Read Chol Nehemias 11 Bible Online

Nehemias 11 - Chol bible

Nehemias 11

¹Jini yumʌlob tsa' chumleyob ti Jerusalén. Jini winicob tsi' cha'leyob yajcaya ti alas cha'an mi' loq'uelob i pi'ʌlob ti yan tac bʌ tejclum ti jujunmojt, jujuntiquil loq'uem bʌ ti lujuntiquil cha'an mi' tilelob ti chumtʌl ti Jerusalén, jini ch'ujul bʌ tejclum. Jini bolontiquil i pi'ʌlob mach bʌ anic tsa' tiliyob tsa' jach cʌleyob ba' chumulob ti' tejclum tac.

²Jini israelob tsi' q'ueleyob ti ñuc pejtel i pi'ʌlob tsa' bʌ i yʌc'ʌyob i bʌ ti' pusic'al jach cha'an mi' chumtʌlob ti Jerusalén.

³Yaño' bʌ winicob x'ixicob tsa' jach cʌleyob ti' lum ya' ba' chumulob ti' tejclum tac Judá. Jiñobʌch ñuco' bʌ winicob tsa' bʌ tiliyob ti chumtʌl ti Jerusalén: jini motomajob yic'ot levíjob yic'ot x'e'telob ti Templo yic'ot i p'olbal i winicob Salomón.

⁴Wʌ' chumulob ja'el ti Jerusalén lamital i p'olbal Judá yic'ot lamital i p'olbal Benjamín. Jiñobʌch i p'olbal Judá: Ataías i yalobil Uzías, i yalobil bʌ Zacarías, i yalobil bʌ Amarías, i yalobil bʌ Sefatías, i yalobil bʌ Mahalaleel, i yalobil bʌ Fares,

⁵yic'ot Maasías i yalobil bʌ Baruc, i yalobil bʌ Colhoze, i yalobil bʌ Hazaías, i yalobil bʌ Adaías, i yalobil bʌ Joiarib, i yalobil bʌ Zacarías, i yalobil bʌ Siloni.

⁶I p'olbal Fares chumulo' bʌ ti Jerusalén, jumbajc' yic'ot waxʌctiquil i chʌnc'al (468) ti pejtelelob, wen p'ʌtʌl bʌ winicob.

⁷Jiñobʌch i p'olbal Benjamín: Salú i yalobil Mesulam, i yalobil bʌ Joed, i yalobil bʌ Pedaías, i yalobil bʌ Colaías, i yalobil bʌ Maasías, i yalobil bʌ Itiel, i yalobil bʌ Jesaías,

⁸yic'ot Gabai yic'ot Salai, cha'bajc' yic'ot waxʌctiquil i bolonc'al (968).

⁹Joel i yalobil Zicri jiñʌch i yum. Judá i yalobil Senúa jiñʌch i pi'ʌl Joel ti ñuc bʌ i ye'tel, suplente bʌ yumʌl ti tejclum.

¹⁰Jiñi motomajob: Jedaías i yalobil Joiarib, Jaquín,

¹¹Seraías i yalobil Hilcías, i yalobil bʌ Mesulam, i yalobil bʌ Sadoc, i yalobil bʌ Meraiot, i yalobil bʌ Ahitob, i yum i yotot Dios.

¹²Yic'ot i pi'ʌlob tsa' bʌ i cha'leyob e'tel ti' yotot Dios, cha'bajc' yic'ot cha'tiquil i cha'c'al (822). Yic'ot Adaías i yalobil Jeroham, i yalobil bʌ Pelalías, i yalobil bʌ Amsi, i yalobil bʌ Zacarías, i yalobil bʌ Pasur, i yalobil bʌ Malquías,

¹³yic'ot i yijts'inob laj bʌ yumʌlob ti' yotot ti jujuntiquilob, cha'tiquil i yuxlujunc'al (242), yic'ot Amasai i yalobil Azareel, i yalobil bʌ Azai, i yalobil bʌ Mesilemot, i yalobil bʌ Imer.

¹⁴Yic'ot i pi'ʌlob, p'ʌtʌl bʌ winicob ñuc tac bʌ i melbal, waxʌctiquil i wucc'al (128). Añʌch i ye'tel Zabdiel, i yalobil Gedolim, cha'an mi' chʌcʌ q'uelob.

