Read Chol Esdras 4 Bible Online

Esdras 4 - Chol bible

Esdras 4

¹Tsa' caji' yubiñob i contrajob: Jini xcʌjchelob tsa' bʌ sujtiyob tilel wolix i cha' melob i Templo lac Yum i Dios Israel ya' ti Judá yic'ot ti Benjamín.

²Che' bʌ tsi' yubiyob, tsa' tiliyob ba'an Zorobabel yic'ot jini xñoxob ti Judá. Tsi' subeyob: Com j coltañetla. Mi caj c cha'len lojon comol e'tel la' wic'ot, come joñon lojon ja'el mic ch'ujutesan lojon la' Dios. Mic pulben lojon i majtan. Tsa' cajiyon lojon che' bʌ tsi' pʌyʌyon lojon tilel ti ili lum Esarhadón yumʌl bʌ ti Asiria, che'ob.

³Pero ma'anic tsi' jac'ʌyob Zorobabel yic'ot Jesúa yic'ot jini xñoxob ti Israel. Tsi' yʌlʌyob: Mach mejlic c pʌyet lojon cha'an mi laj comol cha'len e'tel. Jasʌlon lojon. Mu' to c bajñel mel lojon i Templo c Yum lojon, i Dios Israel, che' bajche' tsi' subeyon lojon Ciro yumʌl bʌ ti Persia. Che' tsi' yʌlʌyob.

⁴Jini cha'an tsa' mich'ayob i contrajob ya' bʌ chumulob ti jini lum. Tsi' ñopo i bʌc'tesañob jini winicob ti Judá cha'an mi' cʌyob e'tel ti Templo. Tsi' chocoyob majlel winicob ba'an jini rey Ciro cha'an mi' jop'beñob i mul. Tsi' chʌn ñopo i mʌctañob pejtelel i jabilel i yumʌntel Ciro, jinto tsa caji ti yumʌl Dario ya' ti Persia.

⁶Wi'il to che' bʌ tsa' caji ti yumʌl jini rey Asuero, tsi' meleyob jun cha'an mi' jop'beñob i mul jini chumulo' bʌ ti Judá yic'ot ti Jerusalén.

⁷Che' ja'el che' woli' yumʌntel jini rey Artajerjes ti Persia, tsi' chʌn ñopo i mʌctañob Bislam yic'ot Mitrídates yic'ot Tabeel yic'ot i pi'ʌlob. Tsa' ts'ijbunti jini jun ti' t'an arameo. Tsa' ñusʌnti ti yambʌ t'an.

⁸Jini gobernador Rehum yic'ot jini secretario Simsai tsi' chocbeyob majlel jun jini rey Artajerjes ba' tsi' jop'beyob i mul Judá. Yaño' bʌ tsi' coltayob ti' ts'ijbuntel jini jun. Jiñobʌch cha'tiquil uxtiquil juezob yic'ot año' bʌ i ye'tel, yic'ot jini persiajob, yic'ot jini babiloniajob, yic'ot jini ch'oyolo' bʌ ti Erec yic'ot ti Susa.

¹⁰Tsi' coltayob ti' ts'ijbuntel jini carta ja'el jini ch'oyolo' bʌ ti yan tac bʌ lum tsa' bʌ cʌjchiyob tilel cha'an Asnapar jini ñuc bʌ yumʌl tsa' bʌ i yʌc'ʌyob ti chumtʌl ti Jerusalén, ti Samaria yic'ot ti xchumtʌl tac ti' joytʌlel, yic'ot ti junwejl jini colem ja' i c'aba' Eufrates ba' mi' bʌjlel q'uin.

¹¹Tsi' chocoyob majlel jun ba'an jini rey Artajerjes. Tsi' yʌlʌyob: X'e'telon lojon a cha'an, chumulon lojon ti junwejl jini Eufrates wʌ' ba' mi' bʌjlel q'uin. Mi cʌq'ueñet lojon cortesía.

¹²Yom ma' ña'tan, rey, cha'an wolix i cha' wen melob i tejclum jini judíojob tsa' bʌ cha' sujtiyob tilel ti Jerusalén. Tsa' jisʌnti ili tejclum cha'an ti' caj i jontolilob. Pero woli' cha' wa'chocoñob. Woli' cha' melob i ts'ajquil tejclum yic'ot i c'ʌclib Templo.

