Read Chol Nehemias 1 Bible Online

Nehemias 1 - Chol bible

Nehemias 1

¹Jiñʌch i t'an Nehemías i yalobil Hacalías. Che' ti diciembre che' ñumeñix junc'al jab che' woli ti yumʌntel jini rey Artajerjes, ya' añon ti Susa i tejclum rey.

²Tsa' juli Hanani, juntiquil c pi'ʌl, yic'ot yaño' bʌ winicob loq'uemo' bʌ ti Judá. Tsaj c'ajtibeyob bajche' yilalob jini judíojob* ya' bʌ chumulob. I p'olbalobʌch jini tsa' bʌ cʌleyob che' bʌ tsa' wersa cʌjchiyob majlel i pi'ʌlob. Tsaj c'ajtibeyob ja'el bajche' yilal jini tejclum Jerusalén.

³Tsi' subeyoñob: Cabʌl woli yubiñob wocol jini judíojob ya' bʌ chumulob. Ma'anic jaytiquilob tsa' bʌ cʌleyob ti lum che' bʌ tsa' wersa pʌjyiyob i pi'ʌlob. Cabʌl woli' ts'a'lentelob. Jejmen to jini ts'ajc am bʌ ti' joytilel Jerusalén. Tsa' laj puli jini colem tranca tac ya' ti' yochib tejclum, che'ob.

⁴Che' bʌ tsa cubi ili t'an tsa' buchleyon. Tsa' cajiyon ti uq'uel. Tsa cuc'ta jini tejclum cha'p'ejl uxp'ejl q'uin. Tsac cha'le ch'ajb yic'ot oración. Tsac pejca Dios am bʌ ti panchan.

⁵Tsa cʌlʌ: C Yum Dios añet bʌ ti panchan, mic pejcañet. P'ʌtʌl bʌ Dioset cabʌl a ñuclel. Mic bʌc'ñañet lojon. Ma' pʌsbeñob a wutslel yic'ot i sujmlel a pacto pejtel mu' bʌ i jac'beñetob a mandar, mu' bʌ i c'uxbiñetob.

⁶Awocolic ñich'tʌbeñon c t'an. Q'ueleyon ti uts'at. Ubibeñon coración. Come a winicon, wolic mel oración ti a tojlel ti q'uiñil yic'ot ti ac'ʌlel. Wolic tajob ti oración a cha'año' bʌ ti Israel come israelon ja'el. Wolic subeñet c mul lojon tsa' bʌ c mele lojon ti a contra. Isujm tsa'ix c cha'le lojon mulil joñon quic'ot c pi'ʌlob.

⁷Cabʌl tsaj cʌyʌyet lojon cha'an c sajtemal lojon. Ma'anic tsac jac'ʌ lojon a mandar yic'ot a ley yic'ot a t'an tsa' bʌ a wʌq'ue Moisés a winic.

⁸Ña'tan jini t'an tsa' bʌ a wʌq'ue Moisés jini a winic. Tsa' sube: “Mi mach xuc'ulic mi la' jac'beñon c t'an, mi caj c pam puquetla majlel ti ñajtʌl ba'an yan tac bʌ winicob x'ixicob.

⁹Che' bʌ pam pujquemob la' walobilob ti ñajtʌl cha'an tsi' ñusayob c t'an, mi caj c cha' pʌyob tilel mi ti pejtelel i pusic'al mi' sutq'uiñob i bʌ ba' añon cha'an mi' jac'ob c mandar, cha'an mi' melob bajche' mic sub. Anquese ñajt pujquemob c'ʌlʌl ti junwejl pañimil, mi caj c cha' tempañob. Mi caj c pʌyob tilel ti jini lum yajcʌbil bʌ c cha'an ba' mi caj cʌc' ti c'uxbintel j c'aba'”, che'et.

¹⁰Jiñobʌch a winicob, a tejclumob, tsa' bʌ a colta ti ñuc bʌ a p'ʌtʌlel che' bʌ tsa' loc'sayob ti Egipto.

¹¹C Yum, a wocolic mij c'ajtibeñet, ñich'tʌbeñon coración come a winicon. Ñich'tʌbeñob i yoración a winicob año' bʌ ti Jerusalén mu' bʌ i tajob i tijicñʌyel cha'an woli' bʌc'ñañob a c'aba'. Coltañon ti ili q'uin cha'an mi' yujtel ti uts'at chuqui com c mel. Ñijcʌben i pusic'al jini rey cha'an mi' p'untañon ba' ora mic pejcan, cho'on ti oración. Joñon mic ñusʌben i taza jini rey.