Read Chol Esdras 7 Bible Online

Esdras 7 - Chol bible

Esdras 7

¹Che' bʌ tsa' ujti pejtelel iliyi, che' woli ti yumʌntel Artajerjes yumʌl bʌ ti Persia, tsa' loq'ui Esdras ti Babilonia. Tsa' majli ti Jerusalén. Jiñobʌch i ñojte'elob Esdras: Esdras jiñʌch i yalobil Seraías, Seraías jiñʌch i yalobil Azarías, Azarías jiñʌch i yalobil Hilcías, Hilcías jiñʌch i yalobil Salum, Salum jiñʌch i yalobil Sadoc, Sadoc jiñʌch i yalobil Ahitob, Ahitob jiñʌch i yalobil Amarías, Amarías jiñʌch i yalobil Azarías, Azarías jiñʌch i yalobil Meraiot, Meraiot jiñʌch i yalobil Zeraías, Zeraías jiñʌch i yalobil Uzi, Uzi jiñʌch i yalobil Buqui, Buqui jiñʌch i yalobil Abisúa, Abisúa jiñʌch i yalobil Finees, Finees jiñʌch i yalobil Eleazar, Eleazar jiñʌch i yalobil Aarón ñaxan bʌ motomaj.

⁶Esdras jiñʌch sts'ijbaya wen chajpʌbil bʌ ti jini mandar tsa' bʌ aq'uenti Moisés cha'an lac Yum, i Dios Israel. Tsi' c'ajtibe permiso jini rey cha'an mi' majlel ti Jerusalén. Tsi' jac'ʌ jini rey come lac Yum an yic'ot Esdras.

⁷Che' ti ojlil marzo che' ti' wucp'ejlel i jabilel i ye'tel ti rey jini Artajerjes, tsa' loq'uiyob ti Babilonia cabʌl winicob x'ixicob, motomajob, levíjob, xc'ayob, xcʌnta ti' Templojob, yic'ot jini yan tac bʌ x'e'telob i cha'an jini Templo. Temel tsa' majliyob yic'ot Esdras. Lac Yum tsi' coltayob majlel. Tsa' c'otiyob ti Jerusalén che' ti ojlil agosto,

¹⁰come Esdras tsi' wen chajpa i pusic'al cha'an mi' ch'ʌmben isujm i mandar lac Yum, cha'an mi' wen jaq'ue', cha'an mi' cʌntesan jini israelob.

¹¹Artajerjes tsi' yʌq'ue carta jini motomaj Esdras, jini wen chajpʌbil bʌ ti' mandar lac Yum. Tsi' yʌlʌ:

¹²Artajerjes, jini ñuc bʌ yumʌl ti' tojlel yumʌlob, wolic ts'ijbubeñet carta Esdras. Motomajet, wen chajpʌbilet bʌ ti' mandar jini Dios am bʌ ti panchan.

¹³Wolic subeñob mandar jini año' bʌ tic yumʌntel, i p'olbalo' bʌ Israel. Majqui jach yom majlel a wic'ot ti Jerusalén la' majlic yic'ot motomajob yic'ot levíjob.

¹⁴Joñon quic'ot jini wuctiquil caj toj'esayajob, wolic subeñet lojon cha'an ma' ch'ʌm majlel i juñilel i mandar Dios. Yom ma' q'uel mi woli' melob jini año' bʌ ti Jerusalén yic'ot ti Judá che' bajche' ts'ijbubil cha'an Dios.

¹⁵Yom ma' ch'ʌm majlel jini plata yic'ot oro woli bʌ cʌc' lojon ti pejtel c pusic'al. I majtañʌch i Dios Israel chumul bʌ ti Jerusalén.

¹⁶Yom ja'el ma' tempan plata yic'ot oro wʌ' ti Babilonia che' yomob i yʌc' c pi'ʌlob yic'ot ja'el i yofrenda tac jini israelob yic'ot jini motomajob mu' bʌ i yʌc'ob ti' pusic'al jach cha'an mi' c'ʌjñel ti' Templo i Dios ya' ti Jerusalén.