¹³Jini cha'an tsajaletme rey, come mi tsi' cha' wen'esayob i tejclum ili winicob, mi tsi' cha' wa'chocoyob jini ts'ajc cha'an i mʌctijib i tejclum, che' jini ma'anix mi caj i chʌn jac'ob a mandar cha'an mi' yʌc'ob i tojoñel. Ma'anix mi caj i chʌn p'isob ti wenta jini yumʌlob wa'chocobilo' bʌ a cha'an cha'an mi' jac'ob. Mi caj i techob wocol ti a tojlel.

¹⁴Cujil lojon cʌyʌlon lojon ti a yumʌntel. Che' jini mach uts'atic mij q'uel lojon che' ma'anic ma' p'istʌl ti wenta. Jini cha'an tsac ña'ta lojon c tsictesʌbeñet lojon ti jun chuqui woli' yujtel.

¹⁵Yom ma' sʌclan ya' ti jun ba' ts'ijbubil i melbal a ñojte'elob. Mi caj a q'uel ya' ti jun ba' ts'ijbubil i yesomal ili tejclum. Jontolob. Wen ñʌmʌlob ti leto yic'ot guerra c'ʌlʌl ti oniyi. Cabʌl tsi' tic'layob jini yumʌlob año' bʌ i yumʌntel ti' joytʌlel. Jini cha'an tsa' jisʌntiyob.

¹⁶Jini cha'an mic subeñet lojon, c rey, mi tsa' cha' wen'esʌnti ili tejclum, mi tsa' cha' wen mejli jini ts'ajc, mi caj i ch'ejl'añob. Che' jini mach chʌn a cha'anix mi caj i majlel jini tejclum yic'ot jini lum am bʌ ti' junwejlel jini ñoj ja'. Che' tsi' yʌlʌyob ti jun.

¹⁷Jini rey tsi' chocbeyob majlel i q'uexol i jun jini gobernador Rehum yic'ot jini secretario Simsai yic'ot pejtelel i pi'ʌlob año' bʌ i ye'tel chumulo' bʌ ti Samaria, yic'ot jini año' bʌ ti junwejl ñoj ja'. Tsi' yʌlʌ: Mi cʌq'ueñetla cortesía cha'an ñʌch'ʌl mi la' wajñel.

¹⁸Tsa'ix cubi chuqui tsa' la' ts'ijbubeyon ti jun. Tsa' wen pejcʌnti tic tojlel.

¹⁹Tsac cha'le mandar cha'an mi' sʌclañob ya' ti jun ba' ts'ijbubil i mul ili tejclum Jerusalén ti oniyi. Isujm tsa' tejchiyob ti' contra reyob. Che' ja'el ma'anic tsi' p'isiyob ti' wenta. Tsi' techeyob leto yic'ot guerra.

²⁰Che' ja'el ti wajali an i cha'añob ya' ti Jerusalén yumʌlob wen p'ʌtʌlo' bʌ tsa' bʌ i ñuq'uesʌbeyob majlel i yumʌntel c'ʌlʌl ti junwejl ja' i c'aba' Eufrates. Jini yumʌlob ti yan tac bʌ lum tsi' tojbeyob cabʌl tojoñel tac.

²¹Jini cha'an yom mi la' tsictesʌbeñob cha'an mi' cʌyob i cha' melob jini Templo jinto mic cha' ac' c mandar cha'an mi' cha' techob.

²²Jini cha'an yom tsajʌletla cha'an mi la' mel che' bajche' wolic subeñetla ame tejchic wocol tic tojlel. Che' tsi' yʌlʌ jini rey.

²³Jini rey Artajerjes tsi' choco majlel jini carta ba'an jini gobernador Rehum yic'ot jini secretario Simsai yic'ot i pi'ʌlob. Che' bʌ tsa' q'uejli jini carta ti' tojlelob, tsa' bʌc' majliyob ti Jerusalén ba'an judíojob cha'an mi' tic'ob ti e'tel.

²⁴Che' jini quepel tsa' cʌle ti melol i Templo Dios jinto tsa' ts'ʌctiyi i cha'p'ejlel jab i yumʌntel Darío i yum Persia.