Read Chol Esdras 9 Bible Online

Esdras 9 - Chol bible

Esdras 9

¹Che' bʌ tsa' ujti pejtelel iliyi, tsa' tiliyob ba' añon i yum israelob. Tsi' subeyoñob cha'an woli' ñopob jontolil cabʌl winicob x'ixicob yic'ot motomajob yic'ot levíjob. Tsa' caji' tsajcañob i melbal jini chumulo' bʌ ti jini lum. Jiñobʌch cananeojob, heteojob, ferezeojob, jebuseojob, amoñob, moabob, egiptojob yic'ot amorreojob.

²Come jini winicob israelo' bʌ tsa'ix i pʌyʌyob xch'oc bʌ i yalobilob jini yambʌ tejclumob cha'an i yijñam. Jini ch'ujul bʌ i tejclum Dios tsa'ix xʌjbi yic'ot yambʌ tejclum tac. Jini yumʌlob tsi' pʌsbeyob maya i pi'ʌlob. Ñaxañob ti jini ñuc bʌ mulil.

³Che' bʌ tsa cubi iliyi, tsac tsili c pislel. Tsac xʌt'ʌ c jol yic'ot c tsucti'. Tsa' majliyon ti buchtʌl cha'an ch'ijiyem c pusic'al.

⁴Cabʌlob tsa' bʌ i bʌc'ñayob i Dios Israel tsa' bʌ i jac'beyob i t'an tsi' meleyob i pusic'al cha'an ili mulil. Tsa' tiliyob ti buchtʌl temel quic'ot. Ya' jach buchulon lojon, ñʌch'ʌlon lojon, c'ʌlʌl ti' yorajlel che' mi' pulbentel i majtan Dios che' ti ic'ajel.

⁵Che' i yorajlelix che' mi' yʌq'uentel i majtan Dios, tsac peq'uesa c bʌ. Tsac ñocchoco c bʌ. Tsac letsa j c'ʌb ti' tojlel lac Yum Dios.

⁶Tsac sube ti oración: C Dios, ch'ijiyem c pusic'al. Quisintic jax woli cubin, come tsa'ix wen p'ojli c mul lojon. Tsa'ix c'ʌlʌ c'oti ti panchan yubil i yonlel c sajtemal lojon.

⁷C'ʌlʌl ti' yorajlel c tatob lojon, c'ʌlʌl ti ili ora, an cabʌl lojon c mul. Jini cha'an tsa'ix mʌjli i cha'añob j contrajob lojon. Tsa'ix tsʌnsʌntiyob ti espada c reyob lojon yic'ot c motomaj lojon. Lamital tsa' cʌjchiyob majlel. Tsa' chilbentiyon lojon c chubʌ'an. Tsa' ajq'uiyon lojon ti quisin che'ʌch bajche' wʌle.

⁸Poj jumuc' wola' pʌsbeñon lojon i yutslel a pusic'al. Tsa' pʌyʌyon lojon loq'uel ya' ba' cʌchʌlon lojon. Anquese ma'anic jaytiquilon lojon, xuc'ul tsa' cha' pʌyʌyon lojon ti Jerusalén. Tsa'ix a cha' aq'ueyon lojon i tijicñʌyel c pusic'al.

⁹Ti yambʌ ora wolic mozojintel. Che' cabʌl lojon c wocol ma'anic tsa' cʌyʌyon lojon. Tsa' ñijcʌbeyob i pusic'al jini reyob ti Persia cha'an mi' pʌsbeñoñob i yutslel i pusic'al. Tsi' coltayon lojon cha'an mic cha' wa'chocon lojon a Templo yic'ot i ts'ajquil Jerusalén.

¹⁰Pero wʌle, c Dios, woli cubin lojon quisin. ¿Chuqui to mi mejlel cʌl lojon? Come anix lojon c mul cha'an tsac ñusa lojon a mandar.

¹¹Jini x'alt'añob a cha'an tsi' subeyon lojon a t'an che' bajche' tsa' subeyob. Tsi' yʌlʌyob: “Pʌjq'uemix ti mulil jini lum ba' tilemetla ti chumtʌl, come cabʌl i jontolil jini wʌ' bʌ chumulob. Tsi' pam wa'chocoyob i melbal i c'ʌb mu' bʌ c ts'a'len”. Che' woli' yʌl lac Yum, che'ob.

¹²Jini cha'an tsa' subeyon lojon cha'an ma'anic mic sijibeñob lojon jini xch'oc bʌ calobil lojon. Che' ja'el tsa' tiq'ui jini winic bʌ calobil lojon. Mach yomic mi' pʌyob jini xch'oc bʌ i yalobilob ti' yijñam. Tsa' subeyon lojon mach yomic mij coltan jini sajtemo' bʌ cha'an mi' p'ojlel i chubʌ'an. Tsa' subeyon lojon mi caj a wʌq'ueñon lojon i ñʌch'tʌlel c pusic'al lojon mi uts'at mic jac'beñet lojon. Mi caj a p'ojlesañon lojon ja'el. Xuc'ul mi caj j cʌytʌl lojon tic lum lojon quic'ot calobilob lojon ti pejtelel ora.

¹³Pero tsac cha'le lojon jontolil. Jini cha'an tsac ñusa lojon wocol ya' ba' tsa' pʌyʌyon lojon majlel ti cʌjchel cha'an ti' caj jini leco bʌ c melbal lojon. Pero jatet, c Dios lojon, ma'anic tsa' wʌq'ueyon lojon c toj jini c mul lojon ti ts'ʌcʌl, come tsa' cha' pʌyʌyon lojon sujtel.

¹⁴Wʌle tsac cha' ñusa lojon a mandar. Tsac cha'le lojon ñujpuñijel yic'ot jini mu' bʌ i ch'ujutesañob i melbal i c'ʌb mu' bʌ a ts'a'len. Bʌbʌq'uen mi caj a jisañon lojon cha'an a mich'ajel. Che' jini ma'anic majqui mi caj i colel mi juntiquilic.

¹⁵Tojet c Yum, i Dioset bʌ Israel. P'untañon lojon, come i colojbalon lojon Israel mu' bʌ c ñopet lojon. Wʌ' añon lojon ti a tojlel yic'ot c mul lojon. Muq'uic a wen melon lojon ti toj, ma'anic majqui mi mejlel i wa'tʌl ti a tojlel. Cho'on tsac sube ti oración.