Read Chol 2 Cronicas 33 Bible Online

2 Cronicas 33 - Chol bible

2 Cronicas 33

¹An lajchʌmp'ejl i jabilel Manasés che' bʌ tsa' caji ti yumʌntel. Jo'p'ejl i yuxc'al (55) jab tsi' cha'le yumʌl ya' ti Jerusalén.

²Pero tsi' mele chuqui jontol ti' wut lac Yum che' bajche' jini winicob tsa' bʌ i jisa lac Yum ti' tojlel jini israelob cha'an jontol jax i melbalob.

³Tsi' cha' wa'choco jini pulʌntib tac tsa' bʌ i jeme Ezequías. Tsi' cha' wa'choco jini pulʌntib cha'an i ch'ujutesʌntel Baal. Tsi' cha' mele jini quisintic jax bʌ dios Asera. Tsa' caji i ch'ujutesan jini q'uin yic'ot uw, yic'ot ec'. Tsi' ñocchoco i bʌ ti' tojlel.

⁴Tsi' mele pulʌntib ti' patiojlel i Templo lac Yum cha'an mi' ch'ujutesañob jini q'uin yic'ot jini uw yic'ot jini ec'. Tsi' meleyob ya' ti Jerusalén ba' yom mi' c'uxbintel i c'aba' lac Yum ti pejtelel ora che' bajche' tsi' yʌlʌ.

⁶Manasés tsi' pulu ti c'ajc i yalobilob cha'an i majtan dioste' ya' ti joctʌl i c'aba' Hinom. Tsi' wen q'uele ti ñuc jini xwujtob yic'ot xtic'layajob yic'ot jini xpejca xibajob. Tsi' xiq'uiyob ti' ye'tel. Tsi' yutsi p'ojlesʌbe i mich'ajel lac Yum cha'an jontol jax i melbal.

⁷Tsi' ñumen cha'le mulil che' bʌ tsi' yotsa dioste' ti' Templo* lac Yum. Tsi' ñusʌbe i t'an lac Yum tsa' bʌ i sube David yic'ot Salomón i yalobil: “Mi caj i yajñel j c'aba' ti pejtelel ora wʌ' ti Jerusalén, ti jini tejclum tsa' bʌ c yajca ti' tojlel israelob.

⁸Ma'anic ba' ora mi caj c choc loq'uel jini israelob ti ili lum tsa' bʌ cʌq'ueyob i ñojte'elob mi xuc'ul mi' chʌn jac'ob pejtelel c mandar che' bajche' tsi' cʌntesayob Moisés”, che'en lac Yum.

⁹Pero Manasés tsa' caji i socob jini chumulo' bʌ ti Judá yic'ot ti Jerusalén. Tsa' caji i cʌntesañob ti jontolil ñumen bajche' jini tejclumob tsa' bʌ i jisa lac Yum ti' tojlel israelob.

¹⁰Lac Yum tsi' pejca Manasés yic'ot jini año' bʌ ti tejclum, pero ma'anic tsi' jac'beyob i t'an.

¹¹Jini cha'an lac Yum tsi' choco tilel jini asiriajob cha'an mi' contrajiñob. Tsi' cʌchʌyob majlel ti cadena ya' ti Babilonia.

¹²Che' cabʌl i wocol Manasés, tsi' wen peq'uesa i bʌ ti' tojlel lac Yum, i Dios i ñojte'elob.

¹³Che' bʌ tsi' pejca ti oración, lac Yum tsi' yubibe i t'an. Tsi' cha' aq'ue i ye'tel ya' ti Jerusalén. Che' jini Manasés tsi' ñopo Diosʌch lac Yum.

¹⁴Che' ñopolix i cha'an lac Yum, tsi' wa'choco jini ts'ajc am bʌ ti' tojel i tejclum David yic'ot jini ts'ajc am bʌ ti' tojel i bʌjlibal q'uin ya' ti Gihón, ya' ti joctʌl i c'aba' Cedrón, c'ʌlʌl ti jini puerta i c'aba' Chʌy. Tsi' wa'choco ja'el c'ʌlʌl ti bujtʌl i c'aba' Ofel. Wen chan tsi' ts'ajqui letsel. Che' ja'el tsi' wa'choco i yumob soldadojob ti pejtelel jini ts'ajquibil bʌ tejclum ti Judá.

¹⁵Tsi' jeme pejtelel jini dioste' ti bujbujtʌl tac. Tsi' cha' loc'sa ti' Templo lac Yum jini leco tac bʌ tsa' bʌ i lon otsa. Tsi' laj jeme pejtel jini pulʌntib tsa' bʌ i wa'choco ya' ti wits ti' t'ejl i Templo lac Yum yic'ot ti Jerusalén. Ñajt tsa' majli i choc ti' ti' jini tejclum.

¹⁶Tsi' cha' mele jini pulʌntib i cha'an lac Yum. Tsi' tsʌnsʌbe i majtan lac Yum cha'an i ñʌch'tʌlel i pusic'al. Tsi' yʌq'ue i yofrenda yic'ot wocolix i yʌlʌ. Tsi' sube pejtelel jini año' bʌ ti Judá cha'an mi' melob chuqui yom lac Yum, i Dios israelob.

¹⁷Pero jini tejclumob tsa' chʌn majliyob ti bujbujtʌl cha'an mi' pulbeñob i majtan lac Yum, anquese jini jach lac Yum tsi' ch'ujutesayob.

¹⁸Laj ts'ijbubil ti' juñilel i reyob Jerusalén pejtel i melbal jini Manasés yic'ot i yoración che' bʌ tsi' ñopo lac Yum, yic'ot i t'an jini x'alt'añob tsa' bʌ i pejcayob ti' c'aba' lac Yum i Dios israelob.

¹⁹Laj ts'ijbubil ti' juñilel jini x'alt'añob i yoración Manasés, yic'ot i p'untʌntel ti Dios, yic'ot pejtelel i mul che' bʌ tsi' ñusʌbe i t'an Dios, yic'ot i c'aba' jini tejclum tac ba' tsi' wa'choco pulʌntib, yic'ot ba' tsi' mele jini dios Asera yic'ot yan tac bʌ dioste' che' maxto anic tsi' peq'uesa i bʌ.

²⁰Tsa' chʌmi Manasés. Tsi' mucuyob ti yebal i yotot. Che' jini tsa' ochi ti' ye'tel Amón i yalobil.

²¹An cha'p'ejl i cha'c'al (22) i jabilel Amón che' bʌ tsa' caji ti yumʌntel. Cha'p'ejl jab tsi' mele i ye'tel ya' ti Jerusalén.

²²Tsa' caji i mel chuqui jontol ti' wut lac Yum che' bajche' tsi' mele Manasés ti ñaxan. Tsi' cha' wa'choco jini dioste' tac. Tsa' caji i tsʌnsʌben i majtan che' bajche' tsi' mele i tat.

²³Pero ma'anic tsi' peq'uesa i bʌ ti' wut lac Yum che' bajche' i tat. Tsa' caji i yutsi mel chuqui jontol ti' wut lac Yum.

²⁴Pero jini x'e'telob i cha'an tsa' caji i ts'a'leñob. Tsa' majli i tsʌnsañob ti' yotot.

²⁵Jini winicob ti tejclum tsi' laj tsʌnsayob jini x'e'telob tsa' bʌ i tsʌnsayob jini rey Amón. Ti pejtelelob ya' ti Judá tsi' yajcayob Josías cha'an mi' yumʌntel ti' q'uexol i tat.