Read Chol Ester 5 Bible Online

Ester 5 - Chol bible

Ester 5

¹Ti' yuxp'ejlel q'uin Ester tsi' xojo i bujc co'ʌl. Tsa' ochi ti mal i yotot rey ba'an i buchlib. Tsa' wa'le ya' ti corredor. Buchul jini rey ti' buchlib ti mal i yotot ya' ti' tojel i ti' otot.

²Che' bʌ tsi' q'uele jini co'ʌl Ester ya' wa'al ti' tojel i buchlib, tsi' pʌsbe i yutslel i pusic'al. Tsi' sʌts'ʌ i c'ʌb ba' chucul i cha'an i te'el rey cha'an mi' pʌy tilel Ester. Tsa' tili. Tsi' tʌlbe i ni' jini te'.

³Jini rey tsi' c'ajtibe: ¿Chuqui a wom j co' Ester? C'ajtibeñon. Mi caj cʌq'ueñet anquese lamital c yumʌntel, che'en.

⁴Ester tsi' sube: Mi che'ʌch yom jini rey la' tilic yic'ot Amán cha'an mi la' c'ux i bʌl la' ñʌc' tsa' bʌ c chajpa, che'en.

⁵Tsi' cha'le mandar rey: Pʌyʌ tilel Amán ti ora che' bajche' yom Ester, che'en. Che' jini tsa' tili jini rey yic'ot Amán cha'an mi' c'uxob i bʌl i ñʌc' tsa' bʌ i chajpʌbeyob Ester.

⁶Che' woli' japob vino, jini rey tsi' c'ajtibe Ester: ¿Chuqui a wom? C'ajtibeñon. Mi caj cʌq'ueñet anquese lamital c yumʌntel, che'en.

⁷Ester tsi' yʌlʌ: Com c'ajtibeñet, c rey, a wocolic mi che'ʌch yom a pusic'al, melbeñon chuqui wolij c'ajtibeñet. La' cha' tiliquet ijc'ʌl awic'ot Amán cha'an mi la' c'ux i bʌl la' ñʌc' mu' bʌ caj c chajpan. Ijc'ʌl to mi caj c subeñet chuqui com, che'en.

⁹Tijicña i pusic'al Amán tsa' loq'ui majlel. Che' bʌ tsi' q'uele Mardoqueo ti' ti' i yotot rey, cabʌl tsi' mich'le come ma'anic tsa' ch'ojyi. Ma'anic tsi' yʌq'ue cortesía.

¹⁰Amán ma'anic chuqui tsi' poj tumbe. Tsa' sujti ti' yotot. Tsi' pʌyʌ tilel i cʌñʌyo' bʌ yic'ot Zeres i yijñam.

¹¹Tsi' subeyob pejtel i ñuclel. Ñuc tsi' q'uele i bʌ cha'an cabʌl i chubʌ'an yic'ot i yalobilob yic'ot i c'uxbintel ti' tojlel rey, come jini rey tsi' yʌq'ue jini ñaxan bʌ buchlibʌl cha'an mi' yumʌntel ti' tojlel pejtel ñuco' bʌ i ye'tel.

¹²Tsi' yʌlʌ ja'el Amán: Jini co'ʌl Ester ja'el, che' bʌ tsi' chajpa we'elʌl, ma'anic tsi' pʌyʌ tilel yambʌ i pi'ʌl jini rey ti we'el, c bajñel jach. Cha' pʌybilon ijc'ʌl cha'an mic pi'len ti we'el jini rey.

¹³Anquese c'uxbibilon ti pejtelelob, mach tijicñayic c pusic'al che' mij q'uel jini judío Mardoqueo ya' bʌ buchul ti' ti' i yotot rey, che'en.

¹⁴Tsa' caji i subeñob i yijñam yic'ot i cʌñʌyo' bʌ: Ac'ʌ ti melol chan bʌ te' cha'an ma' jich'. Yom lajchʌnjajl i chanlel. Ti sʌc'ajel ijc'ʌl cucu suben jini rey cha'an mi' yʌc' ti jijch'el Mardoqueo. Che' jini cha' tijicñayix a pusic'al mux a cha' majlel ti c'ux waj yic'ot jini rey, che'ob. Amán uts'at tsi' yubi jini t'an. Tsi' yʌc'ʌ ti melol te' cha'an mi' jich'.