chuqui tac toj yic'ot chuqui tac uts'at ti' wut lac Yum Dios.

²¹C'ʌlʌl che' bʌ tsa' caji i tech i ye'tel ti Templo, Ezequías tsi' laj mele che' bajche' ts'ijbubil ti' juñilel mandar. Ti pejtelel ora tsi' tsajca lac Yum ti pejtelel i pusic'al. Tsa' wen mejli pejtel i ye'tel.