Read Chol Nehemias 13 Bible Online

Nehemias 13 - Chol bible

Nehemias 13

¹Ti ili q'uin tsi' pejcayob i ts'ijbujel Moisés ti' tojlel winicob x'ixicob. Tsi' tajayob ts'ijbubil bʌ mandar ba' tic'bilob amoñob yic'ot moabob ti pejtelel ora cha'an ma'anic mi' yochelob ba' mi' tempañob i bʌ i winicob Dios.

²Come ma'anic tsa' loq'ui i yʌq'ueñob waj yic'ot ja' jini israelob che' bʌ tsi' c'ajtibeyob. Tsi' yʌq'ueyob Balaam i tojol cha'an mi' p'ajob. Dios tsi' mʌctʌbe i p'ajoñel. Tsi' yʌq'ue i cha'len wen bʌ t'an.

³Che' bʌ tsi' yubiyob jini t'an jini israelob, tsi' chocoyob loq'uel pejtel jini mach bʌ i pi'ʌlobic.

⁴Añʌch ti' wenta Eliasib jini motomaj cha'an mi' q'uel i malil i yotot lac Dios. Jini Eliasib, i pi'ʌlʌch Tobías. Che' bʌ majlemonix,

⁵tsi' chajpa colem bʌ i mal otot cha'an mi' yajñel Tobías ya' ba' mi' lojtel i majtan tac Dios: jini melbil tac bʌ ti harina, yic'ot pom, yic'ot latu tac, yic'ot i diezmojlel trigo, yic'ot tsiji' bʌ vino, yic'ot aceite aq'uebilo' bʌ levíjob yic'ot xc'ayob yic'ot xcʌnta ti'ob yic'ot motomajob che' bajche' ts'ijbubil ti mandar.

⁶Che' bʌ tsi' yotsa ti chumtʌl, mach wʌ'ic añon ti Jerusalén, come che' ti lajchʌmp'ejlel i cha'c'al i jabilel i ye'tel Artajerjes i rey Babilonia tsa' sujtiyon ba'an rey. Che' bʌ ñumeñix cha'p'ejl uxp'ejl jab, tsaj c'ajtibe rey permiso cha'an mic cha' sujtel tic lumal.

⁷Tsa' juliyon wʌ' ti Jerusalén. Tsa cubi jini jontolil tsa' bʌ i cha'le Eliasib che' bʌ tsi' chajpʌbe Tobías jump'ejl i mal ya' ti' pam i yotot Dios.

⁸Tsac mich'le Eliasib. Tsac choco loq'uel pejtelel i chubʌ'an Tobías am bʌ ti mal.

⁹Tsac subeyob cha'an mi' sʌq'uesañob i mal otot. Che' sʌquix, tsac cha' ch'ʌmʌ ochel jini latu tac i cha'an i yotot Dios yic'ot i majtan Dios melbil bʌ ti harina yic'ot jini pom.

¹⁰Tsa cubi ja'el ma'anic woli' yʌq'ueñob levíjob chuqui tac yom. Jini cha'an jini levíjob yic'ot xc'ayob tsa' bʌ i cha'leyob e'tel ti' yotot Dios tsa' puts'iyob i sʌclan majlel i bʌl i ñʌc'. Tsa' cha' cajiyob ti e'tel ti lum ti jujuntiquil.

¹¹Tsa cʌ'le jini año' bʌ i ye'tel. Tsac subeyob: ¿Chucoch cʌybilix i yotot Dios? cho'on. Tsac wets'eyob tilel jini año' bʌ i ye'tel ti' yotot Dios. Tsac wa'chocoyob ti' ye'tel ti jujuntiquil.

¹²Pejtel año' bʌ ti Judá tsi' ch'ʌmʌyob tilel i diezmojlel trigo yic'ot vino yic'ot aceite. Tsi' yotsayob ti' yotlel.

¹³Tsa cʌq'ueyob i ye'tel mu' bʌ i cʌntañob i yotlel i majtan Dios: Selemías jini motomaj, yic'ot Sadoc jini sts'ijbujel, yic'ot Pedaías jini leví, yic'ot Hanán, i yalobil Zacur i yalobil bʌ Matanías, cha'an mi' coltañob ti' ye'tel, come tsaj q'uele xuc'ulob i pusic'al. An i ye'tel cha'an mi' t'oxbeñob i pi'ʌlob jini diezmo tac.

¹⁴Ña'tañon, c Dios, cha'an tsac mele jini. Mach a yʌpbeñon jini wen bʌ c melbal tsa' bʌ c melbeyet cha'an i c'uxbintel a wotot yic'ot a we'tel.

¹⁵Che' ti ili ora tsaj q'uele ti Judá winicob woli bʌ i t'uchtañob ts'usub che' ti' yorajlel c'aj o. Yaño' bʌ woli' cuchob tilel trigo. Yaño' bʌ woli' p'ʌtbeñob majlel i cuch burro. Tsi' p'ʌtbeyob vino yic'ot ts'usub yic'ot higo yic'ot cabʌl cuchʌl tsa' bʌ i ch'ʌmʌyob tilel ti Jerusalén che' ti' yorajlel c'aj o. Tsac bʌc' subeyob cha'an mi' cʌyob i choñoñel.

¹⁶Tsaj q'uele ja'el winicob ch'oyolo' bʌ ti Tiro wʌ' bʌ chumulob ti tejclum. Woli' ch'ʌmob tilel chʌy yic'ot cabʌl chubʌ'añʌl. Woli' chombeñob jini chumulo' bʌ ti Judá yic'ot ti Jerusalén che' ti' yorajlel c'aj o.

