Read Chol Ester 3 Bible Online

Ester 3 - Chol bible

Ester 3

¹Che' ujtemix jini, jini rey Asuero tsi' yʌq'ue ñumen ñuc bʌ i ye'tel Amán i yalobil Hamedata i p'olbal bʌ Agag. Tsi' buchchoco ti' t'ejl ya' ti' tojlel pejtel ñuco' bʌ i ye'tel.

²Pejtel x'e'telob wa'alo' bʌ ti' ti' i yotot rey tsi' c'uchchocoyob i bʌ che' bʌ tsa' ñumi Amán. Tsi' yʌq'ueyob cortesía, come tsi' yʌc'ʌ mandar rey cha'an che'ʌch yom mi' melob. Ma'anic tsi' c'uchchoco i bʌ Mardoqueo. Ma'anic tsi' yʌq'ue cortesía.

³X'e'telob i cha'an rey tsi' c'ajtibeyob Mardoqueo: ¿Chucoch wola' ñusʌben i mandar rey? che'ob.

⁴Cabʌl q'uin tsi' yʌ'leyob Mardoqueo, pero ma'anic tsi' jac'beyob i t'an. Tsa' majliyob ba'an Amán. Tsi' subeyob bajche' woli' mel Mardoqueo cha'an mi' ña'tañob chuqui mi caj i yʌl Amán, come Mardoqueo tsa'ix i subu i bʌ ti judío.

⁵Tsa' wen mich'a Amán che' bʌ tsi' q'uele ma'anic woli' c'uchchocon i bʌ Mardoqueo, ma'anic woli' yʌq'uen cortesía.

⁶Che' yujilix Amán judíojʌch Mardoqueo, tsi' ña'ta i tsʌnsan pejtel judíojob pam pujquemo' bʌ ti pejtel i yumʌntel Asuero, mach jinic jach Mardoqueo.

⁷Che' ti abril, che' ti' lajchʌmp'ejlix jab i yumʌntel jini rey Asuero, tsi' cha'leyob yajcaya ti alas cha'an mi' ña'tañob baqui ora yom ujtel chuqui tsi' ña'ta i mel Amán. Ñaxan tsa' caji' ña'tan baqui bʌ tsic, ti wi'il tsi' ña'ta jini uw, jiñʌch febrero.

⁸Amán tsa' caji' suben jini rey Asuero: An winicob x'ixicob pam pujquemo' bʌ ti jujump'ejl colem tejclum ti a yumʌntel. Yambʌyʌch i ley, mach lajalic bajche' lac ley. Ma'anic mi' jac'beñob i ley jini rey. Jini cha'an mach yomic mi lac chʌn cuchbeñob i mul jini winicob x'ixicob.

⁹Mi che'ʌch yom i pusic'al jini rey, la' i yʌc' mandar cha'an mi' laj jisʌntelob. Mux c toje' diez mil sʌsʌc taq'uin cha'an mi' yʌjq'uelob ti chʌmel. Che' jini, jini rey mi mejlel i yʌc' jini taq'uin ti' wenta xlot taq'uiñob cha'an mi' yʌc'ob ti' yotlel taq'uin i cha'an rey. Che' tsi' yʌlʌ Amán.

¹⁰Jini cha'an jini rey tsi' loc'sa i mʌtc'ʌb am bʌ i ts'ijbal i cha'an rey. Tsi' yʌq'ue Amán i yalobil Hamedata i p'olbal bʌ Agag. Jini Amán i contrajʌch judíojob.

¹¹Jini rey tsi' sube: A cha'añʌch a taq'uin yic'ot ili winicob x'ixicob ja'el. Mi cʌc'ob ti a wenta cha'an ma' mel bajche' jach yom a pusic'al, che'en.

¹²Che' ñumeñix cha'p'ejl uxp'ejl semana, tsa' pʌjyiyob tilel sts'ijbayajob cha'an mi' yotsañob ti jun jini mandar che' bajche' i tilel mi' cha'leñob ts'ijb ti' t'an tac jujump'ejl colem tejclum, cha'an mi' q'uelob pejtel ñuco' bʌ i ye'tel yic'ot gobernadorob yic'ot yumʌlob. Tsi' yʌc'ʌ ti ts'ijbuntel Amán; tsi' yotsʌbe i c'aba' jini rey Asuero. Tsi' ñotbe i sellojlel am bʌ ti' mʌtc'ʌb rey.

¹³Tsi' choco majlel jun ti' c'ʌb x'ac' juñob ti pejtelel colem tejclum ti' yumʌntel rey cha'an mi' jisañob judíojob, jini ñoxobix bʌ yic'ot ch'itoñob to bʌ, x'ixicob yic'ot alp'eñelob, ti jump'ejl jach q'uin, ti 28 de febrero ti yambʌ jab, cha'an mi' chilbeñob i chubʌ'an ja'el.

¹⁴Tsi' yʌc'ʌ ti pam pujquel majlel jini mandar ti jujump'ejl tejclum cha'an mi' chajpañob i bʌ winicob x'ixicob cha'an mi' tsʌnsañob che' i yorajlel.

¹⁵Jini x'ac juñob tsi' se'ñuyob majlel i bʌ cha'an i mandar rey. Tsa' pujqui jini mandar ti Susa, i tejclum rey. Tsa' caji' japob vino jini rey yic'ot Amán, pero tsa' ochi i ch'ijiyemlel i pusic'al jini chumulo' bʌ ti Susa.