Read Chol Nehemias 5 Bible Online

Nehemias 5 - Chol bible

Nehemias 5

¹Tsa' cajiyob ti wocol t'an winicob yic'ot i yijñamob cha'an i mul yaño' bʌ judíojob. I pi'ʌlob i bʌ.

²Ya' añob jini tsa' bʌ i yʌlʌyob: Joñon lojon quic'ot pejtel calobilob cabʌlon lojon. Bʌbʌq'uen mic chʌmel lojon ti wi'ñal. Jini cha'an tsa cotsa calobilob lojon ti majtan e'tel ti' yum cha'an mic chobejtʌbentel trigo cha'an mij c'ux lojon, che'ob.

³An ja'el tsa' bʌ i yʌlʌyob: Ma'anix c chubʌ'an lojon, mi lum, mi ts'usubil, mi otot. Come tsa cʌc'ʌ lojon ti' wenta yumʌlob ti' q'uexol i bʌl lojon c ñʌc' cha'an woliyon lojon ti wi'ñal, che'ob.

⁴Yaño' bʌ tsi' yʌlʌyob: Tsac beta lojon taq'uin cha'an c tojoñel lojon ba'an jini rey. Wersa tsac choño lojon c lum yic'ot c ts'usubil cha'an mic toj lojon.

⁵Lajal c bʌc'tal lojon bajche' i bʌc'tal c pi'ʌlob. Lajal calobilob lojon che' bajche' i yalobilob. Woli cotsan lojon ch'iton bʌ calobilob yic'ot xch'oc bʌ calobilob ti majtan e'tel ti' yum. Lamital jini xch'oc bʌ calobilob tsa'ix ochiyob ti e'tel ti' yum. Ma'anic c p'ʌtʌlel lojon cha'an mij coltañob, come c lum lojon yic'ot c ts'usubil lojon añix ti' wenta yaño' bʌ winicob, che'ob.

⁶Tsa' wen mich'ayon che' bʌ tsa cubibeyob i yuq'uel yic'ot i t'an cha'an woli' p'ump'un tic'lʌntelob.

⁷Tsac ña'ta tic pusic'al chuqui yom. Tsa cʌ'le jini ñuco' bʌ winicob yic'ot jini año' bʌ i ye'tel. Tsac subeyob: Woli la' chilbeñob la' pi'ʌlob i jol i taq'uin ti jujuntiquiletla, cho'on. Tsac tempa tilel cabʌl winicob x'ixicob cha'an mic melob.

⁸Tsac subeyob: Tsac cha'le lojon wersa cha'an mic cha' mʌn loq'uel jini judíojob lac pi'ʌlob ba' pam pujquemob ti' wenta yumʌlob ti yan tac bʌ lum. ¿Yom ba mi la' cha' otsan la' pi'ʌlob ti to'ol e'tel cha'an mic cha' mʌñob lojon loq'uel? cho'on. Ñʌch'ʌlob jach. Ma'anic tsi' tajayob i t'an cha'an i mul.

⁹Tsac subeyob ja'el: Mach uts'atic chuqui woli la' mel. ¿Mach ba yomic mi la' mel chuqui uts'at cha'an mi la' bʌc'ñan Dios? Machiqui mi caj i ts'a'leñonla laj contrajob ti yan tac bʌ lum.

¹⁰Joñon ja'el quic'ot c pi'ʌlob quic'ot c winicob woli cʌq'ueñob lojon taq'uin yic'ot i bʌl i ñʌc' ti bet. La' wocolic mic subeñetla, cʌyʌx la' ch'ʌm i jol taq'uin.

¹¹Cha' aq'ueñobix i lum la' pi'ʌlob ti jini jach bʌ q'uin. Cha' aq'ueñobix i ts'usubil yic'ot olivajil yic'ot i yotot tac ti jujuntiquil yic'ot i jol pejtel i ganar taq'uin yic'ot i jol i bʌl i ñʌc' yic'ot i jol vino yic'ot i jol aceite tsa' bʌ la' chilbeyob, cho'on.

