Read Chol Nehemias 2 Bible Online

Nehemias 2 - Chol bible

Nehemias 2

¹Che' numenix chʌmp'ejl uw, che' ti abril, tsac ch'ʌmʌ vino. Tsa cʌq'ue i jap jini rey. Ch'ijiyemix c pusic'al cha'an c pi'ʌlob ti Jerusalén. Cojax to wʌle woli' tsictiyel ti' tojlel rey mi ch'ijiyemon.

²Jini cha'an jini rey tsi' subeyon: ¿Chucoch ch'ijiyemet che' mach c'ametic? Tsiquilʌch wola' mel a pusic'al, che'en jini rey. Tsa' cajiyon ti cabʌl bʌq'uen.

³Tsac sube jini rey: La' chʌn cuxtiyic jini rey ti pejtelel ora. ¿Mach ba yomic ch'ijiyem c pusic'al che' jejmen to jini tejclum ba' muculob c ñojte'el? ¿Mach ba yomic ch'ijiyem c pusic'al che' pulem jini colem bʌ tranca tac ti' ti' tejclum? cho'on tsaj c'ajtibe.

⁴Jini rey tsi' yʌlʌ: Yomcu. ¿Chuqui a wom a c'ajtibeñon? che'en. Mucul jach tsac pejca Dios am bʌ ti panchan.

⁵Tsac sube jini rey: A winicon. Mi uts'at ma' q'uelon, chocoyon majlel ti Judá mi che'ʌch yom a pusic'al, cha'an mic cha' mel jini tejclum ba' muculob c ñojte'el, cho'on tsac sube.

⁶Ya' buchul i yijñam rey ti' t'ejl. Jini rey tsi' c'ajtibeyon: ¿Jal ba ma' majlel? ¿Baqui ora ma' cha' julel? che'en. Tsac sube jayp'ejl uw com jalijel. Che' jini tsi' ña'ta i chocon majlel come uts'at tsi' yubi.

⁷Tsac sube: Mi uts'at ma' q'uelon, aq'ueñon jun tac cha'an mi' yʌq'ueñoñob permiso jini gobernadorob ti junwejl ja' cha'an mic ñumel majlel c'ʌlʌl mij c'otel ti Judá.

⁸Aq'ueñon jun ja'el cha'an mic pʌsben Asaf mu' bʌ i cʌntʌben i te'el rey, cha'an mi' yʌq'ueñon te'. Che' jini mux c p'el lojon te' cha'an i ti' tac Templo yic'ot cha'an jini colem bʌ tranca tac ja'el ya' ti' ti' wa'al bʌ ts'ajc am bʌ ti' joytilel tejclum yic'ot i ti' cotot ba' mi caj c chumtʌl, cho'on tsac sube. Jini rey tsi' yʌq'ueyon chuqui tsaj c'ajtibe. Che'ʌch tsi' pʌsbeyon Dios i yutslel i pusic'al.

⁹Tsa' c'otiyon ba' añob gobernadorob ti junwejl ja'. Tsa cʌq'ueyob jun ts'ijbubil bʌ i cha'an rey. Woli' pi'leñoñob majlel winicob chocbilo' bʌ majlel cha'an rey.

¹⁰Che' bʌ tsa' juliyon, tsi' yubiyob Sanbalat jini horon yic'ot Tobías i winic. I p'olbalʌch Amon jini Tobías. Tsi' wen meleyob i pusic'al cha'an tilemix winic yom bʌ i coltan jini israelob.

¹¹Tsa' c'otiyon ti Jerusalén. Che' ñumeñix uxp'ejl q'uin

¹²Dios tsi' yotsa tic pusic'al chuqui tsac ña'ta c mel cha'an i coltʌntel c pi'ʌlob. Ma'anic tsac subeyob chuqui tsi' yʌc'ʌ tic pusic'al Dios. Tsa' ch'ojyiyon ti ac'ʌlel quic'ot cha'tiquil uxtiquil winicob. Cojach joñon c'ʌchʌlon. Ma'anic yambʌ caballo quic'ot lojon.

¹³Ti ac'ʌlel tsa' loq'uiyon ti' ti' tejclum am bʌ ti joctʌl. Tsa' ñumiyon majlel ba'an cuxul bʌ ja' ti pozo i c'aba' Ajin. Tsa' majliyon ti' ti' tejclum ba' mi' chojquel misʌjelʌl. Tsac wen q'uele jini ts'ajc ya' ti Jerusalén tsa' bʌ jejmi yic'ot i ti' tac tsa' bʌ puli ti c'ajc.

¹⁴Tsa' ñumiyon majlel ba'an yambʌ i ti' i c'aba' Cuxul bʌ Ja'. Tsa' ñumiyon ba'an i tanquejlel i ñuxijib rey ba' ma'anic tsa' mejli ti ñumel j c'ʌchlib.

¹⁵Tsac chʌn cha'le xʌmbal majlel ti coc ya' ti joctʌl che' ti ac'ʌlel. Tsac wen q'uele jini ts'ajc. Che' jini tsa' cha' sujtiyon. Tsa' cha' ochiyon ti tejclum ya' ba'an i ti' Joctʌl. Tsa' juliyon.

¹⁶Jini yumʌlob ma'anic tsi' ña'tayob baqui tsajñiyon mi chuqui tsajñi c mel. Maxto anic tsac subeyob judíojob mi motomajob mi yumʌlob mi xchumtʌlob año' bʌ ti' wenta cha'an mi' melob jini e'tel.

¹⁷Tsa' caji c subeñob: Q'uelelix la' cha'an bajche' añonla. P'ump'un lac bʌ come jejmenix Jerusalén. Laj pulem i ti' tac. Conla c cha' melben i ts'ajquil Jerusalén cha'an mi' lajmel la quisin, cho'on.

¹⁸Tsa' caji c subeñob bajche' tsi' pʌsbeyon i yutslel i pusic'al Dios yic'ot chuqui tsi' subeyon rey. Jini cha'an tsi' yʌlʌyob: Concula. La' lac mele', che'ob. Jini cha'an tsa' ñuc'ayob i pusic'al. Tsa' caji i techob jini wen bʌ e'tel.

¹⁹Mich' tsi' yubiyob Sanbalat jini horon yic'ot Tobías jini amon, i winic Sanbalat, yic'ot Gesem jini árabe. Tsi' wajleyoñob. Tsi' ts'a'leyoñob. Tsi' yʌlʌyob: ¿Chuqui woli la' cha'len? ¿La' wom ba la' contrajin jini rey? Che'i tsi' lon jop'beyoñob lac mul.

²⁰Tsac subeyob: Jini Dios am bʌ ti panchan mi caj i coltañon lojon. I winicon lojon. Jini cha'an mic tech lojon jini e'tel. Mach la' wentajic mi wolic cha' mel lojon Jerusalén come mach la' cha'anic jini lum. Mach wʌ'ic ch'oyoletla ilayi. Mach chucbilic la' c'aba' ti ili tejclum, cho'on.