Read Chol 2 Cronicas 9 Bible Online

2 Cronicas 9 - Chol bible

2 Cronicas 9

¹Che' bʌ tsi' yubi jini x'ixic bʌ rey ya' ti Sabá cabʌlʌch i ña'tʌbal Salomón, tsa' majli ti Jerusalén cha'an mi' c'ajtiben chuqui tac wocol ti ña'tʌntel. Tsa' majli yic'ot x'e'telob i cha'an, yic'ot camello cuchbil bʌ i cha'an ts'ac xojocña bʌ i yujts'il, yic'ot oro, yic'ot wen i t'ojol tac bʌ xajlel. Che' bʌ tsa' c'oti, tsi' laj sube Salomón chuqui yom i ña'tan.

²Salomón tsi' laj jac'be. Ma'anic chuqui mʌcʌl mach bʌ anic tsi' ch'ʌmbe isujm. Salomón tsi' laj tsictesʌbe.

³Che' bʌ tsi' lu' q'uele chuqui an, jini x'ixic tsi' ña'ta isujm che' bajche' tsi' yubi. Cabʌlʌch i ña'tʌbal Salomón, wen i t'ojol jax i yotot, wen chajpʌbil pejtel i bʌl ñʌc'ʌl ya' ti mesa, cabʌl i pusic'al jini x'e'telob i cha'an, wen fino i pislel i yaj e'telob. Tsi' q'uele laj uts'atob i pislel i winicob tsa' bʌ i ñusʌbeyob i bʌl i ñʌc', yic'ot jini xcʌntayajob i cha'an wen p'ip'ob i pusic'al. Tsa' toj sajti i pusic'al jini x'ixic.

⁵Tsa' caji i suben jini rey: Isujm pejtel chuqui tsa cubi ya' tic lumal. Wen cabʌl a ña'tʌbal.

⁶Che' bʌ tsa cubi, ma'anic tsac wen ñopo jinto tsa' tili j q'uel. Isujm lamital jach tsa cubi come ñumen to a ñuclel yic'ot a ña'tʌbal bajche' tsa' subentiyon.

⁷Tijicñayob a winicob año' bʌ a wic'ot ti jujump'ejl q'uin mu' bʌ i yubiñob a t'an.

⁸Wen ñuc a Dios tsa' bʌ i yajcayet cha'an ma' wa'chocontel ti rey. Tsiquil cabʌl mi' c'uxbin jini israelob. Jini cha'an tsi' wa'chocoyet ti rey cha'an ma' melob ti toj che' bajche' yom cha'an xuc'ul mi' yajñelob ti pejtelel ora, che'en jini x'ixic bʌ rey.

⁹Tsi' yʌq'ue i majtan Salomón lajchʌmp'ejl millón peso oro yic'ot xojocña bʌ ts'ac yic'ot uts'at bʌ xajlel. Ma'anic yambʌ jini xojocña bʌ che' bajche' jini ti pejtelel i yumʌntel.

¹⁰I winicob Hiram yic'ot i winicob Salomón tsi' ch'ʌmbeyob c'otel oro ja'el tilem bʌ ti Ofir, yic'ot sándolo te', yic'ot i t'ojol tac bʌ xajlel.

¹¹Jini rey tsi' c'ʌñʌ jini te' cha'an mi' mel quejpʌctic bʌ t'uchlibʌl cha'an mi lac letsel, yic'ot cha'an mi lac jubel ti Templo, yic'ot ti' yochib i yotot rey. Tsi' c'ʌñʌ jini te' ja'el cha'an i melol arpa yic'ot salterio mu' bʌ i ñijcañob jini xc'ayob. Ti pejtelel i lumal Judá ma'anic i t'ojol jax bʌ música tac lajal bajche' jini.

¹²Jini rey Salomón tsi' yʌq'ue i majtan tac jini x'ixic bʌ rey ch'oyol bʌ ti Sabá lajal bʌ i tojol che' bajche' tsi' ch'ʌmbe tilel. Tsi' yʌq'ue ja'el pejtelel chuqui tsi' c'ajti. Tijicña tsa' sujti ti' lumal yic'ot jini x'e'telob i cha'an.

¹³Ti jujump'ejl jab Salomón tsi' ch'ʌmʌ ti tojoñel lajchʌmp'ejl millón peso oro. Jini reyob ti Arabia tsi' chocbeyob tilel. Jini xchoñoñelob ja'el cabʌl tsi' ch'ʌmbeyob c'otel oro tsa' bʌ i ganariyob ti yan tac bʌ pañimil.