¹⁵Jini levíjob: Semaías i yalobil Hasub, i yalobil bʌ Azricam, i yalobil bʌ Hasabías, i yalobil bʌ Buni,

¹⁶yic'ot Sabetai yic'ot Jozabad, i yumob levíjob, tsa' bʌ i q'ueleyob jini e'tel am bʌ ti' jumpat i yotot Dios.

¹⁷Yic'ot Matanías i yalobil Micaía, i yalobil bʌ Zabdi, i yalobil bʌ Asaf, jini tsa' bʌ i teche i yʌq'uen wocolix i yʌlʌ Dios ti oración, yic'ot Bacbuquías i cha'ticlel bʌ ti' tojlel i pi'ʌlob, yic'ot Abda i yalobil Samúa, i yalobil bʌ Galal, i yalobil bʌ Jedutún.

¹⁸Chʌntiquil i chʌnlujunc'al (284) jini levíjob ti pejtelob año' bʌ ti jini ch'ujul bʌ tejclum.

¹⁹Jiñobʌch mu' bʌ i cʌntañob i ti' tejclum: Acub, Talmón, yic'ot i pi'ʌlob tsa' bʌ i q'ueleyob i ti' tac tejclum, lajchʌntiquil i bolonc'al (172).

²⁰Yaño' bʌ israelob yic'ot jini motomajob yic'ot jini levíjob tsa' chumleyob ti pejtel tejclum tac ti Judá, ti' lumal i ñojte'el ti jujuntiquil.

²¹Pero tsa' chumleyob ti Ofel jini x'e'telob ti Templo. Xiha yic'ot Gispa tsi' q'ueleyob x'e'telob ti Templo.

²²Jini tsa' bʌ i q'ueleyob levíjob año' bʌ ti Jerusalén jiñʌch Uzi i yalobil Bani, i yalobil bʌ Hasabías, i yalobil bʌ Matanías, i yalobil bʌ Micaía, tilem bʌ ti' yalobilob Asaf tsa' bʌ i cha'leyob c'ay, jini año' bʌ i ye'tel ti' yotot Dios.

²³Come jini rey tsi' cha'le mandar cha'an mi' yʌq'uentelob levíjob yic'ot xc'ayob chuqui tac yom ti jujump'ejl q'uin.

²⁴Petaías i yalobil Mesezabeel, tilem bʌ ti Zera, i yalobil bʌ Judá, tsi' colta jini rey. An ti' wenta cha'an mi' q'uel winicob cha'an pejtel chuqui tac yomob ti' tojlel rey.

²⁵Lamital jini chumulo' bʌ ti Judá tsa' chumleyob ti lum ya' ti Quiriat Arba yic'ot ti xchumtʌl tac; yic'ot ti Dibón yic'ot jini xchumtʌl tac; ti Jecabseel yic'ot jini xchumtʌl tac: ti Jesúa, ti Molada, ti Betpelet, ti Hasarsual, ti Beerseba yic'ot jini xchumtʌl tac; ti Siclag, ti Mecona yic'ot jini xchumtʌl tac; ti Enrimón, ti Zora, ti Jarmut, ti Zanoa, ti Adulam yic'ot xchumtʌl tac, ti Laquis yic'ot joctʌl tac, ti Azeca yic'ot xchumtʌl tac. Che' jini tsa' chumleyob ti tejclum tac c'ʌlʌl ti Beerseba c'ʌlʌl ti joctʌl i c'aba' Hinom.

³¹I p'olbal Benjamín tsa' pujquiyob majlel ja'el ti Geba, ti Micmas, ti Aía, ti Betel yic'ot ti jini xchumtʌl tac ti' joytilel. Ti Anatot, Nob, Ananías, Hazor, Ramá, Gitaim, Hadid, Seboim, Nebalet, Lod, yic'ot Ono, jini joctʌl ba' añob jini wen yujilo' bʌ e'tel ti chajp ti chajp.

³⁶Jini levíjob tsa' pujquiyob ti' lumal Judá yic'ot ti' lumal Benjamín.