Read Chol 2 Cronicas 34 Bible Online

2 Cronicas 34 - Chol bible

2 Cronicas 34

¹An jax to waxʌcp'ejl i jabilel Josías che' bʌ tsa' ochi ti rey ya' ti Jerusalén. Tsi' cha'le yumʌl jump'ejl i yuxc'al (31) jab.

²Tsi' mele chuqui uts'at ti' wut lac Yum. Tsi' chʌn tsajcʌbe i melbal David i ñojte'el. Ma'anic tsi' xoyo i bijlel mi ti' ñoj mi ti' ts'ej.

³Che' waxʌcp'ejlix jab i ye'tel ti rey che' wʌclujump'ejlix (16) i jabilel, Josías tsa' caji i wen ñop lac Yum i Dios David, jini i ñojte'el. Che' junc'alix i jabilel, tsa' caji i cha' sʌq'uesan Judá yic'ot Jerusalén. Tsi' jeme pejtelel jini pulʌntib yic'ot i yejtal tac Asera, yic'ot yan tac bʌ dioste'.

⁴Tsi' jembe i pulʌntib Baal, yic'ot i yajñib pom am bʌ ti' chañelal jini pulʌntib. Tsi' bic'ti top'o ja'el jini dios Asera, yic'ot yan tac bʌ dioste'. Tsa' majli i p'ujp'un i ts'ubeñal ba' muculob jini tsa' bʌ i tsʌnsʌbeyob i majtan.

⁵Tsi' pulbeyob i bʌquel jini motomajob ya' ti pulʌntib tac ba' tsi' cha'leyob i motomajil. Che' jini tsi' sʌq'uesa Judá yic'ot Jerusalén.

⁶Che'ʌch tsi' mele ja'el ti' tejclum tac Manasés yic'ot Efraín yic'ot Simeón c'ʌlʌl ti Neftalí.

⁷Tsi' jeme pejtelel jini pulʌntib tac, yic'ot jini quisintic jax bʌ dios Asera, yic'ot yan tac bʌ dioste' ti pejtelel i lumal Israel. Che' jini tsa' cha' sujti ti Jerusalén.

⁸Che' waxʌclujump'ejlix (18) jab i ye'tel jini rey, che' woli' sʌq'uesan pejtel i lumal Judá yic'ot jini Templo, Josías tsi' choco majlel Safán (i yalobil Azalía), yic'ot Maasías i yum tejclum, yic'ot Joa (i yalobil Joacaz) jini tesorero, cha'an mi' cha' melob i yotot Dios.

⁹Che' jini tsa' majliyob ba'an jini ñuc bʌ motomaj i c'aba' Hilcías. Tsi' yʌq'ueyob jini taq'uin tsa' bʌ i ch'ʌmʌyob tilel ti' yotot Dios tsa' bʌ i ch'ʌmʌyob jini levíjob año' bʌ ti' ti' Templo. Tsi' yʌc'ʌyob ofrenda jini ch'oyolo' bʌ ti Manasés yic'ot Efraín, yic'ot i colojbal Israel, yic'ot Judá, yic'ot Benjamín, yic'ot jini chumulo' bʌ ti Jerusalén.

¹⁰Jini levíjob tsi' yʌq'ueyob xq'uel e'telob ya' ti' Templo Dios. Jini xq'uel e'telob tsi' t'oxbeyob jini x'e'telob tsa' bʌ i c'ʌñʌyob cha'an mi' cha' wen melob ti uts'at i yotot lac Yum. Tsi' tojoyob jini xjuc'te'ob yic'ot jini mu' bʌ i top'ob xajlel. Tsi' mʌñʌyob jini toj'esʌbilix bʌ xajlel yic'ot te'. Tsi' cha' wa'chocoyob ba' tsa' jejmi ti' wenta yaño' bʌ reyob ti Judá.

¹²Xuc'ul tsi' meleyob i ye'tel ili winicob. Jini xq'uel e'telob jiñobʌch levíjob: Jahat yic'ot Abdías (i yalobil Merari) yic'ot Zacarías yic'ot Mesulam (i yalobilob Coat). Jini levíjob laj yujilob c'ay yic'ot i ñijcʌntel música.

¹³Lamital yujilob ts'ijbujel, yaño' bʌ tsi' q'ueleyob xcuchijelob, yaño' bʌ tsi' tsiquiyob taq'uin, yaño' bʌ tsi' cʌntayob i ti' otot.

¹⁴Che' woli' yotsan ti jun jini taq'uin tsa' bʌ ch'ʌjmi tilel ti' ti' Templo, jini motomaj Hilcías tsi' taja jun ba' ts'ijbubil i t'an lac Yum tsa' bʌ aq'uenti Moisés.

¹⁵Hilcías tsi' sube jini sts'ijbaya Safán: Tsac taja i juñilel i mandar Dios ti' yotot lac Yum, che'en. Che' jini Hilcías tsi' yʌq'ue jini jun Safán.

¹⁶Safán tsi' ch'ʌmʌ majlel ba'an jini rey. Tsa' caji i suben bajche' woli' yujtel ti uts'at pejtel jini e'tel ti Templo ti' wenta jini wa'chocobilo' bʌ.

¹⁷Safán tsi' sube jini rey: Tsa'ix i tempayob jini taq'uin tsa' bʌ tajle ti' yotot Dios. Tsa'ix aq'uenti ti' wenta jini xq'uel e'telob yic'ot jini winicob woli bʌ i melob jini e'tel.

