Read Chol Nehemias 9 Bible Online

Nehemias 9 - Chol bible

Nehemias 9

¹Che' ti 10 de octubre tsi' tempayob i bʌ jini israelob. Tsi' cha'leyob ch'ajb. Tsi' lʌpʌyob coxtal. Tsi' mujlayob i jol ti' ts'ubeñal lum.

²Tsi' tʌts'ʌyob i bʌ ti' tojlel jini ch'oyolo' bʌ ti yan tac bʌ lum. Ti jujuntiquil tsa' wa'leyob i sub i mul. Tsi' subuyob i jontolil i ñojte'el ja'el.

³Tsa' wa'leyob ya' ba' buchulob. Uxp'ejl ora tsi' yubibeyob i mandar i Yum Dios. Yambʌ uxp'ejl ora tsi' subeyob Dios i mul. Tsi' ch'ujutesayob i Yum Dios.

⁴Tsa' wa'leyob ya' ti' tec'oñib levíjob: Jesúa, Bani, Cadmiel, Sebanías, Buni, Serebías, Bani yic'ot Quenani. Wen c'am tsi' pejcayob i Yum Dios.

⁵Jini levíjob: Jesúa, Cadmiel, Bani, Hasabnías, Serebías, Hodías, Sebanías yic'ot Petaías tsi' subeyob israelob: Wa'i'la. Ch'ujutesan la' Yum Dios wʌle yic'ot ti pejtelel ora, che'ob. Tsa' caji' pejcañob Dios: La' ch'ujutesʌntic jini ñuc bʌ a c'aba'. Ñumen ñuc a c'aba' bajche' mi mejlel i subob winicob, che'ob.

⁶Esdras tsi' yʌlʌ: Jatet jach Yumʌlet, c Yum lojon. Tsa' mele panchan, jini ñuc bʌ panchan ya' ba' chumulet. Tsa' mele ja'el pejtel jini chumulo' bʌ ti panchan. Tsa' mele pañimil yic'ot pejtel am bʌ ti pañimil. Tsa' mele ñajb yic'ot pejtel am bʌ ti ñajb. Ma' cʌntan ti pejtelel. Mi' ch'ujutesañetob jini chumulo' bʌ ti panchan.

⁷C Yum lojon, i Diosetʌch Abram tsa' bʌ a yajca. Tsa' pʌyʌ loq'uel Abram ya' ti Ur ba'an jini caldeojob. Tsa' wotsʌbe i c'aba' Abraham.

⁸Tsa' q'uelbe i pusic'al. Xuc'ul ti a wut tsi' ñopoyet. Tsa' wʌq'ue xuc'ul* bʌ t'an cha'an muq'uix a wʌq'ueñob jini lum i p'olbal Abraham. Tsa' wʌq'ueyob i lum cananeo, i lum heteo, i lum amorreo, i lum ferezeo, i lum jebuseo, yic'ot i lum gergeseo cha'an ma' ts'ʌctesan jini t'an tsa' bʌ a sube Abraham come tojet.

⁹Tsa' q'uele c ñojte'el lojon che' bʌ woli' tic'lʌntelob ti Egipto. Tsa' wubibeyob c'am bʌ i t'an ya' ti' ti' Chʌchʌc bʌ Ñajb.

¹⁰Tsa' pʌsbe Faraón ñuc bʌ i yejtal a p'ʌtʌlel yic'ot bʌbʌq'uen tac bʌ che' bʌ tsa' wʌc'ʌ ti wocol yic'ot i winicob yic'ot pejtel año' bʌ ti' lumal. Come tsa' ña'ta bajche' tsi' contrajiyob c ñojte'el lojon che' bʌ tsi' chañ'esayob i bʌ. Jini cha'an tsa' pʌsbeyob a p'ʌtʌlel cha'an mi' cʌñetob che' bajche' mij cʌñet lojon wʌle.

¹¹Tsa' t'oxbeyob colem ñajb c ñojte'el lojon cha'an mi' c'axelob. Ya' ti' yojlil ñajb tsi' xʌñʌyob tiquin bʌ lum. Jatet tsa' choco ochel ti tam bʌ ja' jini woli bʌ i yajñesañob che' bajche' mic choc lojon ochel xajlel ti p'ʌtʌl bʌ ja'.

¹²Che' ti q'uiñil tsa' toj'esayob majlel ti toj wa'al bʌ tocal. Che' ti ac'ʌlel tsa' tsictesʌbeyob i bijlel ti toj wa'al bʌ c'ajc.

¹³Tsa' jubiyet tilel ti pam wits i c'aba' Sinaí. Jatet añet bʌ ti panchan tsa' pejca winicob. Tsa' wʌq'ueyob toj bʌ tic'oñel yic'ot isujm bʌ cʌntesa yic'ot uts'at bʌ mandar yic'ot uts'at bʌ ley.

¹⁴Tsa' pʌsbeyob bajche' yom mi' c'uxbiñetob ti jini ch'ujul bʌ q'uin a cha'an che' mi' c'ajob i yo. Tsa' sube a winic Moisés pejtel a ley yic'ot a mandar yic'ot a cʌntesʌbal cha'an mi' cha' subeñob winicob x'ixicob.