¹⁵Salomón tsi' c'ʌñʌ lamital jini oro cha'an mi' mel lujunc'al mʌctijibʌl cha'an guerra. Ojlil i chʌmp'ejl millón peso i tojol ti jujump'ejl.

¹⁶Tsi' mele ti oro ja'el jo'lujunc'al ch'o'ch'oc bʌ mʌctijibʌl am bʌ i tojol che' bajche' cha'p'ejl millón peso ti jujump'ejl. Jini rey tsi' yotsa ti jini tsalʌl i c'aba' I Te'el Líbano.

¹⁷Jini rey tsi' c'ʌñʌ i bʌquel elefante cha'an mi' mel ñuc bʌ i buchlib cha'an i ye'tel. Tsi' tep'e ti puro oro.

¹⁸Chan c'ʌcʌl i buchlib. An wʌcquejp t'uchlibʌl cha'an mi' letsel ti buchtʌl. An i yajñib i c'ʌb ti jujunwejl. An i yejtal bajlum ti jujunwejl.

¹⁹An lajchʌncojt ti pejtelel, cha'cha'cojt ti jujunquejp ba' tsa' letsi ti buchtʌl. Ti pejtelel pañimil ma'anic yambʌ i buchlib yumʌl che' bajche' i cha'an Salomón.

²⁰Laj melbil ti oro pejtelel jini i taza tac jini rey Salomón, yic'ot pejtelel i bʌl jini tsalʌl i c'aba' I Te'el Líbano. Ti jim bʌ ora juben i tojol plata.

²¹An colem barco tac i cha'an jini rey Salomón. Tsi' ñijcayob majlel i winicob Hiram. Uxp'ejl jab tsi' chocoyob majlel ti Tarsis cha'an mi' ch'ʌmob tilel oro yic'ot plata, yic'ot i bʌquel i yej elefante, yic'ot bats', yic'ot xyʌx ac'ach.

²²Ñumen ñuc tsa' ajni jini rey Salomón bajche' yan tac bʌ yumʌlob ti pañimil, come c'ax cabʌl i chubʌ'an yic'ot i ña'tʌbal.

²³Yaño' bʌ yumʌlob tsi' cha'leyob wersa cha'an mi' q'uelbeñob i wut Salomón, cha'an mi' yubibeñob i t'an aq'uebil bʌ i cha'an lac Yum.

²⁴Ti jujuntiquil tsi' ch'ʌmbeyob tilel Salomón i majtan tac melbil bʌ ti plata yic'ot oro yic'ot bujcʌl tac yic'ot e'tijibʌl cha'an guerra, yic'ot xojocña bʌ ts'ac ti chajp ti chajp yic'ot caballo, yic'ot mula. Che'ʌch tsi' meleyob ti jujump'ejl jab. An i yotlel tac chʌmp'ejl mil caballo yic'ot i carreta tsalubil tac i mal.

²⁵Lajchʌmp'ejl mil winicob yujilo' bʌ c'ʌchtʌl tsa' chumleyob ya' ti tejclum tac ba' cʌntʌbil carreta. Lamital tsa' chumleyob ti Jerusalén.

²⁶Salomón tsi' cha'le i yumʌntel ti' tojlel yambʌ reyob c'ʌlʌl ti Eufrates ja' c'ʌlʌl ti' lumal filisteojob, yic'ot ya' ti' ñup' Egipto.

²⁷Cabʌl tsi' tempa plata che' bajche' i yonlel xajlel ya' ti Jerusalén. Wen cabʌl tsi' tempa ch'ujte' bajche' sicómoro te' am bʌ ti Sefela.

²⁸Tsi' ch'ʌmbeyob tilel cabʌl i caballo Salomón loq'uem bʌ ti Egipto yic'ot ti yan tac bʌ lum.

²⁹Pejtelel i melbal Salomón, c'ʌlʌl ti' tejchibal i yumʌntel, c'ʌlʌl ti' yujtibal, laj ts'ijbubil ti' juñilel jini x'alt'an Natán yic'ot ti' juñilel jini x'alt'an Ahías ch'oyol bʌ ti Silón, yic'ot ti' juñilel jini x'alt'an Iddo tsa' bʌ i wʌn taja ti t'an i yumʌntel Jeroboam (i yalobil Nabat).

³⁰Cha'c'al jab tsi' cha'le yumʌntel Salomón ya' ti Jerusalén ti' tojlel pejtelel Israel.

³¹Tsa' chʌmi Salomón, tsa' majli yic'ot i ñojte'elob. Tsa' mujqui ya' ti Jerusalén. Roboam tsa' caji ti yumʌntel ti' q'uexol i tat.