¹²Tsi' jac'ʌyob: Mux c cha' aq'ueñob lojon che' bajche' wola' wʌl. Ma'anix mi caj c chilbeñob i chubʌ'an, che'ob. Jini cha'an tsac pʌyʌ tilel motomajob. Tsac sube jini winicob año' bʌ i mul cha'an mi' yʌc'ob i t'an ti' tojlel motomajob cha'an mi' melob ti ts'ʌcʌl chuqui tsi' yʌlʌyob.

¹³Tsac lijca c pislel. Che'ʌch yom mi' lijcañetla Dios cha'an mi la' loq'uel ti la' wotot yic'ot ti la' we'tel, pejteletla mach bʌ anic mi la' cha'len che' bajche' tsa' la' wʌc'ʌ la' t'an. Che'ʌch yom mi la' lijcʌntel jinto che' ma'anix la' chubʌ'an, cho'on. Pejtel winicob x'ixicob tsi' yʌlʌyob: Che'ʌch yom mi ma'anic tsa' lac mele, che'ob. Tsi' subuyob ñuc lac Yum. Tsi' laj meleyob chuqui tsi' yʌlʌyob.

¹⁴Anquese lajchʌmp'ejlix jab gobernadoron ti jini lum Judá, mach tic majtanic tsaj c'uxu lojon c waj joñon quic'ot c pi'ʌlob che' bajche' i tilelob mi' melob gobernadorob. Che' bʌ tsa' aq'uentiyon que'tel ti gobernador che' junc'ajlix jab woli ti yumʌntel jini rey Artajerjes c'ʌlʌl ti' lajchʌmp'ejlel i cha'c'al jab, ma'anic tsac ch'ʌmʌ c tojol cha'an que'tel ti gobernador.

¹⁵Jini ñaxan bʌ gobernadorob tsa' bʌ i cha'leyob i yumʌntel che' maxto tilemonic tsi' yʌq'ueyob al bʌ i cuch. Tsi' ch'ʌmʌyob waj yic'ot vino yic'ot cha'c'al sʌsʌc bʌ taq'uin ti' c'ʌb jujuntiquil winic i wenta tojoñel. Ma'anic tsi' tojoyob i bʌl i ñʌc'. I winicob ja'el tsi' cha'leyob i yumʌntel ti' tojlel xtejclumob. Mach che'ic tsac mele joñon cha'an wolic bʌc'ñan Dios.

¹⁶Tsac cha'le wersa e'tel ti ili ts'ajc quic'ot c pi'ʌlob. Ma'anic tsa' ñuc'a c lum. C winicob ja'el tsi' tempayob i bʌ ya' ti ts'ajc. Tsi' yʌc'ʌyob i bʌ cha'an ili e'tel.

¹⁷Tsac we'sa lujuntiquil i waxʌcc'al (150) judíojob yic'ot año' bʌ i ye'tel. Tsac we'sa ja'el jini tsa' bʌ tiliyob ba' añon loq'uemo' bʌ ti xchumtʌl tac ti lac joytilel.

¹⁸Ti jujump'ejl q'uin tsac chajpʌbeyob juncojt tat wacax yic'ot wʌccojt yajcʌbil bʌ ña' tiñʌme' yic'ot mut. Junyajl ti lujump'ejl tac q'uin tsac choco majlel winicob cha'an on mi' ch'ʌmob tilel vino. Anquese tsa cʌq'ueyob pejtel jini, ma'anic tsaj c'ajtibeyob c tojol cha'an que'tel ti gobernador, come p'ump'uñob. Cabʌl i wocol cha'an i ye'tel ti ts'ajc.

¹⁹C Dios, ña'tañon. Pʌsbeñon i yutslel a pusic'al cha'an pejtel chuqui tsac melbeyob ili winicob x'ixicob.