¹⁵Tsa' chocbeyob tilel maná loq'uem bʌ ti panchan cha'an i wi'ñal. Tsa' loc'sʌbeyob ja' ti xajlel che' tiquiñob i ti'. Tsa' subeyob ochel i ch'ʌm jini lum tsa' bʌ a wʌn ña'ta a wʌq'ueñob che' bʌ tsa' mele xuc'ul bʌ t'an awic'otob.

¹⁶C ñojte'el lojon yic'ot c tat lojon tsi' chañ'esayob i bʌ. Tsʌts tsi' meleyob i pusic'al. Ma'anic tsi' jac'ʌyob a mandar.

¹⁷Mach yomobic i ch'ujbin a t'an. Ma'anic tsi' yotsayob ti' pusic'al jini bʌbʌq'uen tac bʌ tsa' bʌ a melbeyob. Tsʌts tsi' meleyob i pusic'al c ñojte'el lojon. Ti' bajñel pusic'al tsi' yajcayob i yum cha'an mi' sujtelob ti to'ol e'tel ya' ti Egipto. Uts bʌ Dioset. A wujil i ñusʌntel mulil. Wen a wujil p'untaya. Jal ma' mich'an. Cabʌl a c'uxbiya. Ma'anic tsa' cʌyʌ c ñojte'el lojon

¹⁸che' bʌ tsi' meleyob alʌ tat wacax ti tsucul taq'uin cha'an mi' diosiñob. Tsi' yʌlʌyob: “Jiñʌch lac Dios tsa' bʌ i pʌyʌyonla loq'uel ti Egipto”, che'ob. Anquese cabʌl tsi' cha'leyob jontolil, anquese tsi' p'ajayetob,

¹⁹cabʌl tsa' p'untayob. Ma'anic tsa' cʌyʌyob ti tiquin bʌ lum. Jini toj wa'al bʌ tocal ma'anic tsi' cʌyʌ i toj'esañob majlel ti q'uiñil. Jini toj wa'al bʌ c'ajc ma'anic tsi' cʌyʌ i toj'esañob majlel ti ac'ʌlel. Tsi' chʌn aq'ueyob i sʌclel. Tsi' chʌn pʌsbeyob i bijlel baqui yom mi' majlelob.

²⁰Tsa' choco tilel uts'at bʌ a wEspíritu cha'an ma' cʌntesañob. Ma'anic tsa' cʌyʌ a chocbeñob tilel jini maná* cha'an mi' c'uxob. Tsa' wʌq'ueyob ja' cha'an mi' japob che' tiquin i ti'.

²¹Cha'c'al jab tsa' cʌntayob ti tiquin bʌ lum. Ma'anic chuqui anto yom i cha'añob. Ma'anic tsa' jiliyob i pislel. Ma'anic tsa' sijt'iyob i yoc.

²²Tsa' wʌq'ueyob i lumal yambʌ winicob yic'ot i yumʌntel. Tsa' t'oxbeyob i lum. Jini cha'an tsi' ch'ʌmbeyob i lum Sehón, jini rey am bʌ ti Hesbón, yic'ot i lum Og, jini rey am bʌ ti Basán.

²³Tsa' p'ojlesʌbeyob i yalobilob che' bajche' ec' ti panchan. Tsa' pʌyʌyob ochel ti jini lum. Ma'anic tsa' ochiyob i tatob che' bʌ tsa' subeyob ochel i ch'ʌmob.

²⁴Tsa' ochiyob i yalobilob. Tsi' ch'ʌmʌyob jini lum. Tsa' t'uchta jini ya' bʌ chumulob: jini cananeojob yic'ot i reyob yic'ot i pi'ʌlob ti jini lum. Tsa' wʌc'ʌyob ti' wenta israelob cha'an mi' melbeñob bajche' jach yomob.

²⁵Tsi' ch'ʌmʌyob wen melbil bʌ tejclum tac joy mʌcbil bʌ ti ts'ajc, yic'ot wen bʌ lum an tac bʌ i bʌl. Tsa' cajiyob ti chumtʌl ti wen chajpʌbil bʌ otot am bʌ cabʌl i bʌl. An melbil bʌ pozo yic'ot ts'usubil yic'ot olivojil yic'ot cabʌl te' on bʌ mi' yʌc' i wut. Tsi' c'uxuyob. Tsa' ñaj'ayob. Tsa' cajiyob ti jujp'el. Tijicñayob cha'an tsa' pʌsbeyob cabʌl a wutslel.

²⁶Pero ma'anic tsi' jac'beyetob. Tsi' ñusayob a t'an. Tsi' ts'a'leyob a mandar. Tsi' tsʌnsayob jini x'alt'añob a cha'an tsa' bʌ i subeyob cha'an mi' sutq'uiñob i bʌ ba' añet. Tsi' cha'leyob cabʌl p'ajoñel.

