Read Chol Ester 6 Bible Online

Ester 6 - Chol bible

Ester 6

¹Ti jini jach bʌ ac'ʌlel ma'anic tsa' mejli ti wʌyel jini rey. Tsi' yʌc'ʌ mandar cha'an mi' ch'ʌmbeñob tilel jini jun ba' otsʌbil chuqui tac ñuc tsi' meleyob winicob. I c'aba' jini jun i yistoriajlel reyob. C'am tsa' caji' pejcañob jini jun ti' tojlel rey.

²Ya' otsʌbil ti jun chuqui tsi' mele Mardoqueo che' bʌ tsi' colta jini rey Asuero. Come Mardoqueo tsi' sube ba' ora tsi' chijtayob Bigtán yic'ot Teres, cha'tiquil eunucojob tsa' bʌ i q'uelbeyob i pam i yotot rey, che' bʌ tsi' ña'ta i tsʌnsañob.

³Jini rey tsi' c'ajtibeyob xq'uel jun: ¿Am ba chuqui uts'at tsi' taja Mardoqueo che' bʌ tsi' coltayon? ¿Tsa' ba aq'uenti i majtan? che'en. Jini año' bʌ i ye'tel ti' tojlel rey tsi' subeyob: Ma'anic chuqui tsi' taja, che'ob.

⁴Jini rey tsi' c'ajtibeyob: ¿Majqui ya'an ti pat otot? che'en. Ya'ix an Amán. Poj ochemix ti corredor ti' yotot rey cha'an mi' c'ajtiben permiso cha'an mi' yʌc' ti chʌmel Mardoqueo ya' ti te' tsa' bʌ i chajpa cha'an mi' jich'.

⁵Jini x'e'telob i cha'an rey tsi' subeyob: Ya'ix an Amán wa'al ti corredor, che'ob. Jini rey tsi' subeyob cha'an mi' pʌyob ochel.

⁶Jini cha'an tsa' ochi Amán. Jini rey tsi' sube: ¿Bajche' yom mic tsictesʌben i ñuclel jini winic c'uxbibil bʌ c cha'an? che'en. Tsi' lon ña'ta Amán: ¿Majqui jini c'uxbibil bʌ i cha'an rey? ¿Mach ba joñonic?

⁷Amán tsi' sube rey: Cha'an ma' tsictesʌben i ñuclel jini winic c'uxbibil bʌ a cha'an

⁸la' ch'ʌjmic tilel i bujc jini rey yic'ot i c'ʌchlib yic'ot i corona.

⁹La' aq'uentic ti' wenta jini c'ax ñuc bʌ i ye'tel cha'an mi' xojben i pislel jini winic c'uxbibil bʌ ti rey cha'an mi' tsictesʌben i ñuclel. La' i c'ʌchchocon jini winic cha'an mi' pʌy majlel ti parque ti' yojlil tejclum. La' majlic ti ñaxan. La' i sub majlel ti c'am bʌ t'an: “Che'ʌch yom mi' tsictesʌbentel i ñuclel jini winic c'uxbibil bʌ i cha'an rey”. Che' yom mi' sub majlel, che'en Amán.

¹⁰Jini rey tsi' sube Amán: Se'ñun mecu. Ch'ʌmʌ majlel c bujc. Xojben Mardoqueo che' bajche' tsa' wʌlʌ. Jiñʌch jini judío buchul bʌ ti' ti' cotot. C'ʌchchocon tij c'ʌchlib. Mach ma' wis cʌy a mel ti pejtelel tsa' bʌ a subu, che'en jini rey.

¹¹Jini cha'an Amán tsi' ch'ʌmʌ i pislel rey yic'ot i c'ʌchlib. Tsi' xojbe i bujc Mardoqueo. Tsi' c'ʌchchoco. Tsi' pʌyʌ ñumel ti jini parque ti' yojlil tejclum. Tsi' cha'le oñel majlel. Che' abi yom mi' melbentel jini winic c'uxbibil bʌ i cha'an rey, che'en Amán.

¹²Che' ujtemix jini, tsa' sujti Mardoqueo ti' ti' yotot rey. Amán tsa' puts'i majlel ti' yotot, mosol i jol cha'an ch'ijiyem i pusic'al.

¹³Amán tsi' sube Zeres i yijñam chuqui tsa' ujti. Tsa' caji i yʌlob i yijñam yic'ot i pi'ʌlob: Mux i t'uchtañet Mardoqueo. Mi judíojʌch jini Mardoqueo mach mʌjlic a cha'an. Wersa mi caj i mʌjlel i cha'an, che'ob.

¹⁴Che' bʌ woliyob to ti t'an, tsa' tiliyob eunucojob loq'uemo' bʌ ti' tojlel rey cha'an mi' bʌc' pʌyob majlel Amán, come chajpʌbilix i bʌl i ñʌc' i cha'an Ester.