¹⁸Jini motomaj Hilcías tsi' yʌq'ueyon jun, che'en. Che' jini Safán tsa' caji i pejcan jini jun ti' tojlel jini rey.

¹⁹Che' bʌ tsi' yubi i juñilel mandar, jini rey tsi' jet' tsili i pislel.

²⁰Tsi' pʌyʌ tilel Hilcías yic'ot Ahicam (i yalobil Safán), yic'ot Abdón (i yalobil Micaía), yic'ot jini sts'ijbaya Safán, yic'ot Asaías i yaj e'tel jini rey.

²¹Tsi' subeyob: Cucula cha'an mi la' wubiben i t'an lac Yum. C'ajtiben bajche' mi caj cujtel yic'ot pejtel Israel yic'ot Judá, come an lac mul ti' tojlel ili jun tsa' bʌ tajle. Lac Yum woli' wen mich'leñonla, come lac ñojte'elob tsi' ñusʌbeyob i t'an lac Yum. Ma'anic tsi' meleyob che' bajche' ts'ijbubil ti jun, che'en Josías.

²²Jini cha'an Hilcías yic'ot yambʌ x'e'telob i cha'an jini rey tsa' majliyob ba'an jini x'alt'an Hulda, i yijñam Salum (i yalobil Ticva, i yalobil Harhas). Salum jiñʌch am bʌ ti' wenta cha'an mi' q'uel i pislel rey. Ya' chumul Hulda ti Jerusalén ti jini alʌ tejclum am bʌ ti entʌl. Tsa' caji i c'ajtibeñob che' bajche' subebilob cha'an jini rey.

²³Jini x'ixic tsi' jac'ʌ: Lac Yum i Dios Israel tsi' yʌlʌ: “Subenla jini winic tsa' bʌ i chocoyetla tilel tic tojlel: Lac Yum tsi' yʌlʌ:

²⁴Mi caj c jisan ili tejclum yic'ot jini wʌ' bʌ chumulob. Mi caj i tajob pejtelel jini wocol ts'ijbubil bʌ ti ili jun tsa' bʌ i q'uele jini rey ti Judá.

²⁵Come tsi' cʌyʌyoñob. Tsi' yʌq'ueyob i majtan dioste'. Tsi' techbeyoñob c mich'ajel cha'an pejtelel i melbal. Jini cha'an mi caj c jisan ili tejclum tic mich'ajel. Ma'anic majch mi' mʌctañon”. Che' tsi' yʌlʌ lac Yum.

²⁶Pero subenla jini rey ti Judá tsa' bʌ i chocoyetla tilel cha'an mi la' wubiben i t'an lac Yum: Lac Yum i Dios Israel tsi' yʌlʌ: “Tsa' wen ubibeyon c t'an che' bʌ tsa' q'uejli ili jun.

²⁷Tsa' mele a pusic'al. Tsa' peq'uesa a bʌ ti' tojlel Dios che' bʌ tsa' wubibe i t'an ti contra ili lum yic'ot i winicob. Tsa' tsili a pislel, tsa' cha'le uq'uel tic tojlel. Jini cha'an tsa'ix c ñich'tʌbeyet a t'an, che'en lac Yum.

²⁸Mi caj c pʌyet majlel ba'an a tatob. Ti' ñʌch'tʌlel a pusic'al mi caj a chʌmel. Ma'anic mi caj a q'uel pejtelel jini wocol mu' bʌ caj c chocbeñob tilel jini chumulo' bʌ ti ili tejclum”. Che' tsi' yʌlʌ lac Yum, che'en Hulda. Jini winicob tsa' majli i subeñob jini rey pejtelel chuqui tsi' yubiyob.

²⁹Jini rey tsi' pʌyʌ tilel pejtelel jini xñoxob ti Judá yic'ot ti Jerusalén.

³⁰Jini rey tsa' majli ti' yotot lac Yum yic'ot pejtel chumulo' bʌ ti Judá, yic'ot ti Jerusalén, yic'ot jini motomajob, yic'ot jini levíjob, yic'ot jini año' bʌ i ye'tel yic'ot jini ch'itoñob yic'ot jini xñoxob. Ya' tsa' caji i pejcañob pejtel jini jun tsa' bʌ tajle ti' yotot lac Yum.

³¹Che' wa'al jini rey ti' wutob jini winicob x'ixicob, tsi' wa'choco i t'an ti' tojlel lac Yum cha'an mi caj i jac'ben i mandar ti pejtelel i pusic'al, cha'an mi' laj mel che' bajche' ts'ijbubil ti jini jun.

³²Tsi' sube pejtelel jini año' bʌ ti Jerusalén yic'ot Benjamín, cha'an mi' yʌc'ob i t'an ja'el. Jini cha'an tsi' laj meleyob Trato yic'ot lac Yum, i Dios i ñojte'elob.

³³Josías tsi' choco loq'uel pejtelel jini dioste' ti' lumal israelob. Tsi' pʌsbeyob bajche' yom mi' melbeñob i ye'tel lac Yum Dios ti pejtelelob. Ma'anic tsi' chʌn tʌts'ʌyob i bʌ ba'an lac Yum i Dios i ñojte'elob che' cuxul to Josías.