Read Chol 2 Cronicas 7 Bible Online

2 Cronicas 7 - Chol bible

2 Cronicas 7

¹Che' bʌ tsa' ujti ti oración Salomón, tsa' jubi tilel c'ajc ti panchan. Tsi' laj pulu jini majtañʌl ya' ti pulʌntib. Ma'anix tsa' chʌn mejliyob ti ochel ti' yotot Dios jini motomajob, come tsa' bujt'i jini Templo yic'ot i ñuclel lac Yum.

³Che' bʌ tsi' q'ueleyob i ñuclel, tsi' pʌcchocoyob i bʌ ti lum jini israelob. Tsi' ch'ujutesayob lac Yum. Tsi' subeyob wocolix i yʌlʌ: Come wen uts'at lac Yum, come ti pejtelel ora an i yutslel i pusic'al, che'ob.

⁴Che' jini tsa' caji i melbeñob i q'uiñilel jini Templo. Jini rey yic'ot pejtelel jini tempʌbilo' bʌ tsa' caji i tsʌnsʌbeñob i majtan lac Yum. Salomón tsi' yʌc'ʌ cha'p'ejl i cha'c'al mil (22,000) wacax, yic'ot wʌcc'al mil (120,000) tiñʌme'.

⁶Jini motomaj tsi' meleyob i ye'tel. Jini levíjob tsi' ñijcayob música melbil bʌ i cha'an David cha'an mi' ñuq'uesʌntel lac Yum. Tsi' cha'leyob c'ay ti' tojlel lac Yum: Come ti pejtelel ora an i yutslel i pusic'al, che'ob, che' bajche' tsi' cha'le ch'ujutesaya David. Jini motomajob tsi' wusuyob trompeta tac ti' tojlel lac Yum che' wa'alob pejtelel israelob.

⁷Salomón tsi' yʌc'ʌ ti' wenta lac Yum jini patio am bʌ ti' tojel jini Templo ba' tsi' pulbeyob i majtan lac Yum, come wen on jini majtañʌl. Ma'anic tsa' mejli i laj pul ya' ti jini pulʌntib melbil bʌ ti bronce.

⁸Wucp'ejl q'uin tsi' cha'le q'uiñijel Salomón yic'ot pejtelel israelob. Cabʌlob tsa' bʌ i tempayob i bʌ cha'an i q'uiñilel lejchempat. Tsa' c'otiyob ja'el jini ch'oyolo' bʌ ti Hamat yic'ot yambʌ tejclum tac c'ʌlʌl ti jini pa' am bʌ ti Egipto.

⁹Che' ti waxʌcp'ejlel q'uin tsi' cha' tempayob i bʌ pejtelel jini winicob, come wucp'ejl q'uin tsi' meleyob i q'uiñilel jini pulʌntib.

¹⁰Che' ti wucp'ejl tsic ti octubre tsi' chocoyob sujtel pejtelel jini winicob ti' lumal. Tsi' yubiyob i tijicñʌyel i pusic'al cha'an cabʌl i bendición lac Yum Dios ti' tojlel David yic'ot Salomón, yic'ot pejtelel jini israelob.

¹¹Che'ʌch tsa' ujti i mel jini Templo yic'ot i yotot Salomón. Tsa' mejli i lu' mel che' bajche' yom i pusic'al.

¹²Ti jump'ejl ac'ʌlel tsa' tsictiyi lac Yum ti' tojlel Salomón. Tsi' sube: Tsa'ix c ñich'tʌbeyet a woración. Tsa'ix c yajca ili Templo cha'an wʌ'i mi caj c ch'ʌm c majtan.

¹³Mi tsaj cʌyʌ c choc tilel ja'al, mi tsac choco tilel sajc' cha'an mi' jisan pejtelel pʌc'ʌbʌl, mi tsac choco tilel jontol bʌ c'amʌjel ti' tojlel c winicob x'ixicob,

¹⁴yom mi' peq'uesañob i bʌ. Mi tsa' caji i pejcañoñob ti oración, mi tsi' cʌyʌyob i jontolil yic'ot leco bʌ i melbalob cha'an mi' tsajcañon, che' jini mi caj c ñich'tʌbeñob i yoración wʌ' ba'añon ti panchan. Mi caj c ñusʌbeñob i mul. Mi caj c lajmesʌbeñob i wocol cha'an i mul.

¹⁵Mi caj c chʌcʌ ubin la' woración ti ili otot. Mi caj j q'ueletla.

¹⁶Come tsa'ix c yajca ili Templo. Tsa'ix c sʌq'uesa ja'el cha'an cotot ba' mi caj cajñel ti pejtelel ora. Mi caj j q'uele' ti pejtelel ora come tsac ch'ʌmʌ tic wenta tic pusic'al.

¹⁷Mi ti pejtelel ora ma' chʌn tsajcañon che' bajche' a tat David, mi xuc'ul ma' mel ti pejtelel jini mu' bʌ c subeñet,

¹⁸joñon mi caj c xuc'chocon a yumʌntel ti a tojlel yic'ot ti' tojlel a p'olbalob ti pejtelel ora che' bajche' tsac sube a tat David ti xuc'ul bʌ t'an: “Ti pejtelel ora a p'olbal mi caj i cha'len yumʌntel ti a buchlib ti' tojlel israelob”, cho'on tsac sube.

¹⁹Pero mi mach xuc'uleticla quic'ot, mi tsa' la' cʌyʌ la' jac'beñon c subal yic'ot c mandar cha'an mi la' ch'ujutesan jini mach bʌ diosic,

²⁰che' jini mi caj c choquetla ti la' lum tsa' bʌ cʌq'ueyetla. Mi caj c jisan ili Templo tsa' bʌ c sʌq'uesa cha'an i ch'ujutesʌntel j c'aba'. Mi caj la' wajlentel, mi caj la' wʌjq'uel ti quisin ti' tojlel yan tac bʌ tejclum.

²¹Majqui jach mi' ñumel che' mi' q'uel jejmenix ili i t'ojol jax bʌ cotot mi caj i toj sajtel i pusic'al. Mi caj i yʌl: “¿Chucoch woli' yʌc' ti ts'a'lentel i yotot yic'ot i lum jini lac Yum?” che'en.

²²Yambʌ mi caj i jac': “Cha'an tsi' cʌyʌyob lac Yum i Dios tsa' bʌ i loc'sa ti Egipto i ñojte'elob. Wʌle wolix i tsajcañob ñumel yambʌ dios tac cha'an mi' ch'ujutesañob. Jini cha'an lac Yum woli' chocbeñob tilel pejtel ili wocol ti' caj i mulob”, che'en. Che' tsi' sube Salomón jini lac Yum.