¹⁷Tsac pʌsbeyob i mul jini ñuco' bʌ winicob año' bʌ ti Judá. Tsa cʌ'leyob: ¿Chuqui jini woli bʌ la' cha'len? ¿Mach ba anic la' mul che' mi la' p'aj i yorajlel c'aj o?

¹⁸¿Mach ba lajalic tsi' cha'leyob la' ñojte'el che' bajche' jini? Jini cha'an tsi' chocbeyonla tilel lac Dios pejtel ili wocol cha'an p'ump'uñonla yic'ot lac tejclum. Ñumen woli la' ch'ʌm tilel i mich'ajel Dios ti' tojlel israelob, come woli la' p'aj i yorajlel c'aj o, cho'on.

¹⁹Che' bʌ tsa' caji' yic'an pañimil ya' ba' woli' cʌntañob i ti' tac jini ts'ajc, che' mux cajel i tejchel i yorajlel c'aj o, tsac subeyob cha'an mi' ñup'ob i ti' tac Jerusalén. Tsac subeyob cha'an mach mi' cha' jamob jinto che' ñumeñix i yorajlel c'aj o. Tsac wa'choco lamital c winicob cha'an mi' q'uelob i ti' tac ts'ajc cha'an ma'anic mi' ch'ʌjmel ochel mi jump'ejlic cuchʌl che' ti' yorajlel c'aj o.

²⁰Tsa' tiliyob jini xchoñoñelob mu' bʌ i choñob chubʌ'añʌl ti chajp ti chajp. Junyajl cha'yajl tsa' jijliyob ti jumpat ba' ñup'ul i ti' tac Jerusalén.

²¹Tsac tiq'uiyob. Tsac subeyob: ¿Chucoch woli la' jijlel ti' t'ejl ts'ajc? Mi ma'anic mi la' cʌy la' mel, mux caj j cʌchetla, cho'on. Jini cha'an ma'anix tsa' cha' tiliyob che' ti' yorajlel c'aj o.

²²Tsac subeyob levíjob cha'an mi' sʌq'uesañob i bʌ cha'an mi' tilel i cʌntañob i ti' tac tejclum cha'an yom mi' q'uejlel ti ch'ujul i yorajlel c'aj o. Jini cha'an, c Dios, ña'tañon. Q'ueleyon ti uts'at cha'an jini tsa' bʌ c mele. Coltañon come wen awujil p'untaya. Cabʌlʌch a c'uxbiya, cho'on.

²³Che' ti ili ora tsaj q'uele ja'el israelob tsa' bʌ i pʌyʌyob i yijñam ch'oyolo' bʌ ti Asdod, ti Amon, yic'ot ti Moab.

²⁴Lamital i yalobilob tsi' cha'leyob t'an che' bajche' i pi'ʌlob ti Asdod. Mach yujilobic lac t'an. Tsa' jach i cha'leyob t'an che' bajche' i ña'.

²⁵Tsa cʌ'leyob. Tsac subeyob chocbilobix ti Dios cha'an i mul. Tsac bajbeyob lamital winicob. Tsac bocbeyob i tsutsel i jol. Wersa tsi' yʌc'ʌyob i t'an ti' c'aba' Dios cha'an mi' cʌyob i mel bajche' jini. Tsac subeyob: Mach la' sijibeñob jini xch'oc bʌ la' walobilob jini winicob mach bʌ israelobic. Mach la' c'ajtin xch'oc bʌ i yalobilob cha'an i yijñam la' walobilob. Mach la' c'ajtiñob ja'el cha'an la' wijñam.

²⁶¿Mach ba jinic i mul Salomón i rey Israel? Tsi' pʌyʌ x'ixicob mach bʌ lac pi'ʌlobic. Wen ñuc Salomón. Ma'anic yambʌ rey lajal bʌ i ñuclel. Dios tsi' c'uxbi. Dios tsi' wa'choco cha'an mi' yumañob pejtel israelob. Anquese cabʌl i ñuclel tsa' sojqui ti mulil cha'an x'ixicob mach bʌ israelobic.

²⁷¿Yom ba mic jac'beñetla? ¿Yom ba mi la' cha'len mulil bajche' jini? Mach cu yomic. Woli la' ñusʌben i mandar lac Dios che' mi la' cha'len ñujpuñijel yic'ot x'ixicob mach bʌ israelobic, cho'on.

²⁸Juntiquil ch'iton bʌ i yalobil Joiada, i yalobil bʌ Eliasib jini ñuc bʌ motomaj, tsi' pʌyʌ ti' yijñam xch'oc bʌ i yalobil Sanbalat jini horon. Jini cha'an tsac choco majlel.

²⁹C Dios, ña'tʌbeñob i mul, come tsi' bib'esayob i ye'tel motomajob. Tsi' yʌc'ʌyob ti wajlentel jini xuc'ul bʌ t'an tsa' bʌ a wʌq'ueyob ti' wenta motomajob yic'ot levíjob.

³⁰Jini cha'an tsac sʌq'uesayob. Tsac choco majlel jini mach bʌ israelobic. Tsac wa'choco motomajob yic'ot levíjob ti mojt ti mojt. Tsa cʌq'ueyob i ye'tel.

³¹Tsac subeyob israelob cha'an mi' ch'ʌmbeñob tilel chuqui yom: jini si' cha'an mi' yʌq'ueñob jini tsʌnsʌbil bʌ i majtan Dios che' ti' yorajlel, yic'ot jini ñaxan bʌ i cuch cholel. C Dios, q'ueleyon ti uts'at.