Read Chol 2 Cronicas 4 Bible Online

2 Cronicas 4 - Chol bible

2 Cronicas 4

¹Tsi' mele ja'el jump'ejl pulʌntib ti bronce am bʌ i ñajtlel lujump'ejl metro, yic'ot lujump'ejl metro i xujc. I chanlel jiñʌch jo'p'ejl metro.

²Tsi' mele ja'el joyol bʌ i yajñib ja'. I ñajtlel jo'p'ejl metro. Wen toj xotocña i yajñib ja'. An ojlil i yuxp'ejl metro i chanlel yic'ot jo'lujump'ejl metro i joytʌlel.

³Tsi' melbeyob i c'ʌclib i yajñib ja' yic'ot i yejtal tac tat wacax melbil bʌ ti bronce. Ya' c'ʌcʌl i yajñib ja' ti' pat jini melbil tac bʌ wacax. Cha'tsolom tsa' mejli i yejtal tac wacax. Junsujm jach tsi' meleyob ti bronce i yajñib ja' yic'ot i yejtal tac wacax.

⁴Ya' c'ʌcʌl i yajñib ja' ti lajchʌncojt tat wacax. Uxcojt ti' tojel norte, uxcojt ti' tojel i bʌjlibal q'uin, uxcojt ti' tojel sur, yic'ot uxcojt ti' tojel i pasibal q'uin.

⁵Jumpajch' c'ʌbʌl i pimlel i yajñib ja'. Xujlup'tic i ti' che' bajche' i nich pimel. Mi' yochel 110,000 litro ja' ti' mal.

⁶Che' ja'el tsi' mele yambʌ lujump'ejl i yajñib ja'. Jo'p'ejl tsi' yʌc'ʌ ti' ñoj jini colem bʌ, jo'p'ejl ti' ts'ejtilel cha'an ya'i mi' pocob jini majtañʌl. Pero jini motomajob tsi' c'ʌñʌyob jini colem bʌ i yajñib ja' cha'an mi' pocob i bʌ.

⁷Tsi' mele ja'el jump'ejl i yajñib c'ajc yic'ot oro. Tsi' yʌc'ʌ ya' ti Templo, jo'p'ejl ya' ti' ñoj, jo'p'ejl ti' ts'ejtʌlel.

⁸Tsi' mele ja'el jump'ejl mesa cha'an mi' yʌc' ti Templo. Jo'p'ejl ti' ñoj, jo'p'ejl ti' ts'ejtilel. Che' ja'el tsi' mele jo'c'al colem taza tac ti puro oro.

⁹Tsi' mele ja'el patio cha'an motomajob, yic'ot colem patio cha'an pejtelel mu' bʌ i c'otelob. Tsi' wa'choco i ti' tac jini patio melbil bʌ ti bronce.

¹⁰Jini colem bʌ i yajñib ja' tsi' yʌc'ʌ ya' ti sureste ti' t'ejl jini Templo.

¹¹Hiram tsi' mele taza tac, yic'ot alʌ pala tac, yic'ot colem taza tac. Tsi' laj ujtesa pejtelel jini e'tel ti' yotot lac Yum Dios che' bajche' yom jini rey Salomón.

¹²Cha'ts'ijt oy yic'ot i ch'ajñal tac, i ch'ʌjlil tac i jol, cha'p'ejl cadena cha'an i ch'ʌjlil i jol, jumbajc' granada, jo'c'al tac bʌ ya' ti jini cha'tsolom cadena, i c'ʌclib tac i yajñib ja', jini colem bʌ i yajñib ja' c'ʌcʌl bʌ ti lajchʌncojt i yejtal tat wacax, jini p'ejt tac yic'ot alʌ pala tac, yic'ot rocol tac bʌ. Hiram tsi' laj mele ti bronce pejtelel iliyi. Jiñʌch tsa' bʌ i yʌc'ʌ ti melol jini rey Salomón.

¹⁷Jini rey Salomón tsi' yulmesa jini bronce ya' ti joctʌl bʌ lum ti Jordán, ya' baqui an sʌsʌc lumil. Jini lum xinlʌpʌl an ti' tojel Sucot yic'ot Seredata. Ma'anic majch tsa' mejli i ña'tan bajche' c'amel i yalel jini bronce tsa' bʌ ujti ti c'ʌjñel cha'an jini e'tel.

¹⁹Pero puro oro tsa' c'ʌjñi ya' ti Templo. Come Salomón tsi' yʌlʌ cha'an mi' c'ʌjñel puro oro cha'an jini pulʌntib, yic'ot pejtelel e'tijibʌl tac, yic'ot jini mesa ba' mi' pʌsbentel waj lac Yum.

²⁰Laj melbil ti oro tac ja'el i yajñib tac c'ajc, yic'ot jini lámpara tac cha'an mi' tsujq'uel ya' ti c'ax Ch'ujul bʌ Ajñibʌl.

²¹Melbil ti oro i nich tac te', yic'ot jini chucoñib tac,

²²yic'ot i ñʌc' tac bojte', yic'ot jini colem taza tac, yic'ot jini cuchara tac, yic'ot i yajñib pom, laj melbil ti oro. Che' ja'el i ti' otot ba' mi la cochel ti Templo melbil ti oro, yic'ot i ti' jini C'ax Ch'ujul bʌ Ajñibʌl.