¹⁷Xuc'ul yom ma' c'ʌn ili taq'uin cha'an ma' mʌn alʌ tat wacax, yic'ot tat tiñʌme' yic'ot alʌ tiñʌme', yic'ot majtañʌl tac melbil bʌ ti trigo, yic'ot jini japbil bʌ majtañʌl tac. Ti pejtelel mi caj a wʌc' ya' ti pulʌntib am bʌ ti' Templo a Dios ya' ti Jerusalén.

¹⁸Jatet a wic'ot a pi'ʌlob mi mejlel la' comol ña'tan bajche' mi caj la' c'ʌn i colojbal jini taq'uin. Che'ʌch yom mi la' mel che' bajche' yom la' Dios.

¹⁹Jixcu jini uch'ijibʌl tac tsa' bʌ cha' aq'uentiyetla am bʌ i c'ʌjñibal ti' Templo a Dios, mi caj a cha' sutq'uin ti' tojlel Dios ya' ti Jerusalén.

²⁰Mi an chuqui anto yom cha'an mi la' wen mel jini Templo yic'ot i bʌl, c'ajtibenla c winic mu' bʌ i cʌntan i yotlel c chubʌ'an.

²¹Joñon jini rey Artajerjes, mi cʌq'ueñob mandar pejtel mu' bʌ i tempañob tojoñel ya' ti junwejl ja' Eufrates ba' mi' bʌjlel q'uin. Yom mi la' wʌq'uen jini motomaj Esdras chuqui tac mi' c'ajtibeñetla, come jiñʌch motomaj wen chajpʌbil bʌ ti' mandar Dios am bʌ ti panchan.

²²C'ʌlʌl ti ojlil i yuxp'ejl millón peso ti plata mi mejlel la' wʌq'uen yic'ot uxbajc' ti cujch trigo, yic'ot chʌmp'ejl mil litro vino, yic'ot chʌmp'ejl mil litro aceite, yic'ot i yonlel ats'am.

²³Chuqui tac jach yom jini Dios ti panchan, la' mejlic ti ora ya' ti Templo, ame muq'uic i mich'leñon temel quic'ot calobilob mi mach wen melbilic.

²⁴Mic subeñetla ja'el cha'an mach yomic mi la' c'ajtibeñob tojoñel jini motomajob mi levíjob mi xc'ayob, mi xcʌnta ti' ototob, mi juntiquilic winic mu' bʌ i cha'len e'tel ti' Templo Dios. Che'ʌch woli cʌq'ueñob mandar jini xch'ʌm tojoñelob yic'ot jini mu' bʌ i cʌntañob taq'uin.

²⁵Jixcu jatet Esdras, che'ʌch bajche' c'amel a ña'tʌbal aq'uebilet bʌ ti Dios, yom ma' wa'chocon juezob yic'ot gobernador cha'an mi' cha'leñob yumʌntel ya' ti junwejl jini Eufrates ja' ba' mi' bʌjlel q'uin. Yom ma' cʌntesan jini mach bʌ anic mi' cʌñob i mandar Dios.

²⁶Jini mach bʌ yomic i jac', la' tsʌnsʌntic, o mi' chilbentel i chubʌ'an, o mi' chojquel loq'uel ti' lumal, o la' ochicob ti mʌjquibʌl pejtelel mach bʌ anic mi' jac'beñob i mandar a Dios yic'ot i mandar jini rey. Che' tsi' yʌlʌ Artajerjes ti' carta.

²⁷Esdras tsi' yʌlʌ: La' ñuq'uesʌntic i c'aba' lac Yum i Dios lac ñojte'elob, come tsi' ñijcʌbe i pusic'al jini rey cha'an mi' q'uel ti ñuc i Templo lac Yum ya' ti Jerusalén.

²⁸Lac Yum tsi' ñijcʌbeyob i pusic'al jini rey yic'ot i yaj coltayajob yic'ot jini yumʌlob cha'an mi' coltañoñob. Jini cha'an tsa' ch'ejl'ayon tic Yum Dios cha'an tsi' wen coltayon Dios. Tsa' caji c tempan jini ñuc bʌ x'e'telob i p'olbalo' bʌ Israel cha'an mi' tilelob quic'ot ti Jerusalén.