Read Chol 2 Cronicas 5 Bible Online

2 Cronicas 5 - Chol bible

2 Cronicas 5

¹Che' jini Salomón tsa' ujti i mel i yotot Dios. Tsi' yotsa pejtel i bʌl Templo tsa' bʌ i yʌq'ue lac Yum jini rey David. Tsi' laj loto yic'ot i chubʌ'an jini rey letsem tac bʌ i tojol.

²Salomón tsi' pʌyʌ tilel ti Jerusalén pejtelel jini xñoxob yic'ot jini ñuco' bʌ i ye'tel ti jujunmojt i p'olbal Israel cha'an mi' loc'sañob jini Arca am bʌ ti Tabernáculo ti' tejclum David c'ʌlʌl ti Sion ti wits, cha'an mi' q'uechob tilel ti Templo.

³Tsi' meleyob q'uin che' ti' yorajlel i q'uiñilel Tabernáculo, che' ti octubre.

⁴Che' c'otemix pejtel jini xñoxob ti Israel, jini levíjob tsa' caji i loc'sañob jini Arca ya' ti Tabernáculo. Tsi' q'uecheyob tilel jini Arca yic'ot pejtelel jini ch'ujul bʌ e'tijibʌl.

⁶Jini rey Salomón yic'ot pejtelel israelob tsa' bʌ i tempayob i bʌ ti' tojlel jini Arca tsi' yʌq'ueyob lac Yum tsʌnsʌbil tac bʌ i majtan. Ma'anic tsa' mejli ti tsijquel come cabʌlob.

⁷Jini motomajob tsi' q'uecheyob ochel jini Arca ya' ti C'ax Ch'ujul bʌ Ajñibʌl ti mal Templo. Xinlʌpʌl tsi' yʌc'ʌyob ba' wa'al ángelob tich'bil bʌ i wich'. Ya' mosbil jini Arca yic'ot i te'el ti' yebal i wich'.

⁹Wen tam cha'ts'ijt bara cha'an Arca. Ya' ti Ch'ujul bʌ Ajñibʌl tsa' ts'ita' tsictiyi i ñi' bara ba' tsa' xic'le ti pisil. Pero ma'anic tsa' tsictiyi ti jumpat. Ya'to an c'ʌlʌl wʌle che' woli' ts'ijbuntel ili jun.

¹⁰Ma'anic i bʌl jini Arca, cojach jini cha'q'uejl xajlel tsa' bʌ i yotsa Moisés ya' ti Horeb che' bʌ tsi' mele trato lac Yum yic'ot jini israelob tsa' bʌ loq'uiyob ti Egipto.

¹¹Che' bʌ tsi' sʌq'uesayob i bʌ jini motomajob, tsi' ch'ujutesayob Dios. Jini levíjob tsi' ch'ujutesayob lac Yum ti c'ay che' bʌ tsa' loq'uiyob jini motomajob ti jini C'ax Ch'ujul bʌ Ajñibʌl. Tsi' cha'leyob c'ay Asaf, yic'ot Hemán, yic'ot Jedutún, yic'ot i yalobilob i yerañob, lʌpʌlob i cha'an lino bʌ pisil wen fino bʌ. Ya' tsa' wa'leyob ti' t'ejl jini pulʌntib ti' pasibal q'uin. Añob i cha'an címbalo, yic'ot salterio, yic'ot arpa tac. Añob wʌcc'al motomajob tsa' bʌ i wusuyob trompeta.

¹³Jini xc'ayob yic'ot xñijca músicajob tsi' tem ch'ujutesayob Dios. Tsi' subeyob wocolix i yʌlʌ ti c'ay. Tsi' wusuyob trompeta. Tsi' ñijcayob címbalo yic'ot yan tac bʌ música che' bʌ tsi' ch'ujutesayob lac Yum: Come wen uts'atax lac Yum, come ti pejtelel ora an i yutslel i pusic'al, che'ob. Ti jini jach bʌ ora tsa' bujt'i ti tocal i yotot lac Yum. Ma'anix tsa' chʌn mejli i melob i ye'tel motomajob cha'an i sʌclel jini tocal.