²⁷Jini cha'an jatet tsa' wʌc'ʌyob ti' c'ʌb i contrajob tsa' bʌ i p'ump'un tic'layob. Che' bʌ tsi' yubiyob wocol, che' bʌ c'am tsi' pejcayetob, tsa' wubibeyob i t'an ya' ti panchan. Tsa' p'untayob cha'an cabʌl i yutslel a pusic'al. Tsa' chocbeyob tilel i yaj coltayajob tsa' bʌ i loc'sayob ti' p'ʌtʌlel i contrajob.

²⁸Che' bʌ cha' tijicñayix pañimil, tsi' cha' cha'leyob jontolil ti a wut. Jini cha'an tsa' cʌyʌyob ti' wenta i contrajob cha'an mi' yumañob. Che' bʌ tsi' sutq'uiyob i bʌ, che' bʌ c'am tsi' pejcayetob, tsa' wubibeyob i t'an ya' ti panchan. Ma'anic tsa' cʌyʌ a coltañob come wen a wujil p'untaya.

²⁹Cabʌl tsa' xiq'uiyob. Tsa' cha' pʌyʌyob cha'an mi' jac'ob a tic'oñel. Tsi' chañ'esayob i bʌ. Ma'anic tsi' ch'ujbiyob a mandar. Tsi' ñusayob i cʌntesʌntel anquese tsa' wʌlʌ mi caj i cuxtiyel jini mu' bʌ i jac'. Ma'anic tsi' jac'ʌyob. Tsʌtsob i pusic'al. Ch'ejlatax tsi' meleyob i bʌ. Mach yomobic i jac'beñet a t'an.

³⁰Cabʌl jab tsa' cuchbeyob i mul. Tsa' choco tilel x'alt'añob tsa' bʌ i pejcayob ti' p'ʌtʌlel a wEspíritu. Tsi' subeyob cha'an mi' sutq'uiñob i bʌ, pero mach yomobic i ch'ujbin a t'an. Jini cha'an tsa' wʌc'ʌyob ti' wenta winicob mach bʌ i pi'ʌlobic.

³¹Ma'anic tsa' jisayob, Dios, come cabʌl a p'untaya. Ma'anic tsa' junyajlel cʌyʌyob cha'an uts a pusic'al. Wen a wujil p'untaya.

³²C Dios lojon, ñuc bʌ Dioset, p'ʌtʌlet, bʌc'ñʌbilet. Ma' ts'ʌctesan jini xuc'ul bʌ a t'an. Cabʌl ma' pʌs a c'uxbiya. Jini cha'an q'ueleyon lojon. Cabʌlʌchix c wocol tsa' bʌ tili tic tojlel lojon, ti' tojlel c rey lojon, yic'ot c yumob lojon, yic'ot c motomajob lojon, yic'ot x'alt'añob tsa' bʌ a chocbeyon lojon tilel, yic'ot c tat lojon, yic'ot pejtel winicob x'ixicob a cha'año' bʌ. An c wocol c'ʌlʌl che' bʌ tsi' cha'leyob yumʌntel jini asiriajob c'ʌlʌ wʌle. Ma'anic mi' lajmel.

³³Tsa' pʌsʌ a bʌ ti toj che' bʌ tsa' chocbeyon lojon tilel wocol. Che'ʌch tsa' mele come xuc'ulet. An c mul lojon cha'an tsac mele lojon jontolil.

³⁴C reyob lojon yic'ot c yumob lojon yic'ot motomajob yic'ot c ñojte'el lojon ma'anic tsi' jac'ʌyob i cʌntesʌntel. Ma'anic tsi' ch'ujbiyob a mandar che' bʌ tsa' subeyob cha'an mi' sutq'uiñob i bʌ.

³⁵Ma'anic tsi' yumayetob che' bʌ tsa' wʌq'ueyob i cha'leñob yumʌntel anquese tsa' pʌsbeyob ñuc bʌ a wenlel ya' ti jini ñuc bʌ lum, jini wen bʌ lum tsa' bʌ a wʌq'ueyob. Ma'anic tsi' cʌyʌyob i mel jontolil.

³⁶Jini cha'an woliyonix lojon ti to'ol e'tel. Jixcu jini lum tsa' bʌ a wʌq'ueyob c ñojte'el lojon cha'an mi' c'uxob i wut cha'an mi' wen chumtʌlob, mach c cha'anix lojon. Mozojon lojon ti ili lum.

³⁷C chol lojon mi' yʌc' i wut cha'an mi' ch'ʌmob jini reyob ñajt bʌ chumulob. Tsa' wa'chocoyob cha'an mic yumañob lojon, cha'an mic toj lojon c mul. C bʌc'tal lojon yic'ot c wacax lojon an ti' wenta jini reyob cha'an mi' melbeñoñob bajche' jach yomob. Cabʌl woliyon lojon ti wocol. Che' tsi' yʌlʌ Esdras.

³⁸Woli cʌc' lojon jini t'an cha'an pejtel jini wocol woli bʌ cubin lojon. Wolic ts'ijban lojon. Woli' yʌc'ob i sello c yumob lojon yic'ot jini levíjob yic'ot motomajob c cha'an lojon cha'an wolic mel lojon c bʌ.